¹ Akube kuti njimbile muyandwi wangu uuyandika loko, lwiimbo lwamuyandwi wangu aatala achilili chakwe. Muyandwi wangu uuyandika loko wakali aachilili aatala lyakalundu kali aanyika iivundide. ² Wakaliminina liminina, wagwisya mabwe, alimwi wakagaka amusyobo wamuchelo mubotu loko. Wakayaka ingaze akati kachilili, alimwi wakayaka chisiminini chawayini. Wakalindila kuti uzyale muchelo, pesi wakazyala muchelo wamusokwe. ³ Aboobo lino, bantu bamuJelusalema abantu boonse baJuda, mubeteke aakati kangu achilili changu. ⁴ Niinzi chiindilide chakelede kuchitilwa chilili changu, eecho ncendakatachita? Eelyo ndakalandilila kuti chizyale michelo, nkamboonzi niyakazyala michelo yamusokwe? ⁵ Lino ndakubuzya eechi ncindoochitila chilili changu: ndoogwisya lubeya lwacho, njoowusandula ukabe muchelo, njomwaya bulambo bwacho, alimwi chiyolwatwiidwa aansi. ⁶ Njochilazika kachisowedwe, alimwi tachikoyookookwedwa pe. Muchibaka chamasaansa kuyomena maamvwa. Njolayilila mayoba kuti atawisyi mvula. ⁷ Nkambo mumunda waJehova wamakamu ninganda yaIsilayeli, akubantu baJuda mbubotu bwamisamu yakwe: wakalindila bululami, pesi, muchibaka eecho kwakaba kujeya; nkambo bululami, pesi, anikuti, kwakaba moongololowalugwasyo. ⁸ Mawe kuli baabo basyanizya kungánda akungánda , aabo baswanizya muundsa kusikila kakutachikwe busena buchaala akuti iwe awulike uchaale munyika! ⁹ Jehova wamakamu wakandibuzya Maandaangu miingi ayochaala katakwe chintu, nikuba mpati alimwi azikondezya kaatachikwe naba omwe. ¹⁰ Nkambo mumunda uulimwa abasune bali kkumi uyotyolwa chisuwo chimwi kupela, alimwi mweelwe wambuto yamuunzi uyoozyala cheelesyo chomwe luzutu. ¹¹ Mawe kulibaabo bafuma kuseni kuti bajane bukande bululisya, aabo bakkala chakusyaalila mansiku kusikila mane wayini wabakkola. ¹² Balaakagoma anyeele, anamaala, kantimbwa awayini kumapobwe aabo, pesi tabalemeki pe eezyo jehova nzyaachita naakalemeka mulimu wamaanza aakwe. ¹³ Nkinkaako bantu bangu bayinka mubuzike akaambo kakutaswilizya; bazuluzi baabo balemekezya beenda aanzala, alimwi bantu baabo bazibinkene tabakwe chakunywa pe. ¹⁴ Nkinkaako chikkalilo chabafu chalichita kuti chikomezye kapati akwasamusya lokomulomo wacho; buvubi, abaabo basekelelaaabo babotedwe akati kabo, baselukila mulinchicho chikkalilochabafu. ¹⁵ Bantu bayowangilwa kukotama aansi, alimwi bantu boonse bayoofwiinsigwa; meso abasikulisumpula ayosowelwa aansi. ¹⁶ Jehova wamakamu uyoosumpulwa mubululami bwakwe, alimwi Leaza uusalala uyoliboniya kusalala kwakwe kwiindila mubululami bwakwe. ¹⁷ Mpawo mbelele ziyochela mbuli mumachezezyo aazyo, alimwi mumatongo aamwayikide, twana twambelele tuyoochela mbuli bazwakule. ¹⁸ Mawe kuli baabo bakwelana azibi antombo zyabuyo alimwi aababo bakkwela alubo mbuuli kuti zyakali antombo yangolo. ¹⁹ Mawe kuli baabo baamba kuti, ''Anoli Leza wafwambaana , anooli wachita kufwambaana, kuchitila kuti tubone kakulokuchitika; alimwi akubekuti mabambe awusalala waIzilayeli asike, kuchitila kuti tukonzye kwaaziba.'' ²⁰ Mawe kulibaabo bayita chibi kuti nchibotu, alimwi bubotu kububi; bayiminina mumudima mbuli mumuni, amumuni mbuli mudima; aabo bayiminina chilula mbul chinono, achinono mbuli chilula! ²¹ Mawe kulibaabo basongo mumeso aabo beni! abachenjede mukumvwisisisya kwabo beni. ²² Maawe kulibaabo balaanguzu kwiindilila kukunywa wayini, alimwi bachenjede kukuvweelaniya zinywigwa zikkola; ²³ abaabo balulamika basizibi kuti babbadale akukasya batakwe milandu zyeelelo zyabo! ²⁴ Nkinkaako mbuli mabangabanga aamulilo mbuumwaya zisiko, alimwi mbuli sokwe lyakayuma niliwida aansi mumabangabanga, aboobo muyanda wawo uyoobola, amalubaluba aawo ayoomwayuka mbuli lusuko. Eechi chiyochitika nkaambo bakakaka mulawo waJehova wamakamu, alimwi nkaambo bakanyansya ijwi lya Uusalala waIzilayeli. ²⁵ Nkinkaako, bukali bwaJehova bwabuka aakati kabantu bakwe. Wasisya jaanza lyakwe aalimbabo akubasubula. Zilundu zyakankama, alimwi amitunta yabo yaba mbuli zintu zyabiyo zisowedwe mumigwagwa. Muzintu zyoonse eezi, lunyemo lwakwe talumani pe; muchindeecho, ijaanza lyakwe lichitandabikidwe. ²⁶ Uyoosumpula chitondeezyo chandembela kumanyika alikule akusibila aabo balikumamanino aanyika. Langa, bayooza achakundijana akufwambaana. ²⁷ Takwe uukatala nikuba uubaleba akati kabo; takwe pe uuguna naa koona. Nikuba nkumba zyabo kuti zitendele naakuti intambo zyansangu zyabo kudunsuka. ²⁸ Mivwi yabo ilabosya amata aabo woonse alipetedwe; insumba zyamabbiza aabo zilimbuli bbwe, amavili aankalaki yabo mbuli kambizi. ²⁹ Kuvuluma kwabo kunooli mbuli kamulavu; bayoovuluma mbuli twana twamulavu. Bayoolila akujaya banyamaakubatola kule, kaatakwe sikubavuna. ³⁰ Mubuzuba oobo bayoovuluma aatala aabanyama mbuli lwizi lwizi mbuluvuluma. Naa umwi walanga aajulu lyanyika, uyoobona mudima akufwaba, nikuba mumuni uyochitwa kuba mudima amayoba.