¹ Seluka akukkala mulusuko, nakalindu mwana musimbi waBbabbiloni; nkala anyika atakwe chuno, mwana musimbi waba Kkaludiya.Tukolemekwa limbi akuba mutete. ² Bweza ziyo akuziya busu; gwisya chisitilizyo chako, zwatununa malogwe ako alengelela,vumbula mawulu ako, uzubuke tulonga. ³ Chiswe chako chiyovumbulwa, iyi bweme bwako buyoboneka: Ndiyobwedezya bubi akutafwida muntu luzyalo. ⁴ Mununuli wesu, Jehova wamakamu ndizina lyakwe, umwi Uusalala wa Izilayeli. ⁵ Kokkali chakumuna akuya mumudima mwana musimbi waba Kkaludiya; nkaambo tukoyitwa limbi kuti mwana musimbi wa Mwami. ⁶ Ndakanyemena bantu bangu; Ndakasofwazya lukono lwangu akulupeda mujanza lyako, pesi tewakatondezya luzyalo; wakaanzika mukuli ulema kubantu bachiindi. ⁷ Wakaamba kuti, ''Uyoyendelezya mbuli mwana musimbi wa Mwami.'' Takwe niwakazilondola zintu ezi mumoyo, nikuba kuziba kuti ngaziyoba buti. ⁸ Aboobo kwaino komvwa eechi; inywebo nimuyanda kulibotezya akukkala chakulyiiba; webo nowamba mumoyo wako, 'Mondili alimwi taakwe uumbi ulimbuli ndime: Nsikoyokkala mbuli mukamufu, nekuba kutaswekelwa bana.'' ⁹ Pesi zintu ezizyobile ziyokusikila mukayindi kaniini muzuba limwi kufwidwa bana akuba mukamufu munguzu zyoonse bayoza kulinduwe nekuba zisonzyo zyako ansengo zyako zyiingi azidanda. ¹⁰ Wakasyoma mububi; wakaamba kuti, ''Taakwe uumwi undilwene.'' Busongo bwako aluzibo lwako zitola kukusweeka, pesi wamba kuti mumoyo wako; ''Ndichipona, alimwi taakwe umbi uulimbuli ndime. I ntenda iyokuzunda tokoyozikonzya kuzitanda ansengo zyako. ¹¹ Lunyonyooko luyokuwida; taakwe notakakonzye pe kulikwabilila. Lunyonyooko luyokusikila chakufwambaana, kotana kuziba. ¹² Kochikakatila mukuwaala inkakata zyako azisondyo zyako zyiingi eezyo nziwakalemezegwa chakusyomeka kuzwa kubwanike bwako; ambweni uyozwidilila, ambweni uyoyoosya ntenda. ¹³ Wakatala alulayo lwako lwiingi, Leka bantu bayime akukutawukila - aabo bambuula azyamujulu akulanga kunyenyeezi, aabo baamba myeezi mipya - leka bakukutawukile kuzwa kuleezyo ziyochitika kulinduwe. ¹⁴ Bona, bayooba mbuli buungu. Mulilo uyobatenta. Tabakoyo likutawukila lwabo beni kuzwa kujanza lyamabangabanga. Taakwe makala akubakasazya, akutakwe mulilo wakubatakkalilile alinguwe! ¹⁵ Mbombubobu mbubatabe kulinduwe- aabo bali ayooyo nguwakabelekela, alimwi wakawuzya akuzya ambabokuzwa kubukubusi - takwe umbi unga ulakuvuna.''