¹ Ncheechi nchaamba Jehova kumunanike wakwe, kuliSayilasi, ooyo ngundijisi jaanza lyalulyo, kuchitila kuti tukabweze zisi kunembo lyakwe, kunyanga nguuzu baami, alimwi ukajule makoma kunembo lyakwe, kuti milyango ikachaale kijulikide: ² ''Ndiyoyiinda kunembo lyako akumwaya zilundu; ndiyotyoloola makoma amukuba muzipanzi akugonkoola masimbi aazyo, ³ alimwi ndiyomupa zintu ziyandisi zyakumudima abuvubi busisidwe, kuti ukazibe kuti ndime, Jehova, ooyo ukwiita azina lyako, imebo, Leza waIzilayeli, ⁴ Akaambo kaJakkobo mulanda wangu, alimwi Izilayeli musale wangu, ndakakwiita azina lyako, kandikupa chuuno chabulemu, nekuba teewakalina kundiziba. ⁵ Ndime Jehova, alimwi takukwe uumbi; takukwe Leza pesi mebo. Ndiyokuyumya kunkondo, nekuba kuti tewalindizi; ⁶ kuti bantu ngabalandiziba kuzwa kukuzwa kwazuba, alimwi kuzwa kumbo, kuti takukwe Leza pesi mebo: Ndime Jehova, alimwi takukwe uumbi. ⁷ Ndilachita mumuni akulenga mudima; ndilaleta luumuno akuchita lunyonyooko; ndime Jehova, uuchita zintu zyoonse eezi. ⁸ Nywebo nomajulu, amuwisye mvula kuzwa kujulu! Muleke mulengalenga uwisye bululami. Muleke nyika ibuswimpe kuti lufutuko lusyuuke, alimwi bululami busyuuke aantomwe andulo. Mebo ndeJehova nindakabalenga boonse. ⁹ Maawe kuli ooyo uukazyania ayooyo wakamupanga, kuli ooyo ulimbuli chimwi chilongo chabulongo aakati kazilongo zili munyika! Bulongo bulaamba na kulisikubumba, 'Niinzi nchuliikupanga?' naa 'Mulimu wako tuujisi mikoba aalinchicho? ¹⁰ Mawe kuli ooyo wamba kuti kuliwisi, 'Niinzi nchweendelezya?' naa kumwanakazi, ''Niinzi nchulizyalila?' ¹¹ Ncheechi Jehova ncaamba, Uusalala waIzilayeli, Mulengi wakwe: 'Nkamboonzi ulabuzya mibuzyo aatala anchiyoochitila bana bangu? Ulandambila na chakuchita cheendelana amulimu wamaanza aangu?' ¹² 'Ndakapanga nyika akulenga muntu aalinjiyo. Akali maanza aangu akakomezya majulu, alimwi ndakalayilila nyenyezi zyoonse kuti ziboneke. ¹³ Ndakasukutizya Sayilasi mubululami, alimwi ndiyobamba kabotu nzila zyakwe zyoonse. Uyooyaka munzi wangu; uyooleka bantu bangu balimubuzike bakaye kumuunzi, alimwi kwakutali kwamuulonaa masinkamulomo,''' mbwaamba Jehova wamakamu. ¹⁴ Ncheechi Jehova nchaamba, ''Mifolo yaIjipita amakwebo aaKkusyi abaSabbi, baalumi balamfu mubwiime bayoletwa kulinduwe. Bayooba bako. Bayotobela musule lyako, kabeza kabaangidwe aanketani. Bayovundama kulinduwe akwaambuzyania aandinywe nkabaamba kuti, nchobeni Leza ulaandinywe alimwi takukwe uumbi kunze kwanguwe.''' ¹⁵ Nchobeni uliLeza uulisisa lwakwe, Leza waIsilyeli, Mufutuli. ¹⁶ Bayowusa nsoni boonse akubula luzyalo antoomwe; aabo babeza mituni bayoyenda mubweeme. ¹⁷ Pesi Izilayeli uyofutulwa aJehova alufutuko lutamani; takukwe lubo nuyoowusigwa nsoni akuba aabweme. ¹⁸ Ncheechio Jehova nchaamba, ooyo wakalenga majulu, Leza wamasimpe ooyo wakalenga nyika akwiipanga, ooyo wakayiimika. Wakayilenga, pepe mbuli chitakwe mulimu, pesi kiibambidwe kuti ikkalike: ''Ndime Jehova, alimwi takukwe uumbi. ¹⁹ Tendakambwiida mukavwindi pe, mubusena bumwi busisidwe; tendakaamba pe kulungu lwaJakkobo, 'Mundiyanduule chabuyo! ndime Jehova, wambuula chaluzyalo; Ndaamba zintu ziluleme. ²⁰ Amuyobololane akuza! Amubungane aantomwe, inywebo nomuyubide nkondo kuzwa akati kazisi! Tabakwe luzibo aabo banyampula zikozyanio zyakubeza akukomba kulibaleza batafutuli. ²¹ Swena aafwiifwi uwambe kulindime, leta bukamboni! Amuleke nzyaambe antoomwe. Ngwani wakatondezezye eechi nsiku? Ngwani wakachambilizya? Teewakilindime na, Jehova? Takukwe Leza kunze kwandime, Leza uubeteka kabotu amufutuli; takukwe uumbi kutali ndime. ²² Amuchengulukile kulindime akufutulwa, nyoonse nomagolelo aanyika; nkambo ndime Leza, alimwi takwe uumbi. ²³ Alwangu mwaini ndilakonka, kwaamba kwakubeteka kabotu, alimwi takuyosanduka: 'Kulindime izwi lyoonse liyoovundama, lulimi loonse luyookonka. ²⁴ Balowamba azyandime, ''MuliJehova alike mulilufutuko anguzu.''''' Bayooba abweeme boonse banyemede kulinguwe. ²⁵ MuliJehova lunyungu loonse lwaIzilayili luyoolulamikwa; bayoba akulisumpula mulinguwe.