¹ Kwalino swilila, Jakkobo omubelesi wangu, a Izilayeli, ngundasala: ² Mbuboobu Jehova mbawamba, nguwe wakakuchita akukubumba mwida alimwi ngutakakugwasye: ''Utayoowi, Jakkobo omubelesi wangu; ayebo Jesuluni, ngundasala. ³ Nkambo Ndiyotila maanzi aanyika ilanyota, atulonga tukunka anyika njumu; Ndiyotila muuya wangu kubana bako azilongezyo zyangu kuzyalane lyako. ⁴ Bayonyampuka mukati kamasokwe, mbuli misamu imena kumbali lyatulonga twamanzi. ⁵ Umwi ulamba kuti, 'Ndili wa Jehova,' alimwi umwi ulyita zina lya Jakobo, alimwi umwi ulalemba mujanza lyakwe 'Kuba wa Jehova,' alimwi alyuzike muzina lya Izilayeli.'' ⁶ Mbuboobu Jehova mbwawamba--Mwami wa Izilayeli amufutuli wakwe, Jehova muleli: ''Ndime mutanzi, alimwi Ndendime mamanino; alimwi takwe umbi Leza pesi mebo. ⁷ Ngwani ulimbuli ndime? Ngaachambilizye apandulule kuli ndime mabambe akachitika kuzwa nindakalenga bantu bangu bensiku, alimwi mubaleke baambilizye mabambe ayobuza. ⁸ Utayoweli na kuyoowa. Tendakazyamba na kulindinywe chindi loko, akuchaamba? Nduwe kamboni wangu: Kuli Leza na kunze kwangu? Takwe limbi bbwe; Takwe ngwendizi pe.'' ⁹ Zyonse zibumbwa zyankombyo nzyabuyo; zintu muzibotelelwa tazikwe muulo; bakamboni babo tababoni kana kuziba chintu, alimwi bayobikwa mumawuse. ¹⁰ Ngwani uunga wabumba Leza nanka kweeta chibumbwa leza chitakwe muulo? ¹¹ Boona, boonse mbalyidilana aabo bayobikkwa mumawuse; Babezi mbaalumi biyo. Mubaleke babweze busena bwabo antoomwe; Bayoba zyoombe alimwi bakabikwe mumawuse. ¹² Mufuzi ubeleka azibelesyo zyakwe, kuchibumba, kubeleka kwiinda na makala. Ulachibumbuzizya ansando akuchibeleka akuboko kwakwe kusimine. Uli anzala, alimwi nguzu zyakwe zilongelwa; tanywi manzi alimwi ulazilika. ¹³ Mubezi weela chisamu chakwe akakole, alimwi uchibika impa acheengo. Uchipa chiimo azibelesyo zyakwe akuchibikwampa antondeka-mweelo. Uchipa chiimo chamuntu, mbuli muntu weebeka, kuchitila kuti chikonzye kukkala mung'anda. ¹⁴ Utema kawisya minsamu, na kusala muzwaganzi kana mukusu. Ulalibwezela misamu mulusaka. Ubyala musamu mukulambila alimwi imvula ilukomezya. ¹⁵ Mpawo muntu wuubelesya kukunka mulilo akulikasazya. Mbombubo, uyasya mulilo akujisya chibunge. Mpawo wachita leza kuzwa kulinchicho akuchifugamina; uchita chileza bubumbe akuchikotamina mubulemu. ¹⁶ Utenta chimwi chimpanzi chachisamu kakunka mulilo, kayoka nyama yakwe aalinguwo. Ulalya akakkuta. Ulalikasazya akwaamba kuti, ''Aah, Imebo ndakasalilwa, Ndalibonena mulilo.'' ¹⁷ Zimwi zisamu wakazibelesya kuchita leza, chikozyanisyo chakwe chakubeza; wachikotamina akuchipa bulemu, akukomba kuli nchicho kawamba kuti, ''Ndivune, nkambo nduwe leza wangu.'' ¹⁸ Tabazi pe, nikuba kumvwisisya, nkambo menso aabo mawofu alimwi takonzyi kubona pe, alimwi myoyo yabo nikuba kujatana tayiyeyeli. ¹⁹ Takwe uyeeya nikuba kujatana akwamba kuti, ''Ndatenta chimwi chimpanzi chazisamu mumulilo; iiyi, alimwi ndajika chibunge amakala aazyo. Ndayoka nyama amakala ndalya. Lino chimwi chimpanzi chazisamu ndichite chimwi na chisesemya kukukomba? Ndikotamine ansi kuchitanda chachisamu?'' ²⁰ Kubanga mbuli wali kulya dyota; moyo wakwe weenedwe ulamusowesya. Takonzyi pe kulivuna, nikuba kwamba kuti, ''Eechi nchintu chili mujanza lyangu lyachilisyo nguleza wakubeja.'' ²¹ Yeeya zintu ezi, Jakobo, a Izilayeli, nkambo ulimubelesi wangu: Izilayeli, nsikoyokuluba pe. ²² Ndasitika, mbuli jobademu, inchito zyako zyabutaka, alimwi mbulijoba, zibi zyako; boola kuli ndime, nkambo nddakufutula webo. ²³ Yiimba, iwebo nomajulu, nkambo Jehova wachita oobu; tambwizya, iwebo nobunike bwaanyika. Mumwayikizyanie mukwimba, inywe nomalundu, iwe nolusaka luli amisamu yoonse; nakmbo Jehova wafutula Jakobu alimwi uyotondezya busalali bwakwe mu Izilayeli. ²⁴ Mbuubo bu mbawamba Jehova, mufutuli wako, ooyo wakakubumba kuzwa mwida: ''Ndime Jehova, wakachita zyoonse, wakatandabika imajulu aalike, wakebesya nyika. ²⁵ Imebo nesukusya businsimi bwababeji abawusya aabo baboola businsimi; Imebo nenzunda busongo bwabasongo akufubazika nchenjezyo yabo. ²⁶ Imebo, nde Jehova, wakasinizya majwi amubelesi wakwe alimwi kagozya inzumbuuzyo zyabatumwa bakwe, uwamba zya Jelusalemu, nkwayokkala, ázyamadolopo aaku Juda, Áyoyakwa lubo, alimwi Ndiyobusya matongo aabo'; ²⁷ uwamba kubunike bwalwizi kuti, 'Yuminina, alimwi Ndiyoyumya bulongalonga bwako.' ²⁸ Jehova nguwamba zya Sayilasi, 'Ngomwembeli wangu, uyochita yoonse mpeekezyo yangu; uyozibisya aatala a Jelusalemu, uyoyakululwa, 'alimwi aatala achikombelo, 'Muleke ntalisyo yayo iyakwe.'''