¹ Amubone, mulanda wangu, oyo ngwendisalide; musale wangu, mulinguwe ndilakondwa. Ndabikka Muuya wangu aalinguwe; uyoyeta kululamikwa kuzisi. ² Takoyolila chakoompolola, nikuba ijwi lyakwe kumvwikka munzila. ³ Itete litifukide takoyolityola, akamuni kasuka takoyokazima: Uyosyomezya kweta bululami. ⁴ Takoyokomena loko pe nikuba kulangilwa ansi kusikila akeete bululami munyika; azilazyo nyika zyakunkomwe zyalwizi ziyolindila milawo yakwe. ⁵ Mbuboobu mbwawamba Leza Jehova - ooyo wakalenga majulu akwakomezya, ooyo wakalenga nyika azyonse nzyugusya, oyo upa kuyoya kubantu alinjiyo alimwi a buumi kuli baabo bakkala mulinjiyo. ⁶ ''Imebo, nde Jehova, ndakamwitila mubusalali alimwi njojatilila kuboko kwenu. Ndiyomubamba akubikka mbuli chizuminano chabantu, mbuli mumuni wabamasi, ⁷ kujula menso aboofu, kwangununa baangidwe kuzwa muntolongo ilikunsi aanyika, alimwi kuzwa mukujalilwa mung' anda kwabaabo bakkede mumudima. ⁸ Ndime Jehova, ndendilyo izina lyangu; alimwi bulemu bwangu nsikoyo bwabana awumbi nikuba kutembawula kwangu azikozyanio zibezedwe. ⁹ Bona, zintu zyachiindi zyamba kwiinda, lino ndaamba kwaamba zichitiko zipya. Kabatana kukkala ndiyokwambila atala ambabo.'' ¹⁰ Mwimbile Jehova alwimbo lupya, alimwi kutembawulwa kwakwe kuzwa kumagolelo anyika; webo nonyika aansi kulwizi, alimwi azyonse ezyo zili mulindulo, nyika zyakunkomwe, mpawo ezyo zikkala mukati. ¹¹ Muleke nkanda amyunzi zilyite, magunzi Kkeda nkwakkala, moompolole chakubotelwa. Muleke bakkali baku Sela biimbe; muleke boompolole kuzwa ajulu azilundu. ¹² Muleke bape bulemu kuli Jehova alimwi baambe ntembwuzyo zyakwe munyika zyanu mukati kankomwe. ¹³ Jehova uyoyinka aanze mbuli silumamba; mbuli mwalumi wankondo, uyobusya busungu bwakwe. Uyowompolola, iiyi, uyovulumina kulila kwankondo yakwe; uyotondezya basinkonyina inguzu zyakwe. ¹⁴ Ndakawumuna lwachiindi; Ndakachiliwo alimwi akuli simyasimya lwangu; lino ndiyolila mbuli mwanakazi utumbuka; Ndiyoya akufwambana. ¹⁵ Ndiyobikka zilundu zitakwe lugwasyo pe atulundu akuyumya lusaka lwabo loonse; alimwi ndiyolanzya milonga mutusuwa akuyuma masensa. ¹⁶ Ndiyoyeta boofu anzila ezyo nzibatezi pe; munzila ezyo nzibatazi kuti ndiyobazulwida. Ndiyosandula mudima kuba mumuni kunembo lyabo, mpawo akululamika masena ataluleme akalulame. Ezi zintu ndiyozichita alimwi nsikoyozileka pe. ¹⁷ Bayolanzigwa musule, aboobo bayofwisigwa bweeme, abo basyomasyoma zikozyanio zibezedwe, abo kuti kuzikozyanio zyalubulo zifulidwe, ''Ndinywe baleza besu. ¹⁸ Amuswilile, nobasinkematwi; alimwi mulange, nywebo noboofu, kuchitila kuti mubone. Ngwani utaboni pesi kali mulanda wangu? Nanka musinkematwi mbuli mutumwa wangu ngwendituma? ¹⁹ Ngwani moofu ulimbuli mwenzuma wachizuminano, naba moofu mbuli mulanda wa Jehova? ²⁰ Ubona zintu zyiingi, pesi tozimvwisisyi; matwi alijulikide pesi takwe uswilila. ²¹ Zyakabotezya Jehova kuti ngatembawulwe bululami bwakwe akuchita mulawu wakwe kuti ube abulemu. ²² Pesi aba mbibantu bakabba alimwi akusala; boonse balichedwe mumalindi, balibikidwe mubuzike muntolongo; bakaaba zisale zitakwe ubavuna pe, alimwi takwe uumwi uwamba kuti, 'Mubabozye baboole!'' ²³ Ngani akkati kanu uyoswilila eechi? Akuswilila akumvwa muchiindi chiza. ²⁴ Ngwani wakaaba Jakkobbu kubafumpi, alimwi ngwani wakaaba ba Izilayeli kuli babasikubuta? Sena takali Jehova, zilwisyania ayooyo ngutwakabisizya, ulanzila azibaka bakaka kwendela, alimwi ulamilawu njibakakaka kusyoma? ²⁵ Nkinkaako wakatila bukali bwakwe buyoosya alimbabo abukali bwankondo, mabangabanga aabo akabazyunguluka, pesi tebakamvwisisya pe; wakabuuma, tebakazibikkila moyo pe.