¹ ''Ngamumune kunembo lyabusyu bwangu, inywebo nozisi zyakunkomwe yalwizi; misyobo yabantu ibukulusye nguzu zyabo; mubaleke baswene kufwafwi akwambuula, atuswene afwifwi toonse kukubeteka makani. ² Ngwani ubusya uumwi uzwa kujwe, kumwiita kubululami kumulimo wakwe? Ulaaba minyaka mumaanza aakwe alimwi ulamugwasya kuti abe mwendelezi wabaami. Ulabaabila ipanga lyakwe mbuli lusuko, mbuli buungu kunembo lyabuta bwakwe. ³ Ulaya bubotelwa alimwi uliinda kabotu, anzila itanza yindwa njatola mawulu akwe. ⁴ Ngwani wakabeleka akuchita milimo iliboobu? Ngwani wakayita mazyalani oonse kuzwa kumatalikilo? Ndime, Jehova, mutanzi, akumamanino, Ndime ngonguwe. ⁵ Inyika zyakunkomwe zyalwizi zyakabona akuyoowa; Magolelo aanyika akakankama; Bakaswena afwaafwi akusika. ⁶ Umwi awumwi wakagwasyania abenzinyina, alimwi umwi mubezi wakambila mwenzinyina kuti, ''Koyuma.' ⁷ Aboobo mubezi wakayumya mufuzi, alimwi oyo ubilingania ansando wakagwasizya sikuuma achifulo, wakamba akufula kuti, ''Nchibotu.' Bakachikankamina amanembe kuti chitasunzuluki. ⁸ Pesi iwebo, Izilayeli, mulanda wangu, Jakkobbo ngwendisalide, lunyungu lwa-Abbulahamu muzolwani wangu, , ⁹ Imebo ngundakajata kuzwa kumagolelo anyika angundakayita kuzwa kuzyooko zyayo, kukwambila kuti, nsikukakide oe. ¹⁰ Utayoowi, nkambo ndilayebo. Utakankami, nkambo ndime Leza wako. Njokuyumya, alimwi njokugwasya, alubo njokutabilila ajanza lyangu lyalulyo lyabululami bwangu. ¹¹ Boona, boonse bayowusigwa insoni abweeme, aboboonse bakakubikilila; Boonse bayooba chintu biyo alimwi bayonyonyoonwa, aabo bakazyania anduwe. ¹² Uyobayanduula akutabajana aabo basikwambana anduwe; Abo bakubusizya inkondo bayooba chintu biyo, nchobeni nchintu biyo. ¹³ Nkambo Imebo, Jehova Leza wako, Njokwambilila kuti, 'Utayoowi; Ndime sikukugwasya.' ¹⁴ Utayoowi, Jakobo webo nochiyokaansi, alimwi anywebo nobantu ba Izilayeli; Ndiyokugwasya -- mbwawamba Jehova, Mumuni wako, Uusalala wa Izilayeli. ¹⁵ Bona, Imebo ndakubikka kuti ubembuli chipoozyo chipya chijisi meno, chipya amamanino aabili; uyopola zilundu akuzipyachuula; uyochita tulundulundu mbuli buungu. ¹⁶ Uyoziseba, alimwi muuwo uyozitola; kambizi kayozimwayisya. Uyosekelela muli-Jehova, kutembawula Uusalala wa Izilayeli. ¹⁷ Batengwana abachete ba layanduula maanzi, pesi takwepe, alimwi indimi zyabo zyayuminina nkambo kanyota; Mebo, lwangu ndi Jehova, ndiyobavwiila kunkombyo zyabo; Mebo, ndi-Leza wa-Izilayeli nsikoyo balekelezya. ¹⁸ Ndiyotuntumusya milonga aatala lyazilundu zikukwidwe muuwo, amwalo mumakkuti; Ndiyosandula inkanda kuba iziba lyamanzi, alimwi nyika injumu iyooba tusensa twamanzi. ¹⁹ Mukati kenkanda ndiyomeneka minsamu ya Sida, ayamuunga, ayamisowe ayamafuta. Ndiyomeneka minsamu yaku Sayipulesi mukati kankanda, amisikili amizimbwa yoonse antomwe. ²⁰ Ndiyochita eechi kuti bantu babona, akuziba, akubikka myoyo yabo kumakani, kuti janza lya-Jehova ndilyachita oobo, kuti Uusalala wa-Izilayeli nguwakazilenga. ²¹ ''Ngamweete makani aanu,'' mbwawamba Jehova, ''Amulete bukamboni bwamituni,'' mbwawamba Jehova wa-Jakkobbo. ²² Baleke beete makani atulwiida kuti ziyoboneka; mube aabo kunembo lyanu akwaamba kuli nduwe zintu zitachitike, kuti toonse tuzibe zintu eezi kabotu. Batwambile tulangilila kwachiindi anzibakaamba, kuti tuyibaluke kulingawo akuziba mbwatakazuzikizye. ²³ Ngamutulwiide makani achiza, kuti tuzibe kuti muliba-Leza; Amuchite makani naaba mabotu naaba mabi, kuti twabone akugamba. ²⁴ Bona, nywebo nozikozyanio muli zintu biyo amilimo yenu tiikwe chintu; oyo umusala ulasesemya. ²⁵ Ndabusya umwi uzwa kunyika, alimwi wasika; kuzwa kujwe ulalemeka izina lyangu, alimwi uyolyatawula basilutwe mbjuli butope, mbuli mubumbi mbwakkanda bulongo. ²⁶ Ngwani wakalungulula makani kuzwa kumatalikilo, kuti twazibe? Musule acheechi chiindi, kuti twaambe, ''Ulikabotu''?Nchobeni takwe ulungulula, iyi, taakwe uuswilila majwi aanu, ²⁷ Ndakatanguna kwambila Ziyoni kuti, ''Bona awa mpaabede,'' Ndime ndakatuma sikuleta makani ku-Jelusalemu. ²⁸ Kuti ndalanga, takwe muntu pe, taakwe sikulanga akkati kabo ukkonzya kupa makanimabotu, ngwani, kuti ndabuzya, ulakonzya kusandula ijwi. ²⁹ Bona, boonse mbabuyo, alimwi milimo yabo tiikwe makani; zikozyano zyabo zifulidwe nzyamuuwo biyo alubo tazikwe chintu.