¹ Mumwaka wakkumi ayine yamwami Hezekkiya, Senakkelebbu, mwami wa Asiliya, wakalwisya yoonse myuunzi ibayilidwe ya Juda akubajata. ² Mpawo mwami wa Asiliya wakatuma silutwe waba silumamba mupati kuzwa ku Lachisi kusika ku Jelusalema kumwami Hezekkiya kali ampi mpati. Wakasika ambali kuziba lyakutala, munzila mpati iiya kusapilwa zizwaato, alimwi wakiima ambali lyalyo. ³ Basimilimo bapati ba Izilayeli bakazwa kunze kwamuunzi kuyowambuula ambabo bakali mwana wa Hilikkiya Eliyakkimu, mwendelezi wang'anda yamwami, Syebbina mulembi wamwami, alimwi amwana mulombe wa Asafu Jowa, oyo wakalembaansi mizezo yafulumende. ⁴ Silutwe mupati wampi wakati kulimbabo, ''Mwambile Hezekkiya kuti mwami mupati, mwami wa Asiliya, wamba kuti, ''Buzwa kuli busichaamba bwaanu? ⁵ Mwaambula biyo majwi atakwe mulimo, kamuti kuli lulayo anguzu zyankondo. Lino muli bani momusyoma? Oyo wamupa bukozu bwakundipapila? ⁶ Langa, mulasyomena mu Ijiputi, eecho chitete chabulembo nchimubelesya mbuli mufunko wakweenzya, pesi naa muntu wayaama alinchicho chiyonamatila mujanza lyakwe akuchiyasa. Mbombubo Falo mwami wa Ijiputi mbwabede kuli oyo usyoma mulinguwe. ⁷ Pesi naa wamba kuli ndime, ''Tulasyoma muliJehova Leza wesu,'' tenguwe na ulamasena abulemu azipayililo Hezekkiya nzyakabweza, alimwi wakamba kuti kuli Juda akuli Jelusalema, ''Mwelede kukomba kunembo lyachipayililo eechi mu Jelusalemu''? ⁸ Lino nkiinkaako, ndiyanda kumuchita mube chipayilo chibotu kuli simalelo wangu mwami wa Asiliya. Ndiyomupa zyuulu zibili zyambongolo, naa mulakonzya kujana basikuzitanta. ⁹ Mwali kukonzya biyeni kukazya nikuba omwe wabasilutwe muniini wabalanda basimalelo wangu? Mwabika lusyomo lwanu ku Ijiputi kunkalaki abasimbongolo! ¹⁰ Mpawo linoobu, tendaza aano na kanditakwe Jehova kuzolwisya nyika eyi akwinyonyoona? Jehova wakaamba kuti kulindime, ''Lwisya nyika eyi akwinyonyoona.'''' ¹¹ Mpawo Eliyakkimu mwana mulombe wa Hilikkiya, alimwi Syebbina, antomwe a Jowa bakaamba kuti kuli silutwe mupati, ''Ndakomba wambuula kubalanda bako mumulaka wachi Alamiya chi Alamayikki, nkambo tulachimvwa. Utaambuuli andiswe mumulaka wachi Juda mumatwi abantu bali aabulambo.'' ¹² Pesi silutwe mupati wakamba kuti, ''Sena simalelo wangu wandituma kuli simalelo wanu akulindinywe akwaamba majwi aya? Tewandituma kubaalumi bakkala abulambo, aabo bayolya mazyu aabo akunywa minsyu yabo andinywe?'' ¹³ Mpawo silutwe mupati wakayima akoompoolola ajwi pati mumulaka wachi Juda, kawamba kuti, ''Amuswilile kumajwi amwami mupati, mwami wa Asiliya. ¹⁴ Mwami waamba kuti, 'Mutalekeli Hezekkiya amweene, nkambo takoyokonzya kumuvuna pe. ¹⁵ Mutakalekeli Hezekkiya amuchite kuti musyome muli Jehova, kawamba kuti, ''Jehova zyanchoonzyo uyotuvuna; muunzi uuno tukoyowabwa mujanza lyamwami wa Asiliya pe.'''' ¹⁶ Mutakaswilili kuli Hezekkiya, nkambo nzeezi mwami wa Asiliya nzyaawamba: Mpawo luumuno ambebo akuza kulindime. Mpawo woonse wanu uyolya kumusiko wakwe mwini akuzwa kumukuyu wakwe mwini, alimwi kunywa akuzwa kumaanzi amukkala wakwe. ¹⁷ Muyochita echi kusikila ndikaze akumutola kunyika iilimbuli yanu nobeni, nyika yazilyo awayini mupya, nyika yachinkwa amyuunda yamichelo. ¹⁸ Mutalekeli Hezekkiya amusowe, kawamba kuti, Jehova ulatuvuna.' Kulumwi na wabaleza babantu wakabavunide kuzwa kujanza lya mwami wa Asiliya? ¹⁹ Balikuli baleza ba Sefalivayimu? Bakamuvuna na Samaliya kuzwa kunguzu zyangu? ²⁰ Akkati kabaleza banyika eezi, kuli baleza na bakavuna nyika yakwe kuzwa kunguzu zyangu, mbuli Jehova mbwanga walikufutula Jelusalemu kuzwa kunguzu zyamgu?''' ²¹ Pesi bantu bakachaala kabawumwide akutasandula pe, nkambo mulayilo wamwami wakali kuti, ''Mutamusanduli.'' ²² Mpawo Eliyakkimu mwana mulombe wa Hilikkiya, wakali mwendelezi wang'anda, Syebbina mulembi, antomwe a Jowa mwana mulombe wa Asafu, sikubweza makani, bakeeza kuli Hezekkiya azizwaato zyabo kazidelukide, alimwi bakasuma kuli nguwe majwi amwendelezi wabasilumamba mupati.