¹ Kamuboola afwifwi , nywe nomasi, akuswilila; amuswilile, inywe nobantu! Inyika azyoonse zizuzizye zyelede kuswilila, inyika azyoonse zizwa mulinjiyo. ² Nkaambo Jehova wanyemena masi woonse, akubusya bukali atala lyabasinkondonyina; wakamana kubanyonyona, wakabaaba kukujayigwa . ³ Mitunta yabantu babo bafwide iyosowelwa aanze. Ibweema bwamitunta yabo buyoosalila koonse koonse; alimwi zilundu ziyozula bulowa bwabo. ⁴ Inyenyezi zyakujulu zyoonse ziyozima, ajulu liyopetwapetwa mbuli bbuku; anyenyezi zyabo ziyozima, mbuli matu mbaakunkumuka kuzwa kumusansa, alimwi mbuli nkuyu zyakabizya kwindila mbuziwa mumukuyu. ⁵ Eelyo ipanga lyangu nilyayonywa muchizuzikizyo chalyo kujulu; amulange liyoobola ansi aliIdomu, aatla lyabantu mbendabambila lunyonyoko. ⁶ Ipanga lyaJehova lilokulokaloka bulowa alimwi lilivumbidwe amafuta, lilalikaloka bulowa bwambelele abwampongo lilivumbidwe amafuta aansa zyabagutu.Akako Jehova ulachipayizyo mu Bbozila akujaya kupati munyika yaIdomu. ⁷ Basune bamulusaka bayowisigwa antomwe ambabo, abapule banini antomwe abapati.Inyika yabo iyozula abulowa, alimwi lusuko lwabo luyonenesegwa amafuta. ⁸ Nkaambo liyoba zuba lyakuliya nkoto lyaJehova alimwi kuli munyaka nayobabwedezezya nkaambo kwakuchita kwaZiyoni. ⁹ Tulonga twaIdomu tuyoochitwa mbuwa, lusuko lwakwe luyoba sulufa, alimwi nyika yakwe iyoba lubuwa luyaka. ¹⁰ Luyoyaka mansiku asikati; busi bwayo buyonyampuka kwalyoonse; kuzwa kuzyalani akuzyalani iyooba nyika itachikwe chintu; takwe pe utakayiinde mulinjiyo mane kukabe kutamani. ¹¹ Pesi bayuni bamulusaka abanyama bayokkala nkuko; chipolo achikwangala ziyooyaka zintente mulinjiyo. Uyotandabika alinjiyo lutambo lwakweelesya tongo acheelesyo chalunyonyoko. ¹² Bantu bakwe balemekeka tabakoyoochala achintu pe chiyoosyala chabwami, abana babaami balombe bayooba bantu biyo. ¹³ Maamvwa ayomena mumaanda aabo aabwami, minsamu yalusaka iyomena mumasena aabo ayakilidwe. Buyooba busena bwakukkala bamwaaba, busena bwampoo. ¹⁴ Banyama bamusokwe abasuntwe bayooswanana nkukoko, alimwi mpongo zyamusokwe ziyoolila imwi kunyenziina. Banyama beenda mansiku bayokkala nkukoko akulijanina busena bwakulyookezezya. ¹⁵ Zipolo ziyooyaka ziteente, kunia akukonkola mayi aazyo, kukonkola akukwabilila bana bazyo. Iyi, oko bagumbe bayobungana, umwi amwenzinyina. ¹⁶ Amukalingulule mubbuku lyaJehova; takwe nechiba chomwe chazeezi chiyoobulika.Takwe chitakabule mwenzinyina pe; nkaambo mulomo wakwe wachilayilila, alimwi muuya wakwe wazibungika. ¹⁷ Wakawumina nkakata masena aabo, alimwi janza lyakwe lyakiyeleka kuzwa kuli mbabo alutambo. Bayoyokona kwalyoonse; kuzwa kuzyalani akuzyalani bayokkala nkukoko.