¹ Langa, mwami uyoyendelezya mubululami, amwana musimbi wamwami uyoyendelezya muluumuno. ² Umwi awumwi uyooba mbuli mwenzuule kuzwa kuluuwo amayubilo kuzwa kuguwo, mbuli tulonga twamanzi mumasena ayuminide ayuminide, ambuli cheenzule champangala pati munyika yakakatazyo. ³ Eelyo amenso abaabo babona takoyosofwazigwa, amatwi, aababo bamvwa ayoswilizisya loko. ⁴ Mufubafuba uyoyenzya chamaanu achakumvwisisisya, asichibebeebe uyowambuula kabotu akuubilwa. ⁵ Mufubafuba tachikaambwi kuti mulemu, asikweena takoyowambwa kuti uliluleme. ⁶ Nkambo mufubafuba ulaambula zyabufubafuba, amoyo wakwe ulabamba chibi anchito zitakwe Leza, alimwi uwambula bubi aatala a Jehova. Uchita basinzala bamaninwe, abafwanyota babule chakunywa. ⁷ Inzila zyasilweeno nimbi. Ulayeezya makanze abi kuti anyonyoone bachete amabejo, nikuba kuti muchete waamba ziluleme. ⁸ Pele muntu mulemu ulachita makanze aluleme; akaambo kamakanze malemu ulayima. ⁹ Amubuke, inywebo nobanakazi batalipenzyi akuswilila kujwi lyangu; nobasimbi batalipenzyi, amuswilile ndime. ¹⁰ Nkambo muchindi chifwifwi biyo kwiinda mwaka busichaamba bwenu buyomana, inywebo nobanakazi batalipenzyi, nkaambo kutyolwa kwamasansa kuyokachila, kubungika takukoyoosika. ¹¹ Amukankame nobanakazi nimulyiibide; amulipenzye, inywebo nobasichaamba; amugwisye zikobela zyanu zibotu muchite chinswe; amusame zisamo zyamasaka muzibuno zyanu. ¹² Muyowomoka kumyuunda iliwo, akambo kakuvula kwamasansa. ¹³ Anyika zyabantu bangu iyomena maamvwa amitubetube, nimuba moonse mumaanda akukondelwa mumuunzi wabusekelezi. ¹⁴ Nkambo ing'anda yamwami iyotakatwa, munzi abantu bayingi uyoba matongo; chilundu ang'anda zyakulangilila ziyooba malyango kwalyoonse, lukondo lwambongolo zyamusokwe, amachelelo abutanga; ¹⁵ mane muuya ukatilwe alindiswe kuzwa kujulu, elyo inkanda ikabe muunda uzyalisya, alimwi munda uzyalisya uyoyeeyegwa kuti ndusaka. ¹⁶ Lino lubeta lubotu luyokkala munkanda; abululami buyokkalailila mumuunda uzyalisya. ¹⁷ Milimo yabululami iyooba luumuno; ampindu yabululami, buumuzi abusichaamba kukabe kutamani. ¹⁸ Bantu bangu bayokkala muchikkalilo chaluumuno, mumyuunzi ikwabililidwe, amumasena awumwide akulinzinza akulyokezezya. ¹⁹ Nikuba chivula mabwe chatanda lusaka elyo chisi chiyofwinsigwa chakumaninina, ²⁰ muyooba achoolwe nimuyobyala imbuto zyenu kumbali atulonga amuleke mawulu abasune amawulu ambongolo zilyendelele.