¹ Maawe kulibaabo bayinka ku Ijiputi kuti bagwasigwe akuyaama kumabbiza, akusyoma kunkalaki (nkambo mbiingi) akuli basimabbiza (nkambo tababaliki pe). Pesi tabakwe makani pe atala awusalala wa Izilayeli, nekuba kuyandawula Jehova! ² Lwakwe kalimusongo, alimwi uyoleta mapenzi akayotobelezya majwi aakwe. Uyobuka atala amaanda abasizibi abaabo bagwasya kuchita chibi. ³ Ijiputi talimuntu pe, mabbiza aabo ninyama buyo tuli muuya pe. Lino Jehova nayotandabika ijanza lyakwe, boonse aabo bagwasya bayoowa, ayooyo wakagwasigwa uyoowa; boonse bayoomana antomwe. ⁴ Mbuboobu mbwawamba Jehova kulindime, ''Mbuli mulavu, naba mwana wamulavu, mbwali kusule akudelula kwachakulya chakwe, nikuba inkamu yabeembeli yayitwa kukuzomulwisya, pele takankami kumajwi aabo, nikuba kuzwa kumajwi aabo akuyubilila; ngu Jehova muleli uyoselukila kuzolwana achilundu cha Ziyoni, aatala akalundu aako. ⁵ Mbuli bayuni bawuluka, Jehova wamakamu uyokwabilila Jelusalemu; uyokwabilila akuvuna nayoyinda atala acho akuchikwabilila. ⁶ Amupiluke kulinguwe kuli oyo ngumwakachija chakunika kule nobantu ba Izilayeli. ⁷ Nkambo mubuzuba oobo umwi awumwi uyogwisya baleza bakwe bansiliva abaleza bakwe bangolida ezyo maanza akwe mabi nzyakapanga. ⁸ Asiliya uyowinsigwa apanga; ipanga lyakatachitwa amuntu lyakamulya. Uyochija kuzwa kupanga, abalombe bakwe bayotola muchibbalo chiyumu. ⁹ Bayoswekelwa busichaamba nkambo kabuyoofu, amwana wamwami wakwe mulombe uyoyoowa kubusya kwankondo andembela zya Jehova -- mbuboobu mbwawamba Jehova -- ngonguwe uujisi mulilo mu Ziyoni achikko chakwe chili mu Jelusalema.''