¹ Maawe kuli Aliyeli, Aliyeli, ooyo munzi Devidi ngwakakkede! Yungizya myaaka kumwaka, leka mapobwe abe afwifwi. ² Pesi Ndiyopenzya, Aliyeli, alimwi uyolila akoomoka; mpawo kuli ndime uyoba mbuli Aliyeli. ³ Ndiyokkala akulangana anduwe kandikuzyungulukide akukusinkila alubaya, alimwi Ndiyobusya milimo yakukusinkila. ⁴ Uyobozegwa aansi akwambuula kuzwa mubulongo; ijwi lyako linooli ansi kuzwa mulusuko. Ijwi lyako liyomvwigwa mbuli muuya oyo wambuula kuzwa mubulongo, alimwi kuzwa mulusuko ijwi lyako liyovwiya - vwiya. ⁵ Mweelwe mupati wabasikukulwisya uyoba mbuli lusuko lunante mpawo makamu makamu abasiluuni ayoba mbuli buungu bupupuluka. Chiyochitika chakufwambana champawompawo. ⁶ Jehova wamakamu uyooza amuzuzumo, akuteketa kwanyika, kundindima kupati, atumbizi tupati, achivulamabwe, mpawo amabangabanga amulilo usyukuta. ⁸ Kuyooba mbuli chiloto, chilengano chamansiku: makamu makamu abantu boonse bayolwisya Aliyeli abasinguzu bakwe. Bayomulwisya aba sikumubayilila bamanikizigwe alinguwe. ⁷ Kuyoba mbuli muntu ulanzala naalota kuti ulikulya, pesi naasinsimuka, bula bwakwe tabukwe chintu. Kuyoba mbuli muntu ulanyota mbwalota kuti ulokunywa manzi asinsimuka ulikwizukide, anyota yakwe katagondedwe pe.Mbombubo, aboobo uyoba mweelwe mupati wazisi zyoonse ezyo zilwisya Chilundu cha Ziyoni. ⁹ Amuligambye lanu alimwi mugambilwe,; mulyofwaazye akofwaala! Amukolwe, pesi tensi mbote; mudadalike, pesi tensi kwabukande pe. ¹⁰ Nkambo Jehova watila muuya alindime wang'onzi zilubulula. Wajala menso anu, nobasinsimi alimwi wavumba mitwe yanu, nimubona. ¹¹ Ziyubunuzyo zyoonse zyaba mbuli majwi abbuku eelyo linamatikidwe, ndibanga bantu balipa kuli umwi uyiide, kabamba kuti, nkaambo, lilinamatizigilwe.'' ¹² Naa bbuku lyapegwa umwi utabali, akwaamba kuti, ''Bala eechi, ulaamba kuti, ''Tandikonzyi kubala.'' ¹³ Mwami wakamba kuti, ''Aba bantu baza afwifwi kulindime amilomo yabo akundilemya amulomo, pesi myoyo yabo ilikule andime. Lulemeko lwabo lwandime ndwamulayizyo biyo wabantu ooyo ngubakayiisigwa. ¹⁴ Nkaambo kaako, boona, Ndiyoyinkilila anembo kuchita chintu chibotu akati kabantu aaba, chigambyo kwayinda chigambyo. Busongo bwabantu babo bachenjezu buyoloba, mpawo akumvwisisisya kwabantu babo bachenjede buyoyangabila. ¹⁵ Maawe kuli baabo beezya kusisa makanze aabo anikide kuzwa kuli Jehova, alimwi milimo yabo ilimumudima. ''Balaamba kuti ngwani utubwene, mpawo ngwani uutuzi?'' ¹⁶ Musandamuna zintu nkuzyali kujulu zyalanga aansi! Nkubona mubumbi ulabalwa mbuli bulongo, kuti chintu eecho chakapangwa chilaamba atala ayooyo wakachipanga, ''Tewakandipanga pe mebo,'''na chintu chibumbidwe chilakonzya kwamba atala ayooyo wakachibumba kuti, ''Tewakandibumba, takonzyi kuchimvwisisisya'''? ¹⁷ Mukati chiindi chinini, Lebbanoni uyosandulwa kuba muunda, mpawo muunda uyoba lusaka. ¹⁸ Mubuzuba oobo basinkematwi bayoomvwa majwi abbuku, alimwi menso a boofu bayobona kuzwa mumudima usiya mbii. ¹⁹ Bakadyamizizigwe bayokondwa lubo muli Jehova mpawo bachete bali akkati kabantu bayokondwa muli Uusalala wa Izilayeli. ²⁰ Nkaambo siluuni wafwinsigwa, alimwi musampawuzi uyomana. Kuli aabo boonse bayandisya kuchita bubi bayogwisigwa, ²¹ Ooyo upa kuti muntu abe sikubisya aajwi. Balateya kakole kuli oyo uyandawula kululama kumulyango akukwendezya basalali ansi amanwa abuyo. ²² Nkaambo kaako mbubo mbwawamba Jehova aatala ang'anda ya Jakkobu - Jehova, wakavuna Abbulamu, ''Jekkobbu takoyofwa limbi bweeme, nobuba busyu bwakwe kuti buuse. ²³ Pesi nabona bana bakwe, mulimo wamaanza angu, bayosaalizya zina lyangu. Bayosalazya izina lya Uusalala wa Jakkobbu akwiima mukuyoowa Leza wa Izilayeli. ²⁴ Aabo baleya mumuuya bayojana kumvwisya, mpawo balengawuka bayoyiiya luzibo.''