¹ Amubone, Jehova wamba kugwisya nyika azintu zyoonse, ulayisala, ulayisandamuna, alimwi ulamwaya bantu bakkede mulinjiyo. ² Ziyochitika boobu, mbuli bantu, bayoba mbuli bapayizi; mbuli muzike, uyoba mbuli simalelo; mbuli sikuula, uyoba mbuli sikuuzya; mbuli sizikoloto, uyoba mbuli sikukweletesya, mbuli sikupegwa mpindu, uyoba mbuli sikupa mpindu. ³ Nyika iyonyonyooka nchobeni akumaninsigwa; nkambo Jehova wakaamba ijwi eeli. ⁴ Nyika iyoyuminina akupusama, bantu balisumpula alimwi balanyana, bantu basumpukide balasowegwa. ⁵ Nyika yasofwazigwa abantu bakkala mulinjiyo nkambo basotoka milawu, batyola mbeta, alimwi akutyola chizuminano chitamani. ⁶ Aboobo lutuko nchilwalyida nyika, alimwi bantu bakkala mulinjiyo bajanika balamilandu. Bantu bakkala munyika balatentwa, alimwi kwasyala bantu bache. ⁷ Wayini mpya yayuminina, misansa yapusama, boonse balamyooyo ikondedwe ilomimila. ⁸ Kuyobeka kwansaka kwamana, alimwi kupululuzya kwabaabo baboteledwe; kuyobeka kwatuntimbwa kwamana. ⁹ Tabachinywi wayini akwiimba, alimwi bukkande bulalula kuli baabo babunywa. ¹⁰ Chisi chalupyopyongano chamwayigwa; ng'anda zyoonse zyajalwa alimwi tamuchikwe zintu. ¹¹ Kulikulila mumigwagwa nkaambo kawayini; lukondo loonse lwabbililwa zuba, busekelezi bwanyika bwamwayuka. ¹² Kuchisi kwachaala lusalao, alimwi chitendele chatyoka lyabatongo. ¹³ Nkaambo eezi mbubo zitazobe munyika yoonse akkati kazisi, mbuli muchindi musamu wamu Olifa mbuzowumwa, mbuli kupalulwa kwamasansa eelyo nulikutebulwa. ¹⁴ Bayonyampula majwi aabo alimwi bakompolole bupati bwa Jehova, alimwi chalukondo bayowompolola kuzwa kulwizi. ¹⁵ Aboobo kujwe mupe Jehova bulemu, alimwi nimulikunkomwe yalwizi amupe bulemu kuzina lya Jehova, Leza wa Izilayeli. ¹⁶ Kuzwa kubusena bwakule bwanyika twakali twamvwa nyiimbo, ''Bulemu ngabupegwe kuloyo ululeme!'' Pesi Ndakati, ''Ndakasowela kule, Ndakasowela kule, maawe kulindime! Busilweeno buleena chalweeno; mbombubo, basilweeno babambulula chalweeno.'' ¹⁷ Lupyopyongano, mulindi, alimwi akakkole kalalinduwe, bantu bakkala munyika. ¹⁸ Ooyo uchija muzuzumo wenkondo uyowida mumulindi, alimwi oyo ubbuda mumulindi ulachigwa akakkole. Zipulunguzyo zyakujulu zinoyojulidwe, alimwi ntalisyo zyenyika zyazuungana. ¹⁹ Nyika iyomwayigwa chakumaninina, nyika iyopwayigwa; nyika iyozunganisigwa chakunyonyooka. ²⁰ Nyika iyodadalika mbuli muntu ukkoledwe bukkande alimwi iyoyaamuka kusule akunembo mbuli ng'anda. Mulandu wayo uyoyilemena alimwi iyoowa alubo tikoyobuka alimbi. ²¹ Mubuzuba oobo Jehova uyosubula basumpukide bakujulu balikumajulu, alimwi abaami beenyika balanyika. ²² Bayobunganisigwa antomwe, baange balimumalindi, alimwi akujalilwa muntolongo; alimwi nazoyinda mazuba miingi bayopegwa chisubulo. ²³ Alubo mwezi uyowusigwa nsoni, alimwi zuba liyo pilinganisigwa, nkambo Jehova wamakkamu uyoyendelezya atala achilundu cha Ziyoni aku Jelusalema, akunembo lyabapati bakwe chabulemu.