¹ Ndamwambila aatala achisi chaku Tayile: Maawe, nywebo nomazubo akuchisi chaku Talisi; nkambo nikuba taakwe muunzi naakuti manjililo; kuzwa kunyika yachisi cha Sipulasi ngibaka yubunwidwa. ² Amumuune, nobantu nimukkala munkomwe yaLwizi, nywebo kubasambazi baku Sidoni, aabo bayinda kutala lyaLwizi, bakamuzuzya. ³ Aatala amanzi manji kwakali mbuto ya Siwoli, butebuzi bwa Nayile bwakali buvubi bwakwe; alimwi wakaba chisambalilo chamaasi. ⁴ Kofwa insoni, Sidoni, nkaambo lwizi lwaambuula, inguzu zyalwizi zyaamba. Lwaamba kuti, ''Mebo nsina kumvwa chimyoonzi naa kutumbuka, nakubusya balombe bachili baniini nikuba kukomezya basimbi baniini.'' ⁵ Kuchiindi niyosika impuwo kuchisi chaku Ijiputi , bayonyema loko aatala a Tayile. ⁶ Amuzubuke kuya ku Tasyisyi; amulile, nywebo nobantu bakkede kunkomwe yalwizi. ⁷ Saa ezi zyakali zyachitika kuli ndinywe, muunzi wabusekelezi, ulinguwo loko kuzwa kumazuba achiindi, sa ngwakali amawulu akwendeenda kule loko akuyokkala kunyikanyenzu? ⁸ Ngwani wakabamba makani aaya akulwisya chisi chaku Tayile, uupa misini, ulabasambazi bana balombe babaami, abasikuuzya bawo mbalemekeka munyika? ⁹ Jehova wamakamu nguwakabamba makani akufwiinsya bulemu boonse bwaanyika. ¹⁰ Kolima nyika yako, mbuli umwi mbwalima mulonga Nayile, O mwana musimbi waku Tasyisyi. Takuchikwe limbi busena bwakusambalila kuchisi chaku Tayila. ¹¹ Jehova watandabika janza lyakwe aatala alwizi, alimwi wazunganisya bwaami; wapa malayilile aatala achisi cha Fayonesiya, kukuchilwisya malambo mayumu. ¹² Waamba wati, ''Tokoyobotelwa alimbi, O mwana musimbi usyanikidwe wa Sidoni; Buka, ukazubukile ku Sipulasi; pesi nikuba kuti ooko tokoyojana chilyokezezyo.'' ¹³ Amubone nhyika yaba Kkaludiya. Bantu aaba tababoneki limbi; Asyiliya bayichita kuti ibe nkanda yabanyama bamusokwe. Bakayaka maanda aabo malamfu; bakamwaya ng'anda zyabaami; bazichita kuba zilwi zyamatongo. ¹⁴ Kozubuka, yebo obwaato bwaku Tasyisyi, nkambo busena bwakuyubila bwadilisigwa. ¹⁵ Mubuzuba oobo, chisi chaku Tayile chiyolubwa kuzwa kumakumi musanu aabili amyaaka (70), mbuli kumazuba amwaami. Kusule akuumana kwamakumi musanu aabili amyaaka kuyochitika zimwi muchisi cha Tayile mbuli kulwiimbo lwa simamambe. ¹⁶ Bweza kantimbwa, koya bwendeenda mudolopo O simamambe ulubidwe; kowuma kabotu, koyimba nyimbo nyiingi, kuti ukayeyegwe. ¹⁷ Kuyosika nikutakabe kusule amyaaka ilimakumi musanu aabili, Jehova uyogwasya chisi chaTayile, alimwi uyotalika kuchita mamali lubo akuchita mulimo wabumambe, akuyopa mulimo wakwe mubwaami bwanyika yoonse. ¹⁸ Lino imbono zyoonse ziyobikwa kunembo lya Jehova. Tazikoyobambwa pe nikuba kubikkwa muchibambilo, nkambo imbono zyakwe ziyopegwa bakkala mubulemu bwa Jehova alimwi ziyobelesegwa kukwaaba chakuvuzya zilyo akulijanina zisamo zisimide.