¹ Kwambuula atala a Mowabbu. Ikaaka, mansiku amwi Ala wa Mowabbu waabwa akunyonyoonwa; ikaka, mumansiku ngaawo Kkili wa Mowabbu wabwa akunyonyoonwa. ² Bayinka kuntempele, mbantu ba Dibboni bayinka kujulu kukulila; Mowabbu walilila Nebba a Medebba. Yoonse mitwe yabo yakululwa chinkulu azilezu zyoonse zilinyoledwe. ³ Mumigwagwa yabo balizweete masaka; aatala atululi twabo azisamablilo zyabo boonse balalila, akuumbulizika misozi. ⁴ Hesyibboni a Elile bakwilila lugwasyo; muzuzumo wabo wamvwikka kule kusikila ku Jahazi. Aboobo basilumamba baba Mowabbu balalilila lugwasyo; balakankama lwabo beni. ⁵ Moyo wangu ulalilila Mowabbu; basilutwe bakwe bachijila ku Zowali aku Egilati Syelisyiya. Balobutanta akwinka ku Luhiti akuya bukwiila; mumugwagwa waku Hlonayimu balawompolola achilizyo chalunyonyooko lwabo. ⁶ Maanzi a Nimulimu ayuminina, masokwe apusama; zisyu zyapya; takuchikwe mweemvwe abuniini. ⁷ Bwiingi bwabutebuzi mbubatebula babubweza akutaaluka kalonga kapopulasi. ⁸ Kulila kwazulila akuzyunguluka koonse munyika ya Mowabbu; kuwuula kwamvwigwa kule mbuli ku Egilayimu a Bbele Elimu. ⁹ Nkambo manzi Dimoni azwide abulowa; pesi njoyeeta miingi atala Dimoni. Balavu bayojata abo balobokede kuzwa ku Mowabbu abaabo basyeede munyika.