¹ Jehova uyofwida Jakkobbu luzyalo; alimwi uyosala Izilayeli akubaboozya munyika yabo beni. Beenzu bayoliswanizya antomwe ambabo akuyolijatanisya antomwe ambabo akuyobajatanisya beni kung'anda ya Jakkobbu. ² Manyika ayoobeeta kunyika yabo beni. Elyo ng'anda ya Izilayeli iyobatola, munyika ya Jehova mbuli baluumi abanakazi bazike. Bayobaanga abo bakabangide, akuyoyendelezya basikubapenzya. ³ Mubuzuba oobo Jehova mbwayomupa kulyokezya kuzwa kubuusu amapenzi, akuzwa kumilimo miyumu njiwakali kubelesegwa, ⁴ uyoyiimba lwiimbo lwakusampula kumwami wa Bbabbiloni, ''Mbubonya mbuli sikupenzya mbwasika kumamanino, kunyema kwakulisumpula mbukwamana! ⁵ Jehova watyola musako wasizibi, inkoli yabaabo beendelezi, ⁶ aabo bakawuma bantu zyuumo zyalyoonse, aabo bakendelezya manyika mukunyema, alukono lutakasigwi. ⁷ Inyika yoonse yaba mukulyokezya akuumuna; batalika kubotelwa akwiimba. ⁸ Ayilayo minsamu yaku Sipulesi yasekelela atala anduwe antomwe amakkedali aa lebbano; ilaamba kuti, 'Mbulikuti walazikwa aansi, takwe chigonsyo chazisamu chituzida kuzotugonka.'' ⁹ Chikkalilo chabafu chakunsi chilikkede kukutambula eelyo nozoyinka nkuko. Chilakubusizya bafwide, boonse baami banyika, akubachita kuti baami bamaasi boonse. ¹⁰ Bayowambuula boonse akwamba kuti kulinduwe, Áyeebo wakompama mbuli ndiswe waaba mbuli ndiswe. ¹¹ Kulisumpula kwako kwaseluzigwa kuchikkalilo chabafu achikwala chatuntimbwa twako. Imvwinyu zilisalidwe munsi lyako, azilazyo ziyokaansi zilazula alinduwe.' ¹² Waawa buti kuzwa mujulu, ntanda yangu o mwana wangu mulombe wakubuchedo! Wagonkwa biyeni kuyaansi, iwebo niwakazunda maasi! ¹³ Wakaamba mumoyo wako kuti, 'Ndiyotanta kujulu, Ndiyonyampula chuuno changu chabwaami aajulu lyanyenyeezi zya Leza, mumabazu aakunyika. ¹⁴ Ndiyotanta aajulu loko kwiinda mayoba; Ndiyolichita nkakozyanie a Leza Mupati Kampatila.' ¹⁵ Nekuba boobo waselusigwa kuchikkalilo chabfu, kumagolelo amulindi. ¹⁶ Aabo bakubona bayokweebela akuyoswilila kulinduwe. Bayowaamba kuti, 'Sa nguyoyu muntu wakazungaania nyika, iwakateketya bwaami, ¹⁷ iwakachita nyika yoonse kuti ibe mbuli nkanda, iwakavwinyuuna myunzi yayo akukasya baange bakwe kuti biinke kumaanda? ¹⁸ 'Baami boonse bamaasi bonse balooma mubulemu, umwi awumwi mukabanda kakwe mwini. ¹⁹ Pesi ulisowedwe kuzwa kukabanda kako mbuli mutabi uusowedwe. Bafwude balikuvumbide mbuli chisamo, aabo ibakayaswa apanga, ibayinka aansi kumabwe amumulindi. ²⁰ Tokoyoswanizigwa pe ambabo mukuvwikkwa, nkambo wakanyonyoona nyika yako akujaya bantu bako. Ibana babsimuchita zibi tabakoyoyitwa limbi.'' ²¹ Amulibambile bujayi bwabana bakwe, nkaambo kazibi zyabamawisi, aboobo tabakoyobuka pe kukuvuba nyika akyozuzya nyika yoonse amyuunzi. ²² ''Ndiyobuka akubalwiisya''-- aya ngemalayilile a Jehova.''Ndiyogonka kuzwa kuzina lya Bbabbiloni, lunyungu, azyalani - aya ngemalayilile a Jehova. ²³ ''Njowuchita kuti ukavube zipalo, akuba maziba amaanzi, alimwi njomukukula achikukuzyo chalunyonyooko'' -- aya ngemalayilile a Jehova wamakamu. ²⁴ Jehova wamakamu wakakonkezya kuti, ''Nchobeni, mbuli mbundayeyede, chiyoba mbubonya; alimwi mbuli mbundakazibambide, ziyoba mbuboobo: ²⁵ Njopwaya ma Asuli munyika yanu, aajulu azilundu zyangu njomulyatawuka. Elyo ijokwe lyakwe liyogwisigwa kuzwa kulinguwe amikuli wakwe uyoozwa akkuko lyabo.'' ²⁶ Aya ngimabambe abambilidwe nyika yoonse, alimwi eli ndijaanza litandabikilidwe kukulwisya maasi woonse. ²⁷ Nkambo Jehova wamakamu nguwazibamba eezi; ngwani uutamwimikizye? Ijanza lyakwe lyatandabikwa, alimwi ngwani utalibwedezye musule? ²⁸ Mumunyaka oyo mwami Ahazi nakafwa aya makani akasika: ²⁹ Mutabotelwi pe, inywebo moonse noba Filisitiya, nkambo kakuti yakamumya yakatyoka. Nkambo kuzwa kumuyanda wenzoka kulazwa chipile, nkabela michelo yakwe iyooba nzoka nkali iwuluka. ³⁰ Bana bataanzi bakafwaba bayochezya mbelel zyabo mumachezezyo aangu, abachete bayolala chakutayoowa. Ndiyojaya miyanda yabo enzala elyo itakajaye bantu bako boonse ibakasyeede. ³¹ Kolila, omulyango; koomoka, o munzi; moonse muyoyaaya, nobaFilisitiya. ³² Kuzwa kunyika kuyozwa musumpululu wabusi, nkabela takwepe uyozwidilila muchiindi nchabikilidwe. Bayobavwiila biyeni batumwa bayeyonyika?''