¹ Makani alatala a Bbabbiloni, ayo Isaya mwana mulombe wa Amozi ngakatambula. ² Achilundu chitakwe chintu mubike ndembela yachitondezyo, wompolweda mujulu kulimbabo, nyampula kuboko kwako biinke kumilyango yabavubide. ³ ''Ndalayilila basale bangu, ndaambila basinguzu kuti banjile bukkali bwangu--abo basekelela mukuzunda. ⁴ Muzuzumo wamakamumakamu muzilundu, mbuli bantu biingi! Muzuzumo wampyopyongano wamaami mbuli zisi zibungene antomwe! Jehova wamakamu ulikubungania impi yenkondo. ⁵ Bazwa kumanyika akule, kumagolelo ajulu kule, Ngu Jehova azibelesyo zyakwe zyalubeta, kukunyonyoona nyika yoonse. ⁶ Amompoolole, nkambo buzuba bwa Jehova bwabafwifwi, buza alunyonyooko luzwa ku Mupati kampatila. ⁷ Aboobo maboko woonse alengelela chakubula manguzu, amyoyo yayaaya. ⁸ Bayoyoowa; kuchisa azisinto ziyobasikila, mbuli mwanakazi kuchindi chakutumbuka. Bayolanga akugamba umwi awumwi; masyu aabo ayoyaka mbuli mulimo. ⁹ Langa, izuba lya Jehova liza abukali bubi alunyemo lukunka, kuti nyika libetongo akunyonyoona basizibi kuzwa kulinjiyo. ¹⁰ Nyeenyezi zyakujulu abandakutema tabachiyoopi mumuni wazyo. Izuba liyosizigwa nikuba kubuchedo, alimwi mweezi tukoyo munika. ¹¹ Ndiyoopa chisubulo kunyika nkambo kachibi chayo abubi nkambo kabusofwazi bwayo. Ndiyomaninsya kulisumpula kwabaliyanda akuseluzya kulisumpula kwababo balikankayizya. ¹² Ndiyochita kuti baalumi bacheye kwinda ngolide isalala abantu nkatachijaniki mbuli ngolida yaku ofili. ¹³ Aboobo Ndiyochita kuti majulu akankame, alimwi nyika iyoteketesegwa kuzwa kubusena bwayo, abukkali bwa Jehova wamakamu, alimwi mubuzuba bwabukkali bwakwe buyoosya. ¹⁴ Mbuli njelele yavwimwa kana mbuli mbelele yabula mweembeli, umwi awumwi uyopilukila kubantu bakwe akuchijila kunyika yakwe mwini. ¹⁵ Umwi awumwi utakajanike uyojayigwa, alimwi umwi awumwi utakajatwe uyojiigwa apanga. ¹⁶ Atwana twabo tuyopwachuulwa kunembo lyamenso aabo. Maanda aabo ayodilisigwa abanakazi babo bayojatwa chibbalo. ¹⁷ Langa, ndaamba kubusya Medisi kuti abalwisye, tabakoyoyeeya nsiliva, na kubotelwa angolida. ¹⁸ Buta bwabo boyoyasa balombe, tabakoyofwida luzyalo bana batete alimwi tabakoyolanga aluzyalo kubana baniini. ¹⁹ Elyo Bbabbiloni, bwami bweebesi, bubotu bwakulisumpula kwa Chaludiyeni, uyozundwa a Leza mbuli Sodoma a Gomola. ²⁰ Tikoyokkalwa nikuba kuyakwa kuzwa kumazyalani atobela. Ba Alabbi tabachiyoyaki zilawo nkuko, nikuba basikweembela tabakoyoyusisya butanga bwabo nkuko. ²¹ Pele banyama bamusokwe bamunkanda bayolala nkuko. Maanda aabo ayozula zipolo; alimwi mpawo ansya zinoyosotoka nkukooko. ²² Basuntwe bayokwiilila maanda abwaami, alimwi bamwaba mumaanda mebesi. Chiindi chakwe chaba afwiifwi, amazuba aakwe takoyononoka pe.