¹ Nguuli muntu musongo? Nguuli uuzi bupanduluzi bwazichitiko zyabuumi? Busongo mumuntu bumuchita kuti busyu bwakwe bubalangale, alimwi buyumu bwabusyu bwakwe bwasanduka. ² Ndimuchenjezya kuti mubambe makani amwami akaambo kachikonke chaLeza kuti chimukwabilile. ³ Utafwambaani kuzwa kubusyu bwakwe, alimwi utasakwidi makani mabi, nkaambo mwami ulachita kufumbwa nchayanda. ⁴ Ijwi lyamwami lileendelezya, nkaako ngwani utakaambe kulinguwe kuti, ''Ulikuchitaanzi?'' ⁵ Kufumbwa ubamba milayizyo yamwami takoyoojana bubi pe. Moyo wamusongo ulizi zichitika alimwi achiindi chakuchitika. ⁶ Nkaambo woonse makani alijisi kabotu mpindu achiindi chakuvwiila, nkaambo bubi bwabantu bwabalemena. ⁷ Tawo naba womwe pe uuzi zitasike kunembo. Ngwani uutamwaambile eezyo zichiza? ⁸ Tawo pe uujisi manguzu akumuzya muuwo, nkinkaako takwe uujisi nguzu mubuzuba bwalufu lwakwe. Takwe lulekelelo chiindi chankondo, alimwi bubi tabukonzyi kuvuna aabo bazike kulimbubo. ⁹ Ndakazinanzelela zyoonse eezi; ndakabika moyo wangu kumilimu yoonse iichitwa aansi azuba. Kuli chiindi muntu nayendelezya muntunyina kukumubisizya. ¹⁰ Aboobo ndakabona basizibi mbubakazikwa chaantanganana. Bakabwezegwa kuzwa kubusena busalala akuzikwa alimwi bakalumbilizigwa abantu bamudolopo oomu nkubakali kuchitila milimu yabo mibi. Eezyi azilazyo nzyabuyo. ¹¹ Eelyo lubeta lwamilimu mibi nilwatachitwa, myoyo yabantu ilakakatila kuchita zibi. ¹² Nikuba kuti sizibi ulabisya zyiindi zili mwaanda akupona chiindi chilamfu, pesi ndilizi kuti bayowa Leza bayooba kabotu, kulibaabo bayimikila kunembo lyakwe akumutondezya lulemeko. ¹³ Pesi tazikoyooyenda kabotu kulisizibi; buumi bwakwe tabukotoolansigwa pe. Mazuba aakwe alimbuli mweenzule wiinda kaambo talemeki Leza pe. ¹⁴ Kulichimwi chintu chabuyo chilokuchitika aansi: kuli bantu basalali bajana eezyo basimuchitazibi nzibeelede, alimwi alimwi nkubali basizibi basikiwa bulumbu bweelede baluleme. Ndakati eechi achilacho nchabuyo. ¹⁵ Nkaambo kaako ndatembawula kukondwa, nkaambo muntu takwe chintu chibotu ansi ano kwiinda kuti alye akunywa akusekelela. Nkubotelwa kukalilila mulinguwe mumilimo yakwe mazuba woonse aabuumi bwakwe Leza ngamupede ansi aazuba. ¹⁶ Nindakabika moyo wangu kukuziba busongo akumvwisya makani aachitika ansi aano, milimo iichitwa kabatawoni neliba sikati naaba mansiku, ¹⁷ mpawo ndakabona milimo yoonse yaLeza, alimwi kuti muntu takonzyi kumvwisya milimo yoonse iichitwa ansi aazuba. Nikuba kuti muntu wabeleka loko mukulingula kwakwe, takonzyi kubumvwisya. Nikuba kuti muntu musongo wasyoma kuti ulizi takonzyi kumvwisya pe.