¹ Izina bbotu ndibbotu kwinda mafuta aadula, alimwi buzuba bwakufwa mbubotu kwinda buzuba bwakuzyalwa. ² Nchibotu kuya kung'anda yakoomoka kwinda kuya kung'anda yakupobola, nkambo koomoka kusikila bantu boonse kumamanino aabuumi, aboobo bantu bapona belede kuchibika mumoyo. ³ Kuusa nkubotu kwinda luseko, nkambo musule kwakuusa kwabusyu kusika kwakubotelwa kwamoyo. ⁴ Myoyo yabasongo ilimung'anda yakoomoka, pesi myoyo yabafubafuba ili mung'anda yakupobola. ⁵ Chilikabotu kuswilila kulutapatilo lwamusongo kwinda kuswilila lwiimbo lwabafubafuba. ⁶ Nkambo chili mbuli insasi zyamamvwa ziyaka aansi achilongo, mbombubo alimwi luseko lwabafubafuba mbulubede. Echi achilacho nchabuyo. ⁷ Kunyansya kufubaazya muntu musongo, mpawo masinkamulomo alabijisya moyo. ⁸ Mamamanino amakani aalimbubo kwinda masangunino; alimwi bakazika moyo mumuuya balimbubo kwinda balisumpula mumuuya. ⁹ Utafwambi kunyema mumuuya wako, nkambo lunyemo lukkala mumyoyo yabafubafuba. ¹⁰ Uutaambi kuti, ''Nkaambonzi mazuba achiindi mabotu kwinda eezi?'' Nkambo takweensi kuti nkambo kabusongo kuti ubuzye mubuzyo ooyu. ¹¹ Busongo, mbuli lukono, mbubotu. Bulagwasya aabo babona zuba. ¹² Nkambo busono bupa lukwabililo mbuli mali mbinga ilapa lukwabililo, pesi kugwasya kwaluzibo nkuti busongo bupa buumi kuli yooyo uli aabo. ¹³ Bona inchito zya Leza: Ngwani uunga ulalulamika chimwi nchakapanga kachipilingene? ¹⁴ Ziindi nizili kabotu, pona chakusekelela mubotu oobo, pesi naa zyiindi nzibi, yeeya eechi: Leza waka zizumizya kuti zibewo mbazu ambazu. Nkambo kacheechi, takukwe uumwi uyoyanduula kufumbwa chili eecho chiboola musule lyakwe. ¹⁵ Mubuumi bwangu bwabuyo ndakabona zyoonse. Kuli muntu ululeme ufwa nekuba kabululami bwakwe, alimwi kuli muntu sizibi upona buumi bulamfu nekuba kazibi zyakwe. ¹⁶ Utalisalazyi lwako, musongo mumenso aako. Nkamboonzi notalinyonyoone lwako? ¹⁷ Utabi sizibi loko naa mufubafuba. Ulafwidaanzi chiindi chako kachitana zulila? ¹⁸ Nchibotu kuti ujatilile abusongo oobu, mpawo utalekeleli bululami bukuzwe. Nkambo muntu woonse uyoowa Leza uyobuzuzikizya nzyayelede kuchita. (mukwinda kuti uyobuswania boonse buyumuyumu bwakwe, bansandululo zyingi zyachiindi zijisi bupanduluzi busiyene bwachibalo chiyumu echi). ¹⁹ Busongo bulanguzu mumuntu musongo, kwiinda bendelezi balikkumi mumunzi. ²⁰ Takwe muntu ululeme munyika uchita chibotu mpawo atakwe naabisya. ²¹ Utaswilili kulilyonse ijwi lyambulwa, nkambo nga ulamvwa muzike wako kakutukila. ²² Mbukukozyenie, lwako ulizi kabotu kuti kuzyiindi zyingi wakatukila mumoyo wako. ²³ Choonse echi ndachilungula abusongo. Ndamba kuti, ''Ndiyoba musongo,'' pesi chalikwinda mbundalelede kuba. ²⁴ Busongo bulikule loko akunika loko. Ngwani unga ulabujana? ²⁵ Ndakabika moyo wangu kukwiiya akukulingulula akuyanduula busongo abulunguluzi bwanchoonzyo, mpawo akumvwisisya kuti bubi mbufubafuba akuti bufubafuba mbusondosi. ²⁶ Ndakajana kuti chilula loko kwinda lufu mwanakazi nekuba ngwani ulamoyo uzwide tukole atunsabwe, mpawo ulamanza anketani. Kufumbwa uubotezya Leza uyoyokoka, pesi sizibi uyojatwa anguwe mwanakazi. ²⁷ ''Bikkila manu kulinzindakabona,'' mbwaamba muyiisyi. '''Ndalikuyungizya chimwi nchindabona kuli chimwi kuti ndijane bupanduluzi bwanchoonzyo. ²⁸ Eechi nchicho nchendili kuyaanduula, pesi tendachijana pe. Ndajana mwalumi umwi ululeme akati kabali zyuulu, pesi mwanakazi tendamujana pe akkati kabaabo. ²⁹ Ndakabbutula eechi biyo: Leza wakalenga bantu kabaluleme, pesi bakazwa bakaya kule kukuyanduula zyiingi zikatazya.''