¹ Kuli bubi mbundakabona aansi anyika alimwi bulemena bantu. ² Leza ulakonzya kupa buvubi, bunoti abulemu kumuntu kuti atabuli chintunchayandisya, pesi mpawo Leza tamupede nguzu zyakuti abotelwe. Pesi umwi ulabelesya zintu zyakwe. Eechi nchabuyo alimwi ndupenzyo lupati. ³ Na mwaalumi wazyala bana bali mwaanda alimwi wapona minyaka miingi kuchitila kuti mazuba aaminyaka yakwe avula, pesi na moyo wakwe tewakkutisikana pe azibotu alimwi taazikwa pe, mpawo ndaamba kuti mwana wazyalwa kafwide ulimbubo kwiinda mbuli mbabede wenya. ⁴ Ooyu mwana ulizyedwe kali wabuyo alimwi uliinda mumudima. Izina lyakwe lilayinda mumudima. ⁵ Nikuba mwana ooyu taabona zuba nikuba kuziba chintu, walyookezya nikuba muntu ooyo takwe nchabona. ⁶ Nikuba muntu wapona kwaminyaka iili zyuulu zibili pesi tayelede kuyiya kuti anoneezegwe zintu zibotu uliinka kubusena bomwe mbubonya mbuli umwi awumwi. ⁷ Yoonse milimu yamuntu njamulomo, pesi chiyandisyo chakwe tachikkutisiki pe. ⁸ Nchobeni, mbubotuunzi musongo mbwali aabo aatala amufubafuba? Mbubotuunzi untu muchete mbwali aabo na waziba kuchita kunembo lyabamwi bantu? ⁹ Eecho linso nchilibona nchibotu kwiinda eecho muuya nchuyanduula. Eechi achilacho nchabuyo - mbuli kwaandila muuya. ¹⁰ Kufumbwa chipona chakalipedwe kale zina lyacho alimwi muntu mbabede wakalizibinkene kale. Aboob chaba chabuyo kuti muntu akazyanie awumwi uuli aanguzu mpati uubeteka boonse. ¹¹ Bwiingi bwamajwi mbwabede mbobwiingi bwazyabuyo. Mbubotuunzi oobo kumuntu? ¹² Nkaambo ngwani uzi bubotu bwamuntu mubuumi, mumazuba mache aabuyo ulayinda mbuli cheenzule? Ngwani unga ulaambila muntu chiyochitika aansi aazuba musule kali wayinda?