¹ Alimwi ndakayibalukwa aatala akupenga koonse ooko kuchitika aansi aazuba. Mpawo ndakabona, misozi yabantu bapenzegwa, alimwi tebakali asikubawumbulizya pe! Inguzu zyakali mujanza lyaba sikubapenzya babo, mpawo tekwakali uumwi wakaubawumbulizya! ² Aboobo ndakayeeya kuti aabo bakafwa kale balabotelwa kwiinda bawumi, aabo bachipona. ³ Nikuba boobo, ubotelwa kwiinda boonse ngooyo umwi uutana kupona, uumwi ooyo uutana kubona kufumbwa milimo yanchito imbi eezyo zichitika ansi azuba. ⁴ Eelyo ndakabona inchito yoonse yamulimo amaanu woonse amulimo zyakaba bbivwe lyawumwi wasi mabambanwa. Eechi achilacho nchabiyo - mbuli kwandilila luuwo. ⁵ Mufubafuba ulalikumbatila akutabeleka, aboobo chakulya chakwe mubili wakwe. ⁶ Pesi nkankamaanza yaluumuno nimbotu kwiinda nkankamaanza zibili zili amulimo oyo wakwezya kweembela luuwo. ⁷ Ndakapiluka mpawo ndakabona chimwi chintu chabiyo aansi aazuba. ⁸ Kuli uumwi muntu uuli alikke. Tajisi mwenzinyina pe, tajisi mwana mulombe pe naa mwanike, alimwi nekubaboobo mulimo wakwe woonse tuyinki, mpawo menso aakwe taakkuti abuvubi bujanwa. Ulalikatazya kati, ''Nkambo kani nindibeleka boobu akulilesya bubotu?'' Achilacho eechi nchabuyo -- nchitu chibi. ⁹ Bantu babili babeleka kabotu kwiinda uumwi; kabali antomwe balajana muvolo mubotu kumulimo wabo. ¹⁰ Nkambo na umwi wawa, uumwi ulakonzya kubusya mwenzinyina. Nikuba boobo, mawuse alamusikila umwi uuli alikke naawa na takukwe umwi wakumubusya. ¹¹ Naa babili bawona aamwi, balakasalilwa, pesi uumwi ulakasalilwa buti alikke? ¹² Muntu umwi alikke ulakonzya kuzundwa, pesi babili balakonzya kwiminana akulwana, alimwi kakole kayindulwidwe tutatu takafwambani kudunsuka pe. ¹³ Nchibotu kuba muchete pesi koli mulombe musongo kwinda munene amwami mufubafuba uutachizi mbokuswililwalulayo. ¹⁴ Eechi nchakasimpe nikuba mukubusi waba mwami kuzwa muntolongo, naa kufumbwa kali muchete mubwami bwakwe. ¹⁵ Ndakabona bawumi boonse mpawo bakali kweendeenda aansi azuba, antomwe amulombe wakali kunoobuka kuti akabweze busena bwakwe. ¹⁶ Tekwakali kubalika kubantu boonse bakayanda kuswilila mwami mupya, pesi kumamanino baanji babo tabakoyomulumbayizya. Nkasimpe eechi achilacho nchabiyo -- mbuli kwandila luuwo.