¹ Nkambo zintu zyoonse zilibikilidwe chiindi, alimwi makani woonse aansi ezuba ali amazuba aawo. ² Kuli chiindi chakuzyalwa achiindi chakufwa, chindi chakuzikila achindi chakunonkoola zizikidwe, ³ chindi chakujaya avchindi chakusilika, chindi chakumwaya achindi chakuyakulula. ⁴ Kuli chindi chakulila achindi chakuseka, chindi chakoomoka achindi chakuzyana, ⁵ chindi chakusowa mabwe achindi chakubungika mabwe, chindi chakukumbata bamwi bantu, alimwi achindi chakulikasya kukumbata. ⁶ Kuli chindi chakuyanduula zintu achindi chakuleka kuyanduula, chindi chakubamba zintu achindi chakusowa zintu, ⁷ chindi chakudeluula chisamo achindi chakusuma zisamo, chindi chakuumuna achindi chakwambuula. ⁸ Kuli chindi chakuyanda achindi chakusula, chindi chankondo achindi chalumuno. ⁹ Nimpinduunzi simulimo njajana mukubeleka kwakwe? ¹⁰ Ndakabona mulimo ooyo Leza ngwakapa kubantu kuti bawumane. ¹¹ Leza wakabotezya zintu zyonse kuchindi chazyo. Alimwi wakabika boongozi mumyoyo yabo. Pesi bantu tabamvwisisisyi milimo eeyo Leza njakachita, kuzwa kumatalikilo aabo nzila yoonse kusika kumamanino aabo. ¹² Ndilizi kuti takwepe chintu chobotela muntu kwinda kukondwa akuchita bubotu mbubonya kachipona-- ¹³ akuti umwi awumwi welede kulya akunywa, alimwi weelede kumvwisya mbwayelede kujana lukondo mumulimo wakwe. Eechi nchipo cha Leza kubantu. ¹⁴ Ndilizi kuti kufumbwa Leza nchachita chilakkalilila. Taakwe chikonzya kuyungizigwa kulinchicho na kugwisigwa, nkambo ngu Leza wakachichita boobo kuti bantu bakamusikile akumulemeka. ¹⁵ Kufumbwa chiliwo chakaliwo kale; kufumbwa chiyobawo chakaliwo kale. Leza uchita muntu kuti ayanduule zintu zisisikene. ( muchindi chakuti Leza uchita muntu kuti ayanduule zintu zisisikene. Zimwi nsandululo zipandulula keengo aaka munzila zisiyene). ¹⁶ Ndakabona kuti aansi aazuba akali bubi, aawo akeelede bululami, alimwi mubusena bwabusalali, kwakali bubi. ¹⁷ Ndakamba kuti mumoyo wangu, ''Leza nguyobeteka basalali abasizibi kuchindi cheelede nkambo makani woonse amilimo yoonse.'' ¹⁸ Ndakamba kuti mumoyo wangu, ''Leza ulasunka bantu kuti abatondeezye kuti bali mbuli banyama.'' ¹⁹ Nkambo chisikila bana babantu achisikila banyama chilikozyenie. Lufu lwawumwi lulimbuli lufu lwawumbi. Kuyoya kwabo boonse kulikozyenie. Taakwe bubotu kubantu bwinda bwabanyama. Zyoonse nzyabuyo. ²⁰ Zyoonse zilaya kubusena bomwe. Zyonse zizwa kulusuko, alimwi zyoonse zilapiluka kulusuko. ²¹ Ngwaani uzi na muuya wamuntu ulaya kujulu amuuya wabanyama naa ulaya aansi munyika? (zimwi nsandululo zijisi uuzi muuya wabantu, oyo wiinka kujulu, amuuya wabanyama, ooyo wiinka aansi munyika?) ²² Aboobo ndayelensya lubo kuti taakwe chibotela muntu kwiinda kuli botezya mulimo wakwe, nkambo eecho nchaabilo chakwe. Ngwani uunga ulamuboozya kuti azobone eezyo zichitika musule lyakwe?