¹ Tumina chinkwa chako atala amanzi, nkambo uyochijana lubo kunembo kwinda mazuba maanji. ² Chabulule kulibali musanu ababili, nekuba bantu bali musanu abatatu, nkambo tatuzi pe lunyonyoono lusika anyika. ³ Naa mayoba aazwide imvula, atilila anyika, alimwi naa musamu wawida kumusanza naa kunyika, kufumbwa munsamu nkwawida, nkukonya nkuyokkala. ⁴ Oyo webela luuwo teelede kubyala, alimwi webela mayoba telede kutebula. ⁵ Mbuli mbotazi inzila yaluuwo, naa mbozikula zifuwa zyamwana mwida lyawuminsi, (zimwi nsandululo zyachiindi zijisi aa mbuli mbutazi inzila yamuuya kuzifuwa zyamwana mwida lyawuminsi) aboobo alimwi tokonzyi kumvwisisisya mulimu wa Leza, wakalenga zyoonse. ⁶ Muchifumo byala mbuto yako, kusika goko, beleka amanza aako mbuli mbochiyandika, nkambo tozi pe chiyozwidilila, ngakulaba chifumo naa mangolezya, naakuti eechi naa echiya, naakuti zyoonse zikozyenie ziyoba zibotu. ⁷ Nchoonzyo mumuni ulabotezya, alimwi chintu chibotu kumenso kuti abone zuba. ⁸ Naa umwi wapona myaka miinji, muleke abotelwe muli zyoonse, pesi ayeeye atala amazuba amudima aboola; nkambo anoli manji. Zyonse ziboola nzyabuyo. ⁹ Bweza lukondo, nomukubusi, mubulombe bwako, alimwi chita moyo wako kuti ukondelelwe mumazuba abukubusi bwako. Yanduula ziyandisyo zibotu yanda moyo wako alimwi kufumbwa chili mukuboneka amenso ako. Nekubaboobo, ziba kuti Leza uyokweta mulubeta nkambo kanzizeezi zyonse zintu. ¹⁰ Gwisya lunyemo mumoyo wako mpawo utalikatazyi kufumbwa zichisa mumubili wako, nkambo bukubusi anguzu zyabo nzyabuyo.