¹ Alubo koyeeya mulengi wako mumazuba abukubusi bwako, mazuba amapenzi naatanasika, amyaaka nitana kusika noyowamba kuti, ''Nsichibotelwi mulimbabo''; ² muchite eechi musule amumuni wazuba amweezi anyenyeezi nizitana kusiya, alimwi mayoba asiya naatana kubweeda niyamana imvula. ³ Nchenchicho chiindi basikulinda ing'anda yamwami nibazobbila, alimwi baalumi basinguzu nebazoongomana, abasikuziya nebazoleka nkambo kakucheya, abaabo basondela kuzipulo nibazoosiilwa. ⁴ Ncheechiindi awo milyango niizojaligwa yakumugwagwa, alimwi muzuzumina wakuziya nuzoyimikila, aawo muntu nazobuka kuchindi chakwiimba kwatuyuni, alimwi basimbi basikwimba majwi abo azomana. ⁵ Nchenchicho chiindi aawo bantu nebayoyoowa chilundu chilamfu akuyoowa kweenda mumugwagwa, alimwi musamu wa Alumondi nuuzosyuka, mpawo idingo nilizokokoba, alimwi munsamu wakubusya tuuchibeleki. Mpawo muntu ulaya kuchikkalilo chakwe abasikulila balendeenda mumigwagwa. ⁶ Koyeeya mulengi wako intambo yansiliva nitana kudunsuka, naa mutiba wangolide nuutana kupwayika, naa chitesyo nechitana kufwa kuchikkala, ⁷ lusuko kalutana kupiluka kunyika mbubwakabede, alimwi muuya muuyopiluka kuli - Leza wakupede. ⁸ ''Nzyabuyo! Nzyabuyo! mbwaawamba Muyiisyi. ''Zyoonse nzyabuuyo!'' ⁹ Muyiisyi wakali musongo, wakachili kuyiisya bantu luzibo. Wakayeeya akulinguula akubamba tusimpi tunji. ¹⁰ Muyiisyi wakali kuyaanduula akulemba majwi aabotezya, wakaliluleme kukulemba majwi alusinizyo. ¹¹ Majwi abasongo alimbuli zibinzyo. Mbuli manembe akankamidwe atusimpi tuyobolwedwe, ntwamweembeli umwi. ¹² Mwanangu, chenjela kuzintu azimwi kutali eezi. Kulemba mabbuku manji takumani, alimwi kwiiya kunji kwakataazya mubili. ¹³ Mamanino atwambo kunembo ngakuti zyoonse zyamvwigwa, nkukuti lemeka Leza akubamba milazyo yakwe, nkambo kuchita oobo nchelelo choonse chamuntu. ¹⁴ Nkambo Leza uyobeteka milimo yoonse, amakani woonse asisidwe, naaba mabotu naaba mabi.