¹ Mpawo mwami wakatumina batumwa aabo bakabungana kuli nguwe boonse bapati ba Juda aba Jelusalemu. ² Eelyo mwami wakatanta kung'anda ya Yahuwe, abantu boonse ba Juda aboonse bakakkede mu Jelusalumu anguwe, abapayizi, abasinsimi, abantu boonse, kuzwa kubanini kusika kubapati. Wakababalila kabamvwide woonse majwi abbuku lyachizuminano ilyakajanwa mung'anda ya Yahuwe. ³ Mwami wakayimikila kuchilende watanga chizuminano kubusyu bwa Yahuwe, chakutobela Yahuwe achakubamba milumbe yakwe, amilawo yoonse, akuzuzya majwi achizuminano chilembedwe mubbuku eeli. Abalo boonse bantu bakazumina chizuminano. ⁴ Mwami wakalayilila Hilikkiya mupayizi mupati, bapayizi balansi anguwe, abasikulanga mulyango kuti bagwisye muntempele ya Yahuwe zyoonse zibelesyo zyakachitilwa Bbaala a Asyela, azyoonse nyeenyezi zyakujulu. Wakazitenta aanze a Jelusalemu mumyunda mu Kkidiloni atwe lyazyo wakazitola ku Bbeteli. ⁵ Wakabagwisya bapayizi bamituni bami ba Juda mbibakasalide kuti batente tununkilizyo kuzipayililo mumasena atantukide mumyunzi ya Juda amumasena ayengelede a Jelusalemu - ababo ibakali kutenta tununkilizyo kuli Bbaala, kuzuba amweezi, akumakamu, azyoonse nyenyezi zyakujulu. ⁶ Wakagwisya anze isyamu lya Asela chakali mung'anda yakukombela ya Yahuwe, aanze a Jelusalemu kumumpata wa Kkidiloni akuchitenta nkukonya ooko. Wachipwayula mane kwasyaala lusuko alusuko lwacho wakalusowa kutubanda twabantu bazibinkene. ⁷ Wakamwaya maanda abaalumi basibwamu akali mung'anda ya Yahuwe, banakazi mobakali kupesela masani a Asyela. ⁸ Josiya wakagwisya bapayizi boonse mumyunzi ya Juda akusofwazya zipayililo zyamasena atantukide bapayizi nkubakali kutenta tununkilizyo, kuzwa ku Gebba akusikila ku Bbeelisebba. Wakamwaya zipayililo zyakumilyango izyakali kumanjililo aa Josuwa (mulangi wamuunzi), kujanza lyalumweensi kumulyango wamunzi. ⁹ Nekubaboobo bapayizi bazipayililo zyamasena atantukide bakakasigwa kubeleka kuchipayililo cha Yahuwe mu Jelusalemu, bakali kulya zyuka zitakwe bumena akkati kababunyina. ¹⁰ Josiya wakasofwazya Tofeti, eyo ilimu Mumpata wa Bbeni Himoni, kuti kutabi muntu utenta mwanakwe mulombe nekuba musimbi mumulilo kukupayizya Moleki. ¹¹ Wakagwisya mabbiza aayo bami ba Juda ngibaka pede kuzuba. Bakali kumbali amanjililo ang'anda yakukombela Yahuwe, afwifwi ang'n ya Natani-Meleki, muzibe. Josiya wakazitenta inkalaki zyazuba. ¹² Josiya mwami wakazityolola zipayililo nzibakayakide zyaatala lyang'anda ya Ahazi, eezyo bami ba Juda nzibakayakide, zyoonse zipayililo Manase nzyakayakide mumbanza zyobile zyang'anda ya Yahuwe, Josiya wakazityolola mutumpanzi mpanzi akuzisowela mumumpata wa Kkidiloni. ¹³ Mwami wakanyonyoona zipayililo zyamasena atantukide izyakali kujwe lya Jelusalemu, kumusanza lyachilundu chalunyonyooko Solomoni mwami wa Izilayeli nzyakayakilila Asitoleti, chisesemyo chaba Sidoni; cha Kkemosi, chisesemyo cha Mohabbu; a Milikkomu, chisesemyo chabantu ba Amoni. ¹⁴ Wakapwaya misemo yamabwe mutumpandu mpandu akutema zisamu zya Asela akuzuzya mumasena moonse zifuwa zyabantu. ¹⁵ Alubo Josiya wakamaninsizya kutyolola chipayililo ichakali cha Bbeteli achalo amasena atantukide ayo Jelobbowamu mwana mulombe wa Nebbati (oyo wakachita kuti Izilayeli ibisye) nchakayakide. Wakachitenta eecho chipayililo achalo amasena akatantukide wakachipwaya kwasyala lusuko. Wakatenta alimwi isyamu lya Asela. ¹⁶ Mbubonya Josiya nakachebuka, wakabona tubanda itwakali ooko kulubbazu twachilundu. Wakatuma bantu kuti bagwisye zifuwa omo mutubanda; mpawo wakazitenta achipayililo, aboobo wakachisofwazya. Mbubonya mbuli ijwi lya Yahuwe ndyakaamba muntu wa Leza, iwakasinsima aaya makani katana chitikana. ¹⁷ Mpawo wakabuzya kuti, ''Ino nchinzi echiya chimikide nchendibwene?'' Bantu bamunzi bakamwambila kuti, ''Nkekabanda kamuntu wa Leza wakazwa muchisi cha Juda akusinsima makani aya ngochitide okuno kuchipayililo cha Bbeteli.'' ¹⁸ Mpawo Josiya wakati, ''Bamuleke.kutabi uputanya zifuwa zyakwe.'' Aboobo bakaleka zifuwa zyakwe, azifuwa zyamusinsimi oyo iwakazwa mu Samaliya. ¹⁹ Mpawo Josiya wakatugwisya maanda wonse amasena atantukide amumyunzi yamu Samaliya, baami ba Izilayeli ngibakayakide, achakukalazya Yahuwe. Wakatuchitila mbubonya mbwakachitila ku Bbeteli. ²⁰ Wakajaya bapayizi boonse bazipayililo zyamasena atantukide akutenta zifuwa zyabantu alinzizyo. Eelyo wakapiluka ku Jelusalemu. ²¹ Mpawo mwami wakalayilila bantu boonse, kuti, ''Amulye ipobwe lyakwindilila chakusekelela a Yahuwe Leza wanu, mbubonya mbukulembedwe omu mubbuku lyachizuminano.'' ²² Mbuli ipobwe lya kwindilila talikwe nilyakabambwa obo kuzwa kumazuba alya babetesi nibakali kwendelezya ba Izilayeli, nimuba mumazuba wonse aabami ba Izilayeli naba Juda. ²³ Pesi mumwaka wakkumi amusanu ayitatu lyamwami Josiya ipobwe eeli lyakwindilila lya Yahuwe lyakasekelelwa mu Jelusalemu. ²⁴ Alimwi Josiya wakaziminganya zikozyanyo zyamizimu azikozyanisyo. Wakaziminganya zisesemyo zyoonse zyakaboneka muchisi cha Juda amu Jelusalemu, kuti azuzikizye majwi amulawo alembedwe mubbuku Hilikkiya mupayizi ndyakajana mung'anda ya Yahuwe. ²⁵ Musule lya Josiya, katakwepe mwami naba womwe iwaka mutangunina iwakelene anguwe, kukupiluka kuli Yahuwe chamoyo woonse, chamiyeeyo yakwe yoonse, achanguzu zyakwe zyoonse, wakatobela mulawo wa Mozesi. Alimwi kakutakwe naba womwe mwami iwakamutobela chakwelana a Josiya. ²⁶ Nekubaboobo, Yahuwe takwe nakaleka bukali bwakwe bupati, mbwaka kalalila ba Juda nkambo zyoonse zyakachita Manase zyakamunyemya. ²⁷ Mpawo Yahuwe wakati, ''Njobagwisya ba Juda kuzwa kubusyu bwangu, mbubonya mbundakagwisya ba Izilayeli, alimwi njosowa munzi ngundakasalide, Jelusalemu, ang'anda njindakaamba kuti, ''Izina lyangu moliyokkala mulinjiyo.'' ²⁸ Makani amwi a Josiya, anchito zyakwe zyoonse, sa talembedwe mubbuku lyamakani achiindi aabami ba Juda? ²⁹ Mumazuba akwe, Falawo Nekko, mwami wa Ijiputi, wakiinka kuyolwana amwami waku Asiliya ku Mulonga wa Yufuletisi.Mwami Josiya wakinka kuyolwisya Nekko, aa Nekko wakamujaya oko ku Megido. ³⁰ Balanda ba Josiya bakaleta mutunta wakwe munkalaki kuzwa ku Megido, bamusiya ku Jelusalemu, bamuzikka mumavwikko aakwe. Mpawo bantu bachisi bakabweza Jehoyazi mwana mulombe wa Josiya, bamunanika mafuta aabwami kuti alye izina lyawisi. ³¹ Jehoyazi kajisi myaaka ili makkumi obile ayitatu nakatalika kwendelezya, nkabela wakeendelezya myeezi iitatu mu Jelusalemu. Izina lyabanyina bakali Hamutala; mwana musimbi wa Jelemiya wa Libbina. ³² Jehoyazi wakachita bubi mumenso a Yahuwe, mbubonya mbuli basikale mbubakachita. ³³ Falawo Nekko wakamwanga ku Lbbina munyika ya Hamati, kuti atendelezyi mu Jelusalemu. Alimwi Nekko wakatezya Juda mutelo amatalenta ansiliva alimwaanda atalenta lyangolida. ³⁴ Falawo Nekko wakabikka Eliyakkimu mwana mulombe wa Josiya kuba mwami kuti alye izina lyawisi, alimwi wakasandula izina lyakwe akumuulika izina lya Jehoyakkimu. Pesi Jehoyazi wakamutolelela ku Ijiputi, nkukonya oko nkwakafwida. ³⁵ Johakkimu wakabbadala nsiliva angolida yoonse kuli Falawo. Kuti azuzikizye kuyanda kwa Falawo, Johakkimu wakatezya bantu bachisi wakaangila bantu bamunyika kuliya kuli nguwe insiliva angolida mbubonya mbuli mbubakafutunkulula. ³⁶ Jehoyakkimu kajisi myaka ilimakkumi obile amusanu nakatalika kwendelezya, mpawo wakeendelezya myaka ili kkumi alimwi mu Jelusalemu. Izina lyabanyina lyakali Zebbida; mwana musimbi wa Pediya waku Luma. ³⁷ Jehoyakkimu wakachita bubi mumenso a Yahuwe, mbubonya mbuli basikale bakwe mbubakachita.