¹ Manase wakajisi myaka ili kkumi ayibili nakatalika kwendelezya; wakendelezya myaka ili makumi osanwe amusanu mu Jelusalemu. Izina lyabanyina bakali Hefizibba. ² Wakachita bubi mumenso a Jehova, mbuli zisesemyo zyamunyika ezyo Jehova mbakatanda kubusyu bwabana ba Izilayeli. ³ Nkambo wakayakulula zipayililo zya Manase atantukide Hezekkiya wisi nzyaka mwayide, alimwi wakayakila Bbala zipayililo, kuchita zisamu zya Asela, mbubonya Ahabbu mwami wa Izilayeli mbwakachita, akukotamina zyoonse nyenyeezi zyakujulu akuzikomba. ⁴ Manase wakayaka zipayililo mung'anda ya Jehova, nikuba kuti Jehova wakali waamba kuti, ''Mu Jelusalemu mwenjobikka izina lyangu kwalyoonse.'' ⁵ Wakayakila nyenyeezi zyoonse zyakujulu zipayililo mumbazu zyobile zyang'anda ya Jehova. ⁶ Wakayinzya mwana wakwe mulombe mumulilo, wakachita zyabusondi akubelesya basibusangu abalozi akwambula abakafwa abaabo bakali kwambula amyuuya mibi. Wakachita milimo miinji mumenso aa Jehova, yakumukalazya. ⁷ Chikozyanio cha Asyela nchakachitide, wakachibikka mung'anda ya Jehova njakaambila David a Solomoni mwana wakwe mulombe; wakali wati: ''Mung'anda eyi amu Jelusalemu, njindakasala kuzwa kumisyobo ya Izilayeli, kuti mwenjobikka izina lyangu mane kukabe akutamani. ⁸ Nsikoyo tuntulisya limbi pe mawulu abana ba Izilayeli kuzwa munyika eeyi njindakabapa kuli basikale babo, na banzika myoyo yabo kukuchita zintu zyoonse nzindibalayilila, akutobelezya yoonse milawu yangu eeyo Mozesi mulanda wangu njakabalayilila.'' ⁹ Pesi bantu takwe pe nibakaswilila, a Manase wakabapambusya akubachitya bubi kwinda nyika ezyo Jehova nzyakanyonyweede kubusyu bwabantu ba Izilayeli. ¹⁰ Mpawo Jehova wakaamba kumilomo yabalanda bakwe basinsimi, kuti, ¹¹ ''Nkambo Manase mwami wa Juda mbwachita zisesemyo ziliboobu, alimwi wakachita bubi kwinda ba Amoli boonse abo bakamutangunina ambwakachitya ba Juda zibi kumituni yakwe, ¹² nkinkako Jehova, Leza wa Izilayeli, waamba echi: Amulange, njoletela Jelusalem a Juda bubi bugambya kuti kufumbwa uswilila, matwi aakwe woonse obile alapakamana. ¹³ Njololweda Jelusalemu cheelesyo cha Samaliya, achipimyo, achipimyo chang'anda ya Ahabbu; njopukuta Jelusalemu chakusalala, mbubonya muntu mbwapukuta mutiba, ulupukuta akusandamuna aansi . ¹⁴ Ndiyosowa bantu bachaabilo changu bachisyeede akubaaba mumaanza aabasinkondonyina. Bayosalwa akunyonyoonwa kuli basinkondonyina bonse, ¹⁵ nkambo bachita bubi mumenso aangu, alimwi bandikalazya, kuzwa kuchindi choonse akuzwa kubuzuba boonse ouya nindakagwisya basikale munyika ya Ijipita, kusikila buzuba bwasunu.'' ¹⁶ Mukuyungizya, Manase wakatila bulowa bwabantu banji ibakatajisi mulandu, mane wakazuzya Jelusalemu bulowa kuzwa kumagolelo aamwi akusikila kumagolelo aambi alufu. Echi chakali atala lyazibi nzyakachitya ba Juda mukuchita bubi, nibakachita bubi mumenso a Jehova. ¹⁷ Makani amwi aa Manase, azyonse nzyakachita, azibi zyakwe nzyakabisya, sa tazilembedwe mubbuku lyamakani achindi abbaami ba Juda? ¹⁸ Manase nakoona wakazikwa muchilili chang'anda yakwe, muchilili cha Uza. Amoni mwana wakwe mulombe nguwakaba mwami mubusena bwakwe. ¹⁹ Amoni wakajisi myaka ili makkumi obile ayibili nakaba mwami; wakeendelezya myaka yobile mu Jelusalemu. Izina lyabanyina bakali Musulemeti; wakali mwana musimbi wa Haluzi waku Jotibba. ²⁰ Wakachita bubi mumenso aa Jehova, mbubonya Manase wisi mbwakachita. ²¹ Amoni wakeenda munzila eyo njiyoonya njakeenda wisi akukomba mituni njakali kukomba wisi akwikotamina. ²² Wakasiya Jehova, Leza wabamawisi, alimwi takwepe nakeenda munzila ya Jehova. ²³ Balanda ba Amoni bakamuvwiya akujaya mwami mung'anda yakwe. ²⁴ Pesi bantu benyika bakajaya bantu abo ibakavwiya mwami Amoni, alimwi bantu bakabikka Josiya mwana wakwe mulombe kuba mwami muchibaka chawisi. ²⁵ Makani amwi a Amoni anchito zyakwe, sa tazilembedwe mubbuku lyamakani achiindi abaami ba Juda? ²⁶ Bantu bakamuzika mumavwikko aakwe muchilili cha Uuza, alimwi Josiya mwanakwe mulombe wakaba mwami mubusena bwakwe.