¹ Chakaba kuti mwami Hezekkiya naakamvwa impuwo yako, wakazapawula zisamo zyakwe, walivumba zisamo zyamasaka akunjila mung'anda ya Jehova. ² Wakatuma Eliyakkimu, wakali mupati wang'anda, a Syebbina mulembi, abapati baba payizi, boonse bakasama zisamo zyamasaka, kuli Isaya mwana mulombe wa Amozi, musinsimi. ³ Bakamba kuti kuli nguwe, ''Hezekkiya waamba kuti, 'buzuba oobu mbuzuba bwamapenzi, mbwakutapatilwa abwakuusa nkambo bana basika kuchindi chakutumbukwa, pesi taakwe inguzu zyakuti bazyalwe. ⁴ Ambweni Jehova Leza wanu uyoomvwa majwi woonse amupati wampi, oyo mwami wa Asiliya simalelo wakwe ngwakatuma kuti asampawule Leza muumi, akutapatila majwi aayo Jehova Leza wako ngaakamvwa. Lino tansya chikombyo chako chakujulu chabantu abo bachili okuno.'' ⁵ Mpawo balanda bamwami Hezekkiya bakaza kuli Isaya, ⁶ alimwi Isaya wakamba kuti kuli mbabo, ''Wamba kuti kuli simalelo wako: 'Jehova wamba kuti, ''Mutayoowi majwi aayo ngwakamvwa abalanda bamwami wa Asiliya ngibatukizya ndime. ⁷ Bona, ndiyobika muuya muli nguwe, mpawo uyomvwa mpuwo akubweda kuchisi chakwe. Ndiyo muchita kuti akawe apanga munyika yakwe.'' ⁸ Eelyo mupati wampi wakabwenda, aakujana mwami wa Asiliya ulalwisya Libbina, nkambo wakamvwide kuti mwami wakeenda kuzwa Lakkishi. ⁹ Mpawo Sanakkelibbu wakamvwa kuti Tihakka mwami waku Kkushi aku Ijiputi wasungilizya kuzomulwisya, elyo wakatuma batumwa alimwi kuli Hezekkiya amakani: ¹⁰ ''Ukatedi kuli Hezekkiya mwami wa Juda, 'Utakaleki Leza wako ngosyoma akweene, akwamba kuti, ''Jelusalemu tikoyowabwa mumaanza amwami wa Asiliya.'' ¹¹ Bona, mwakamvwa eecho baami ba Asiliya nzibakachita kunyika zyoonse, akuzinyonyoona chakumaninina. Aboobo muyovunwa na? ¹² Sena baleza bazisi bakabavuna, zisi eezyo bamatata nzibakanyonyoona: Gozani, Halani, Lezfu, alimwi abantu baku Edeni mu Telu Asa ? ¹³ Balikuli bami ba Hamati, mwami wa Apadi, mwami wamyunzi a Sefavayimu, waku Hena, antomwe a Ivah?'' ¹⁴ Hezekkiya wakatambula lugwalo oolu kuzwa kubatumwa akulubala. Eelyo wakatansya kung'anda ya Jehova akulubbampanuna kunembo lyakwe. ¹⁵ Eelyo Hezekkiya wakakomba kunembo lya Jehova akwamba kuti, ''Jehova wamakamu, Leza wa Izilayeli, webo nukkede atala lyamakkelebbimu, nduwe Leza olikke ataata abwami boonse bwanyika. Wakachita majulu anyika. ¹⁶ Kochenjeka kutwi kwako, Jehova, alimwi akuswilila. Jula menso ako, Jehova, akubona akumvwa majwi a Senakkelibbu, aayo ngakatumina kukuniaka Leza muumi. ¹⁷ Nchobeni, Jehova, bami ba Asiliya banyonyoona zisi anyika zyabo. ¹⁸ Bakabikka baleza babo mumulilo, nkaambo tebakali baleza pe pesi milimo yamanza abantu, zisamu amabwe. Aboobo ba Asiliya bakabanyonyoona. ¹⁹ Lino mpawo, Jehova Leza wesu, tuvune swebo, tuvune ndakulayilila, kuzwa munguzu zyakwe, kuti bwami boonse bwaansi buzibe kuti, nduwe Jehova, Leza alikke.'' ²⁰ Elyo Isaya mwana mulombe wa Amozi wakatumina mulumbe kuli Hezekkiya, lyakuti, ''Jehova, Leza wako wa Izilayeli wakamba kuti, 'nkaambo wakakomba kuli ndime atala Senakkelibbu mwami wa Asiliya, ndakumvwa. ²¹ Eeli ndyejwi elyo Jehova ndyakambuula atala anguwe: Nakalindu mwana musimbi wa Ziyoni wakasampawula akukuseka chakuusya bweeme. Mwana musimbi wa Jelusalema waguna guna mutwe wakwe kuli nduwe. ²² Ooyo ngwakasampawula akutukila na? Atala aani ngusumpwida ijwi lyako akututulwida menso mukuliyanda. Aatala Uusalula Omwe wa Izilayeli ! ²³ Kumulomo wabatumwa bako Mwami, alimwi wakaamba kuti, ''Ankalaki zyangu nzyingi ndakatanta azyo ataala azilundu, kumajinkilo a Lebbanoni. Ndiyotemena ansi minsamu milamfu yamusiida amisamu yamisayipulasi misale. Ndiyonjila mumabazu aayo alikule, lusaka lwalo luzyalisya michelo. ²⁴ Ndakasya zikkala akunywa maanzi abuzwa kule ndakayuminizya milonga yoonse ya Ijiputi aansi andyasyo zyamawuulu aangu.' ²⁵ Sena tewakamvwa mbuli mbundakakanzide chiindi. Akubamba chindi akuchibeleka muzyindi zyakale. Lino ndachileta kuti chinde. Uli ano kuti uchesye myunzi ibayilidwe ibe zilwi zyamatongo. ²⁶ Bakkali bayo, banguzu ziche, balakankama akufwa bweme. Babazizikki mumuunda, bwizu bwakamweemvwe, bwizu buli atala lya achiluli nikuba buli mumuunda, bwakawumpa kabutana kulampa. ²⁷ Pesi ndizi mbokkede aansi, kuzwa kwako aanze, akunjila kwako mukati, akukkalala kwako atala andime. ²⁸ Nkambo kabukali bwako atala am=ndime ankaambo kabukali bwandisikila mumatwi aangu, ndiyobika kalobyo mumpemo yako, alubulo lwangu mumulomo wako; ndiyokuboozya munzila eeyo njwakaza ayo.'' ²⁹ Echi chiyooba chitondezyo chako: Mwaka oyu uyoolya zikula musokwe, alimwi mumwaaka wabili ezyo zikomena kuzwa mumo. Pesi mumwaka watatu welede kubyala akutebula, muyobyala muunda wamasansa akulya michelo yawo. ³⁰ Abo bakasyala kung'anda ya Juda abo bakafutuka alimwi bayosimpa akuzyala michelo. ³¹ Nkambo kuzwa mu Jelusalemu bacheede bayozwa anze, kuzwa muchilundu cha Ziyoni bakafutuka muchilundu cha Ziyoni bakafutuka bayoobola. Busongo ba Jehova wamakamu buyochita echi. ³² Nkiinkako Jehova waamba oobu atala amwami wa Asiliya: ''Takoyonjila mumunzi uuno nikuba kufusa buuta okuno. Nikuba nga ulaboola kunembo lyacho antobo naa kuyaka chitantilo chabulongo atala anchicho. ³³ Munzila njiyeyi njakaza aayo igokozya na anzila njayozwa aayo; takwe nayowunjila pe munzi oyu - oku nkokuluula kwa Jehova.'' ³⁴ Nkambo ndiyo wukwabilila muunzi oyu akuvuna, nkambo kangu akambo kamulanda wangu Devidi.'' ³⁵ Chakaba kuti busiku obo mungelo wa Jehova wakazwa kuyolwisya zilawu zyaba Asiliya, kujaya 185,000 basilumamba. Eelyo balumi nibakabuka chifumo fumo, mitunta iifwide ililede koonse konse. ³⁶ Eelyo Senakkelibbu mwami waba Asiliya wakazwa mu Izilayeli akuya kumunzi alimwi akukkala ku Ninivi. ³⁷ Mukuya kwachindi mbuli mbwakali kukomba mung'anda ya Nisilokku Leza wakwe, mwana mulombe wakwe Adilamelekki a Salezali bakamujaya apanga. Eelyo Esatahadoni mwana mulombe wakwe mulombe wakaba mwami mubusena bwakwe.