¹ Lino mumunyaka watatu wa Hosiya mwana mulombe wa Ela, mwami wa Izilayeli, mwami wa Juda, wakasanguna kwendelezya. ² Wakali aminyaka ilimakumi aabili amusanu nakatalika kwendelezya, wakendelezya myaka ili mukumi aabili amusanu ayine mu Jelusalemu. Izina lyabanyina wakali Abbija, wakali mwana musimbi wa Zekkaliya. ³ Wakachita kabotu loko kumenso a Jehova, katobelezya zikozyano zya Devidi, sikale wakwe, mbwakachita. ⁴ Wakagwisya masela akujulujulu, wakamwayula minsemo yamabwe, alimwi wakagonkola zisamu zya Asyela. Wakatyolola muzimpanzi inzoka yamukkuba eyo Mozesi njakapangide, nkambo mumazuba aayo bantu ba Izilayeli bakali kutenta tununkilizyo kuli njiyo, chakali kutegwa ''Nehusitani.'' ⁵ Hezekkiya wakali kusyoma muli Jehova, Leza waba Izilayeli, elyo kuzwa nguwe akati abwami boonse bwa Juda tawope wakali mbuli nguwe, nikuba akkati kabaami bakamusanguninide. ⁶ Nkambo wakakatila kuli Jehova. Takwepe nakaleka kumutobela pesi wakabamba malayilile akwe ayo Jehova ngakalayilide Mozesi. ⁷ Aboobo Jehova wakali a Hezekkiya, alimwi kufumbwa nkwakali kwinka wakali kuzwidilila. ⁸ Wakalwisya ba Filisitiya ku Gaza akumigano yakazyungulukide, kuzwa kumaanda malamfu akusompla kuyosika kumyunzi ibayilidwe. ⁹ Mumwaka waane wamwami Hezekkiya, wakali mwaka wamusanu ayibili wa Hosiya mwana mulombe wa Ela mwami wa Izilayeli, Syalumanesa mwami waku Asiliya wakabukila Samaliya kuti ayisinkilizye. ¹⁰ Kumasimpilo amyaaka iitatu bakayibweza, mumwaka wamusanu ayibili wa Hezekkiya, wakali mwaaka wamusanu ayine wa Hosiya mwami wa Izilayeli; munzila njiyeyi Samaliya yakatolwa. ¹¹ Alimwi mwami waku Asiliya wakatola ba Izilayelu ku Asiliya akuyobabika mu Hala, alimwi aku Mulonga Habba mu Gozani, alimwi amuzisi zyaku Medesi. ¹² Wakazichita ezi nkambo tebakatelela kujwi lya Jehova Leza wabo, pesi bakapapila malayilile achizuminano, woonse ayo Mozesi mulanda wa Jehova ngakabalayilide. Bakakaka kuswililila kuli ngawo nikuba kukwachita. ¹³ Kuzwawo mumwaka wakkumi ayine wamwami Hezekkiya, Senakkelibbu mwami waku Asiliya wakalwisya zyoonse zisi zya Juda zyakabaylildwe alimwi wakazitola zyonse. ¹⁴ Aboobo Hezekkiya mwami wa Juda wakatumina ijwi kumwami wa Asiliya, wakali ku Lakkisyi, wakati, ''Ndakakubisizya. Sosoloka kulindime. Kufumbwa nchotabike alindime ndiyochinyumpula.'' Mwami wa Asiliya wakalomba mwami wa Juda kuti ape luliyo lwama talenta alimwaanda aatatu ansiliva amakkumi atatu amatalenta angolida. ¹⁵ Mpawo Hezekkiya wakamupa zyoonse nsiliva ezyo zyakajanika mung'anda ya Jehova amuziyobwedo zya ng'anda yamwami. ¹⁶ Eelyo Hezekkiya wakagonkola ngolide kuzwa kumilyango ya ng'anda yakukombela Jehova kuzwa kuzinchinda zyakayindilide, wakapa ngolida kumwami wa Asiliya. ¹⁷ Pesi mwami wa Asiliya wakasungwazya impi yakwe mpati, wakatuma Tatani a Labbusalisi antomwe asilutwe kuzwa ku Lakkisyi kuyaku Mwami Hezekkiya ku Jelusalemu. Bakatansya munzila mpawo bakasika kunze lya Jelusalemu. Bakasika kulukomba lyakalambwa kaatala, munzila yamuunda wabasikusambala alimwi wakayimikila alinjiyo. ¹⁸ Nibakamvwa kayitwa ku mwami Hezekkiya, Eliyakkimu mwana mulombe wa Hikkiya, oyo wakali sikulanga mpuli, Syebbina mulembi a Java mwana mulombe wa Asafu, sikutola twaambo, wakazwa kuti akaswanane ambaabo. ¹⁹ Aboobo silutwe mupati wakaamba kuti kulimbabo kuti bambile Hezekkiya ezyo mwami mupati, mwami wa Asiliya, wati: ''Busichaamba bwako buzwakuli? ²⁰ Uwambula biyo zitakwe lugwasyo pe, kowamba koti alijisini alimwi alanguzu kunkondo. Mulinguwe oyo ngosyoma, kuti mulelede kupapa chakubukila ndime? ²¹ Bona, usyoma kumufunko wateete eli litifukide lya Ijiputi, pesi na muntu wayaama alindilyo, liyonamatila mujanza lyakwe alimwi akuyaswa alindilyo. Obo mbwabede mwami Falo mwami wa Ijiputi kulini kufumbwa usyoma mulinguwe. ²² Pesi waamba kuti kulindime, tusyoma muli Jehova Leza wesu, sena tengu mwami wamasena atala azipayizyo Hezekkiya nzyakagwisya, alimwi wakamba kuti kuli Juda aku Jelusalemu, ulelede kukomba kunembo lyachipayizyo echi mu Jelusalemu'? ²³ Nkinkako linobu, ndiyanda kukuchitila chabilo chibotu kuzwa kuli simalelo wangu mwami waku Asiliya. Ndiyokupa zyuulu zibili zyamabbiza, na ulakonzya kuyandula uyano wayenzye. ²⁴ Ulakaka biyeni nikuba kumulimo munini wabasimalelo bangu ulelede kubikka kusyoma mu Ijiputi kunkalaki amabbiza. ²⁵ Ndakenda kusika awa nkanditakwepe Jehova akukulwanya kubusena obu akubunyonyoona? Jehova wakaamba kuti kuli ndime, 'Lwisya eyi nyika akwimwayula.'' ²⁶ 'Mpawo Eliyakkimu mwana mulombe wa Hilikkiya, a Syebbina, a Jowa wakati kuli silutwe wampi, ''Ikaka wambula kubalanda bako mumwaambo wachi Alamu, nkambo tulawumvwa. Utakambuli kuli ndiswe amulaka wachi Juda mumatwi abantu abo balikubulambo.'' ²⁷ Pesi silutwe wabasilumamba wakati kulimbabo, ''Takulikuti wakandituma kubantu abo bakkede abulambo, abo bayokonzya kulya mazyu abo akunywa minsyu yabo anduwe?'' ²⁸ Mpawo silutwe wampi mupati wakayimikila alimwi wakoompolola mujwi pati mumwaambo wachi Juda, akwamba kuti, ²⁹ ''Muswilile kujwi lyamwami mupati, mwami wa Asiliya. Mwami wakaamba kuti; ³⁰ Utalekeli Hezekkiya kuti akweene, nkambo takoyokonzya kukuvuna kuzwa kumanguzu angu. Utakalekeli Hezekkiya kuti akakuchite kuti usyome muli Jehova, akwamba kuti, muunzi oyu tukoyopegwa mujanza lyamwami wa Asiliya.'' ³¹ Utakaswilili kuli Hezekkiya, nkambo echi nchicho mwami waku Asiliya nchawamba: 'Amuchite lumuuno andime alimwi muzwe kuli ndime. Elyo umwi awumwi wanu uyolya kumusansa wakwe akuzwa kumusamu wamukuyu wakwe akunywa mumanzi azwa kuchikala chakwe. ³² Muyochita echi kusikila ndikaboole alimwi ndikakutole kunyika ilimbuli nyika yanu, nyika yazilyo awayini mupya, nyika yachinkwa amyunda yamisansa, nyika yaminsamu yama Olifa abuchi, kuti ukakonzye kuyopona akutafwa, utaswilili kuli Hezekkiya nayoyeezya kukukombelezya kawamba kuti, 'Jehova uyotuvuna.' ³³ Sena kulumwi wabaleza wabantu wakabavuna kuzwa kujanza lyamwami wa Asiliya? ³⁴ Balikuli baleza ba Hamati a Alipadi? Balikuli baleza ba Sepavayimu, Hena, a Ivah? ³⁵ Akkati kabaleza boonse bamunyika, mpubali na baleza bakali bavuna nyika yabo kuzwa kunguzu zyangu? Mbobuli mbwanga Jehova ulafutula Jelusalemu kuzwa kubupati bwangu?'' ³⁶ Pesi bantu bakinkilila kunembo kabawumwide alimwi tebakavwiila nkambo mwami wakalayilila, ''Mutakamusanduli pe.'' ³⁷ Mpawo Eliyakkimu mwana mulombe wa Hilikkiya, wakali kulanga atala ampuli; Syebbina mulembi; antomwe a Jowa mwana mulombe wa Asafu, simubweza twambo, bakasika kuli Hezekkiya azisamo zyabo kazizavukide, alimwi bakaamba twambo kulinguwe asilutwe mupati.