¹ Mumwaaka wakkumi ayibili wa Ahazi mwami waJuda, bulelo bwa Hosyiya mwana mulomne wa Ela bwakatalika. Wakakwiila Izilayeli muSamaliya kwamyaaka musanu ayine. ² Wakachita bubi mumenso aa Jehova, pesi kaziteelene azyakachitwa abaami ba Izilayeli bakamusangunina. ³ Syalumaneza mwami wa Asiliya wakamulwanisya, alimwi Hosyiya wakaba mubelesi wakwe alimwi walikumwetela mitelo. ⁴ Lino mwami waku Asiliya wakabona kuti Hosyiya walikumusyida kunsi, nkambo Hosyiya wakali watuma batumwa kuli So mwami wa Ijiputi; alimwi taakwe nakapa mitelo pe kumwimi wa Asiliya, mbuli mbwakali kuchita mwaka amwaaka. ⁵ Aboobo mwami wa Asiliya wakamwaanga akumujalila muntolongo. Mpawo mwami wa Asiliya wakayilwanisya Samaliya kayizyungulukide kwamwyaaka yotatwe. ⁶ Mumwaka wamusanu ayine wa Hosyiya, mwami waku Asiliya wakiitola Samaliya akubweza Izilayeli wakitola ku Asiliya. Wakakubabika ku Hala, kuchito chamulonga wa Gozani, alimwi mumagunzi aba Medisi. ⁷ Oobu bwaange bwakachitika nkaambo bantu ba Izilayeli bakali babisizya Jehova Leza wabo, ooyo wakabeeta kuzwa kunyika yaIjiputi kuzwa munsi lyakuboko kwa Falo mwami wa Ijiputi. Bantu bakali kukomba bamwi baleza ⁸ alimwi kabeenda munchito zyabamaasi abo Jehova mbaakali watanda kunembo lyabantu ba Izilayeli, alimwi amuzichito zyabaami ba Izilayeli nzibakali bachita. ⁹ Bantu ba Izilayeli bakali kuchitila Jehova Leza wabo zintu zyakatali kabotu pe munsiswa. Bakaliyakila masena asumpukide mumagunzi aabo woonse, kuzwa kumaanda malamfu akubonena kule mane kumaanda abukwabilizi. ¹⁰ Alimwi bakiimika mayako amabwe antomwe amasamu amu Asyila atulundu tulamfu toonse amunsi lyamusamu woonse wakamweemvwe. ¹¹ Okiya bakawuumpa tununkilizyo mumasena woonse alajulu, mbuli mbubakali bachita bamaasi, oko Jehova mbaakali wasosolosya anembo lyabo. Ba Izilayeli bakachita zintu zibi zyakanyemya Jehova; ¹² bakakomba mituni, eeyo Jehova njaakali wati kuli mbabo, ''Tamukoyochita chintu echi.'' ¹³ Pesi Jehova wakali wabeda mukamboni Izilayeli a Juda kwindila mumusinsimi umwi awumwi asikubona woonse, kawamba kuti, ''Amufutatile nzila zyenu zitaluleme alimwi mubambe milawu yangu amalayilile aangu, alimwi muchenjelele kubamba mulawu woonse ngundakalayilila bamatateenu, ayooyo ngundakatumizya kuli ndinywe kwindila mubabelelesi bangu basinsimi.'' ¹⁴ Pele takwepe nibakayanda kutelela; anukuti bakayumya nsingo zyabo mbulibamawisi bakatasyoma muli Jehova Leza wabo. ¹⁵ Bakakkaka mbeta zyakwe achizuminano nchaakali wachita abasikale babo, amilawo yachizuminano nchaakali wapa kulimbabo. Bakatobelezya nchito zitagwasyi pe abalo lwabo bakaba batagwasyi pe. Bakatobela bamaasi bakabazyungulukide, mbakali wabambila Jehova kuti batabatobelezyi pe. ¹⁶ Tebakayibika mumyoyo yabo pe yoonse milawu ya Jehova Leza wabo. Bakalichitila bana beng'ombe bobile balubono akukomba mbabo. ¹⁷ Bakachita samu lyamu Asyela alimwi bakazikkomba nyeenyezi zyoonse zyamujulu alimwi a Bbaalu. Bakachita kuti bana babo balombe abasimbi biinde mumulilo, bakabelesya busondo bakalyuuzya alimwi bakamubusizya bukkali. ¹⁸ Abobo Jehova wakanyema loko kanyemena Izilayeli alimwi wakabagwisya kumenso aakwe. Taakwe wakasyala pe kunze kwabamukowa wa Juda abalikke. ¹⁹ Alakwe Juda takwepe nakabamba milawu ya Jehova Leza wabo, alimwi bakatobelezya nchito zyakali kuchitwa a Izilayeli. ²⁰ Aboobo Jehova wakatakata boonse balunyungu lwa Izilayeli; wakabombya akubaaba mujanza lyabaabo balikukonzya kutola nzibakalazyo mbuli lubono lwakusala, mane wakubatandila kunze abusyu bwakwe. ²¹ Wakagwisya Izilayeli mumulongo wabwami bwaDeviti, alimwi bakachita kuti Jelobbowamu mwana mulombe waNebbati abe ngomwami. Jelobbowamu wakatantamwida Izilayeli kule kuzwa kukutobela Jehova alimwi wakabachita kuti bachite chibi chipati loko. ²² Bantu ba Izilayeli bakatobela zibi zya Jelobbowamu zyoonse alimwi tebakazwa pe kulinzizyo, ²³ aboobo Jehova wakamugwisya mbubonya mbuli mbwakali waamba kwindila mubazike bakwe boonse basinsimi kuti kuzwa munyika yabo kuya ku Asiliya, alimwi zichili mbubo asunu. ²⁴ Mwami waba Asiliya wakeeta bantu kuzwa ku Bbabbiloni aku Kkuta, alimwi kuzwa ku Aava, aku Hamati alimwi aku Sefanivayimu, akubika mumagunzi a Samaliya muchiindi chabantu ba Izilayeli. Bakiitola Samaliya akukkala mumagunzi aayo. ²⁵ Zyakachitika kumatalikilo akukkala kwabo oko nkuti tebakamulemeka pe Jehova. Aboobo Jehova wakabatumina balavu akati kabo bakajaya bamwi babo. ²⁶ Eelyo bakambuula amwami wenyika eyo. Aboobo wakatuma balavu aakati kabo, alimwi, bona, balavu balikujaya bantu okiya nkambo tabazi pe nchito ziyandikana a Leza wenyika eeyo.'' ²⁷ Mpawo mwami waku Asiliya wakalayilila kuti, ''Mutole uumwi wabapayizi oyo ngumwakeeta kuzwa nkuko, alimwi mumuleke ayinke akakkale nkuko, alimwi mumuleke abayiisye nchito ziyandwa a Leza wenyika eeyo.'' ²⁸ Lino umwi wabapayizi mbibakabweza kuzwa ku Samaliya wakaza akuzokkala mu Bbeteli; wakabayiisya mbubelede kulemeka Jehova. ²⁹ Chibunga chamusyobo umwi awumwi chakachita baleza bacho, akubabika mumasena asumpukide ayo akali achitwa abaSamaliya - Chibunga chamusyobo umwi awumwi mumagunzi mubakali kukkala. ³⁰ Bantu baBbabbiloni bakachita Sakkoti Bbenoti; bantu baku Hamati bakachita Negalu; bantu baku Hamati bakachita Asyima; ³¹ bama Aviviti bakachita Nibbazi a Tatakki. Ba Sefaviti bakalikuumpa bana babo mumulilo kabawumpila Adilameleki: alimwi a Anameleki, baleza bama Sefaviti. ³² Alimwi bakalemeka Jehova, akusala kuzwa akati kabo bapayizi bamasena aasumpukide, bakali kubapayilila muzikombelo kumasena asumpukide. ³³ Bakamulemeka Jehova alimwi bakakkomba baleza babo, muziyanza zyabamaasi bakunyika oko nkubabagwisigwa. ³⁴ Kusikila sunu bachikakatila muziyanza zyabo zyensiku. Tabamulemeki pe Jehova nikuba kutobelezya malayilile, mbeta, milawu, niiba milawu eyo Jehova njaakapa balunyungu lwa Jakobo, oyo ngwaakuzika kuti Izilayeli. ³⁵ Jehova nakachita cizuminano ambaabo, wakabalayilila, ''Mutakayoowi bamwi baleza, nikuba kubapayilila zipayizyo. ³⁶ Pele Jehova wakamweeta kuzwa kunyika, ye Ijiputi anguzu mpati akuboko kutandabete, ooyo ngonguwe ngomuyokkotamina aansi, alimwi ngonguwe ngomuyoopa zipayizyo. ³⁷ Malayilile, ambeta, milawu alimwi milawu njakalembela ndinywe, muyozibamba mane kukabe kutamani. Aboobo mutakayoowi bamwi baleza, ³⁸ alimwi chizuminano nchindakachita andinywe, tamukoyochiluba pe, nikuba kulemeka bamwi baleza. ³⁹ Pele Jehova Leza wenu nguwe ngumuyolemeka. Uyomuyokola kuli basinguzu basinkondonyokwe.'' ⁴⁰ Takwe nibakatelela pe, nkambo bakiinkilila kunembo kukuchita eezyo nzibakali kuchita muchiindi chakamana. ⁴¹ Aboobo ezi nyika zyakayoowa Jehova alimwi kazikkomba zibezwa zyazyo, alimwi bana babo bakachita mbubonya oobo-mbuli mbubakachita bana babana babo. Bakaya kunembo akuchita zyakachitwa abasikale babo kusikila ambulisunu.