¹ Mumunyaka wakkumi amusanu wa Pekka mwana mulombe wa Lemaliya, Ahazi mwana muombe wa Jotamu mwaami wa Juda, wakatalika kweendelezya. ² Ahazi wakali aminyaka ili makkumi obile yakuzyalwa eelyo nakatalika kweendelezya, alimwi wakeendelezya kwaminyaka ili kkumi amusanu awumwi mu Jelusalema. Takachita zilikabotu pe kumenso aa Jehova Leza wakwe, mbuli Deviti sikale wakwe mbakachita. ³ Pesi, wakeenda munzila yabaami ba Izilayeli; nchobeni, wakachita kuti mwana wakwe mulombe ayinde mumulilo, kutobelezya nchito zisesemya zya nyika, eezyo Jehova nzyakali wagwisya kuzwa kunembo lyabantu ba Izilayeli. ⁴ Wakapa zipayizyo alimwi wakatenta tununkilizyokumasena ali kujulu, aatala atulundu, alimwi aansi amisamu ili amweemvwe. ⁵ Mpawo Lezini, mwaami wa Alamu a Pekka mwana mlombe wa Lemaliya, mwaami wa Izilayeli wakaza ku Jelusalema kuzolwana. Bakasinkilizya Ahazi, pesi tebakamuzunda pe. ⁶ Kulichecho chiindi, Lezini mwaami wa Alamu wakagwisya Elati akaambo ka Alamu alimwi wakatandaania baalumi ba Juda kuzwa mu Elati. Mpawo ba Alamu bakasika ku Elati ooko nkubakkede kusika buzuba obuno. ⁷ Aboobo Ahazi wakatuma batumwa ku Tigilati-Pilesa mwaami wa Asiliya, wakati, ''Ndilimulanda wako alimwi ndimwana wako. Koza alimwi undivune kuzwa kujanza lya mwaami wa Alamu alimwi kuzwa kujanza lya mwaami wa Izilayeli, aabo bandilwana.'' ⁸ Aboobo Ahazi wakabweza nsilivaa ngolide zyakajanika mun'anda ya Jehova alimwi aakati kabasikubamba mali bamun'anda ya mwaami alimwi wakayituma mbuli chipo kumwaami wa Asiliya. ⁹ Mpawo mwaamiwa Asiliya wakamuswiilila, alimwi mwaami wa Asiliya wakanyampuka akwiiminana a Damasikkasi, wakazunda alimwi wakagwisya bantu bakwe bakali mukati mbuli basungwa ku Kkili. Alubo wakajaya Lezini mwaami wa Alamu. ¹⁰ Mwaami Ahazi wakaya ku Damasikkasi kuyooswanana a Tigilati-Pilesa mwaami wa Asiliya. Ku Damasikkasi wakabona chipayililo. Wakatumizya kuli Yuliya mupayizi chikozyanio chachipayililo abubumbwe bwacho alimwi abwiime bwacho kuchitila luzibo luyandikana. ¹¹ Aboobo Yuliya mupayizi wakayaka chipayililo kuti chibe mbuli mumabambe aayo Mwaami Ahazi ngakatumizya kuzwa ku Damasikkasi. Wakachimaninsya Mwaami Ahazi nkatanaaboola kuzwa ku Damasikkasi. ¹² Eelto mwaami nakasika kuzwa ku Damasikkasi wakabona chipayililo; mwaami wakasika ku chipayililo alimwi wakachita zipo alinchicho. ¹³ Wakachita chipo chakwe chakutenta alimwi achipo chakwe chazilyo, wakatila chipo chakwe chakunywa, alimwi wakasansiila bulowa bwachipo chakwe chabulyidilano achipayililo. ¹⁴ Chipayililo chamukuba chakali kunembo lya Jehova - wakaza aacho kuzwa kunembo lya chikombelo, kuzwa aakati kachipayililo chakwe a chikombelo cha Jehova alimwi wakachibika kubbazu lya nyika lya chipayililo chakwe. ¹⁵ Mpawo Mwaami Ahazi wakalayilila Yuliya mupayizi, kati, ''Achipayililo chipati tenta chipo chakutenta chifumo alimwi achipo chazilyo chamangolezya, alimwi achipo cha mwaami chakutenta a chipo chakwe chazilyo, aantomwe achipo chakutenta chabantu boonse bamunyika, achio chabo chazilyo azipo zyabo zyakunywa. Musansiile alinchicho boonse bulowa bwachipo chakutenta, alimwi boonse bulowa bwazipayizyo. Pesi chipayililo cha mukuba chinoli changu kukusikila akaambo kalukwabililo.'' ¹⁶ Yuliya mupayizi wakachita mbuli eezyo Mwaami Ahazi nzyakalayilila. ¹⁷ Mpawo Mwaami Ahazi wakagwisya zimpanzi a mazeteko kuzwa kuziyako zibwezeka; alubo wakagwisya lwizi kuzwa kunze kwa mukuba wabasune ooyo wakali munsi lyawo akubika aakazila kamabwe. ¹⁸ Wakagwisya inzila yakavumbidwe yakweendela ya Sabata eeyo yakabumbidwe ku chikombelo, aantomwe amanjililo aa mwaami kunze lya chikombelo cha Jehova, nkaambo ka mwaami wa Asiliya. ¹⁹ Mbuli kuli aamwi makani aatala a Ahazi alimwi azyoonse nzyakachita, tazilembedwe na mubbuku lyamakani abaami ba Juda? ²⁰ Ahazi wakoona abasikale bakwe alimwi wakavwikwa aantomwe abasikale bakwe muchisi cha Deviti. Hezekkiya mwana wakwe mulombe wakaba mwaami mubusena bwakwe.