¹ Mumunyaka wa makkumi obilwe alaamusanu-aabili wa Jelobbowamu mwaami wa Izilayeli, Azaliya mwana mulombe wa Amaziya mwaami wa aJuda wakatalika kweendelezya. ² Azaliya wakali aminyaka ili kkumi amusanu awumwi yakuzyalwa eelyo nakatalika kweendelezya, alimwi wakeendelezya kwaminyaka ili makkumi alimusanu ayibili mu Jelusalema. Izina lyabanyina bakwe lyakali Jekkoliya, alimwi wakalikuzwa kuJelusalema. ³ Wakachita zibotu kumenso a Jehova, mbuli kwakali kuchita wisi Amaziya. ⁴ Nikubaboobo, masena aakujulu takagwisigwa pe. Bantu bakachilikupa alimwi akutenta tununkilizyo kumasena alikujulu. ⁵ Jehova wakafwabya mwaami kumuchita sichipele kusikila kubuzuba bwakwe bwakufwa alimwi wakali kukkala mun'anda yakwe alike. Jotamu, mwana mulombe wa mwaami, wakali aatala ampuli alimwi wakatonga bantu banyika. ⁶ Mbuli kuli aamwi makani aatala a Azaliya, zyoonse nzyakachita, tazilembedwe na mubbuku lyamakani abaami ba Juda? ⁷ Aboobo Azaliya wakoona abasikale bakwe; bakamuvwika aantomwe abasikale bakwe muchisi cha Deviti. Jotamu, mwana wakwe mulombe, wakaba mwaami mubusena bwakwe. ⁸ Mumunyaka wa makkumi otatwe aalamusanu-aatatu wa Azaliya mwaami wa Juda, Zekkaliya mwana mulombe wa Jelobbowamu wakeendelezya aatala a Izilayeli mu Samaliya kwamyeezi ili musanu awumwi. ⁹ Wakachita chakali chibi kumenso a Jehova, mbuli ba mataata bakwe mbubakachita. Takaanzana pe azibi zya Jelobbowamu mwana mulombe wa Nebbati, ooyo wakachita kuti Izilayeli abisye. ¹⁰ Syalumu mwana mulombe wa Jabbesi wakabukila Jekkaliya kavwindi, wakamulwana mu Ibbuliyamu, alimwi wakamujaya. Mpawo wakaba mwammi mubusena bwakwe. ¹¹ Mbuli kuli aamwi makani aatala a Zekkaliya, zililembedwe mubbuku lyamakani abaami ba Izilayeli. ¹² Eeli lyakali jwi lya Jehova ndyakaamba kuli Jehu, kati, ''Lunyungu lwako luyookkala achuuno chabwaami bwa Izilayeli kusikila kuzyalane lyane.'' Eezyo nzizyo zyakachitika. ¹³ Syalumu mwana mulombe wa Jabbesi wakatalika kweendelezya mumunyaka wa makkumi otatwe aalamusanu-aane wa Azaliya mwaami wa Juda, alimwi wakeendelezya kwamweezi womwe luzutu mu Samaliya. ¹⁴ Menahemu mwana mulombe wa Gadi wakeenda kuzwa ku Tiza kusika Samaliya. Ooko wakakubukila Syalumu mwana mulombe wa Jabbesi, mu Samaliya. Wakamujaya alimwi wakaba mwaami mubusena bwakwe. ¹⁵ Mbuli kuli aamwi makani aatala a Syalumu alimwi abuvwindi mbwakali wachita, zililembedwe mubbuku lyamakani abaami ba Izilayeli. ¹⁶ Mpawo Menahemu wakabukila Tipusa aboonse bakali oomo, alimwi amigaano izyungulukide Tiza, nkaambo tebakajula pe chisi kulinguwe. Aboobo wakachibukila, alimwi wakayawula boonse banakazi bakamitide mugunzi eelyo. ¹⁷ Mumunyaka wa makkumi otatwe aalamusanu-aane wa Azaliya mwaami wa Juda, Menahemu mwana mulombe wa Gadi wakatalika kweendelezya Izilayeli; wakeendelezya kwaminyaka ili kkumi mu Samaliya. ¹⁸ Wakachita chakali chibi kumenso a Jehova. Nkaambo buumi bwakwe boonse, takaanzaana pe kuzwa kuzibi zya Jelobbowamu mwana mulombe wa Nebbati, wakachita Izilayeli kuti abisye. ¹⁹ Mpawo Puli mwaami wa Asiliya wakalwanisya nyika, alimwi Menahemu wakapa Puli chuulu chomwe chamatalenta aa nsiliva, kuchitila kuti kudunduzigwa kwa Puli kukabe anguwe kukusimya bwaami bwa Izilayeli mukuboko kwakwe. ²⁰ Menahemu wakaamba mali eeyi kuzwa kuli Izilayeli akukumbila umwi awumwi wabavubi kuti abbadale masyekeli ali makkumi osanwe ansiliva kulinguwe kuti akape ku mwaami wa Asiliya. Aboobo mwaami wa Asiliya wakamufutatila alimwi takakkala pe munyika eeyo. ²¹ Mbuli kuli aamwi makani aatala a Menahemu, alimwi azyoonse nzyakachita, tazilembedwe na mubbuku lyamakani abaami ba Izilayeli? ²² Aboobo Mehanemu wakoona abasikale bakwe, alimwi Pekkahiya mwana wakwe mulombe wakaba mwaami mubusena bwakwe. ²³ Mumunyaka wamakkumi aalimusanu wa Azaliya mwaami wa Juda, Pekkahiya mwana mulombe wa Mehanemu wakatalika kweendelezya aatala a Izilayeli mu Samaliya; wakeendelezya kwaminyaka yobilwe. ²⁴ Wakachita chakali chibi kumenso a Jehova. Takaanzaana pe kuzwa kuzibi zya Jelobbowamu mwana mulombe wa Nebbati, anchicho nchaakachita Izilayeli kuti abisye. ²⁵ Pekkahiya wakali aasilutwe wakali kutegwa Pekka mwana mulombe wa Lemaliya, ooyo wakamubukila chakavwindi aatala anguwe. Aantomwe abaalumi bakali makkumi alimusanu aku Giliyadi, Pekka wakajaya Pekkahiya alubo a Agobbu a Aliye mu Samaliya, mubusena busalala bwabusena bwa mwaami. Pekka wakajaya Pekkahiya alimwi wakaba mwaami mubusena bwakwe. ²⁶ Mbuli kuli aamwi makani aatala a Pekkahiya, zyoonse nzyakachita, zililembedwe mubbuku lyamakani abaami ba Izilayeli. ²⁷ Mumunyaka wamakkumi ali musanu alaabili a Azaliya mwaami wa Juda, Pekka mwana mulombe wa Lemaliya wakatalika kweendelezya aatala a Izilayeli mu Samaliya; wakeendelezya kwaminyaka ili makkumi obile. ²⁸ Wakachita chakali chibi kumenso a Jehova. Takaanzaana pe kuzwa kuzibi zya Jelobbowamu mwana mulombe wa Nebbati, ooyo wakachita Izilayeli kuti abisye. ²⁹ Mumazuba a Pekka mwaami wa Izilayeli, Tigilati-Pilesa mwaami wa Asiliya wakaza alimwi wakabweza Ijoni, Abbelu Bbeti Makka, Janowa, Kkedesyi, Heza, Giliyadi, Galile, alimwi ayoonse nyika ya Nafutali. Wakabweza bantu kuya ku Asiliya. ³⁰ Aboobo Hosyeya mwana mulombe wa Ela wakabumba buvwiyi aatala a Pekka mwana mulombe wa Lemaliya. Wakamulwana alimwi wakamujaya. Mpawo wakaba mwaami mubusena bwakwe, mumunyaka wamakkumi obile wa Jotamu mwana mulombe wa Uziya. ³¹ Mbuli kuli aamwi makani aatala a Pekka, zyoonse nzyakachita, zililembedwe mubbuku lyamakani abaami ba Izilayeli. ³² Mumunyaka wabili wa Pekka mwana mulombe wa Lemaliya, mwaami wa Izilayeli, mwaami wa Juda wakatalika kweendelezya. ³³ Wakali aminyaka ili makkumi obile-alaamusanu akuzyalwa aawo nakatalika kweendelezya; wakeendelezya kwaminyaka ili kkumi amusanu awumwi mu Jelusalema. Izina lyabanyina lyakali Jelusya; wakali mwana musimbi wa Zadokku. ³⁴ Jotamu wakachita zyakali zibotu kumenso aa Jehova. Wakatobelezya chitondeezyo chawisi wakwe Azaliya nzyakachita. ³⁵ Nikubaboobo, masena akujulu takagwisigwa pe. Bantu bakachili kupedekezya alimwi akutenta tununkilizyo kumasena alikujulu. Jotamu wakayaka mulyango waajulu lyan'anda ya Jehova. ³⁶ Mbuli kuli aamwi makani aatala a Jotamu, alimwi azyoonse nzyakachita, tazilembedwe na mubbuku lyamakani abaami ba Juda? ³⁷ Muli aayo mazuba Jehova wakatalika kutuma kubukila Juda a Lezini mwaami wa Alamu, alimwi a Pekka mwana mulombe wa Lemaliya. ³⁸ Jotamu wkoona aantomwe abasikale bakwe alimwi wakavwikwa aantomwe abasikale bakwe muchisi cha Deviti, sikale wakwe. Mpawo Ahaziya, mwana wakwe mulombe, wakaba mwaami ubusena bwakwe.