¹ Mwaami wachanakazi waku Shebba nakamvwa mpuuwo zya Solomoni, wakeza ku Jelusalemu kuzomweezya amibuzyo miyumu. Wakeeza ampuumba ndamfu, ulankamela zinyampuzidwe tununkilizyo, ngolida nyiingi, amabwe mayingi mayandisi. Nakasika kuli Solomoni, wakamwambila zyoonse zyakali mumoyo wakwe. ² Solomoni wakasandula mibuzyo yakwe yoonse; takukwe mubuzyo oyo ngwatakasandula pe. ³ Mwaami mwanakazi waku Shebba nakabona busongo bwa Solomoni amaanda abwaami ngakayaka, ⁴ zyakulya antafula yakwe, makkalilo abalanda bakwe, mulimu wabalanda bakwe azisamo zyabo, abalabo basikumukutawukila azisamo zyabo, alimwi azipo zyakuumpa nzyakachita kun'anda ya Jehova, takachili alyakwaamba pe mulinguwe. ⁵ Wakati kumwaami, ''Niinchonzyo, impuwo njindakamvwa munyika yangu yamajwi aako abusongo bwako. ⁶ Tendakasyoma nzindakamvwa kusikila ndasika aano, alimwi kwalino menso angu achibona. Teechisela pe nchindakaambilwa atala abusongo bwako abuvubi ! Wayinda mpuwo eyo njindakamvwa atala anduwe. ⁷ Balongezezegwe byeni balumi bako, alimwi balongezezegwe biyeni balanda bako bayima kunembo lyako lyoonse, nkambo bamvwa busongo bwako. ⁸ Alongezegwe Jehova Leza wako, wakakondelwa mulinduwe, oyo wakakubika achuuno chakwe chabulemu, kuba mwaami wa Jehova Leza wako. Nkambo Leza wako wakayanda Izilayeli, kuti abayumye kwalyoonse, wakakuchita kuti ube mwaami wabo, kuti uchite mbukwelede abululami !'' ⁹ Wakapa mwaami 120 amatalenta angolida amulwi mupati watununkilizyo amabwe mabotu. Takukwe nikwakali kwaba tununkilizyo tulimbuli otu ooto mwaami mwanakazi waku Shebba ntwakapa mwaami Solomoni. ¹⁰ Balanda ba Hilamu abalanda ba Solomoni, abo bakaleta ngolida kuzwa ku Ofu, alubo bakaleta zisamu zyamu alugomu amabwe mabotu. ¹¹ Azisamu zyamu alugamu, mwaami wakachita matantilo akun'anda ya Jehova aakun'anda yakwe, atulato tuntimbwa amitetele yabasikwiimba. Takukwe zisamu zyakali mbuli eezi zyakabwenekede lutanzi munyika ya Juda. ¹² Mwaami Solomoni wakapa mwaami wachanakazi waku Shebba zyoonse nzyakayanda akufumbwa nchakalomba, wakamupa zyiinda nzyakaleta kumwaami. Mpawo wakazwa akubweda kunyika yakuli mbabo, we abalanda bakwe. ¹³ Lino bulemu bwangolida obo bwakasika kuli Solomoni mumunyaka umwi bwakali 666 amatalenta angolida, ¹⁴ kutaamba angolide yakaletwa aba sikuula aba sambazi. Baami boonse ba Alabbiya abendelezi munyika bakaleta ngolida ansiliva kuli Solomoni. ¹⁵ Mwaami Solomoni wakapanga myaanda yobile yantobo mpati zichitidwe angolide. Masyekeli aali miyanda musanu alimwi alikunjila mulimwi ayimwi. ¹⁶ Alubo wakapanga ntobo zichitidwe angolida zili myaanda iitatu. Zikoto zitatu zyangolida zyalikunjila kuli iimwi ayimwi intobo; mwaami wakazibika mun'anda yakulusaka lwa Lebbanoni. ¹⁷ Mpawo mwaami wakapanga chuuno chabwami chipati chameja akuchibika ngolida ikwizingidwe. ¹⁸ Kwakali matantilo ali musanu alimwi kusika achuuno chabwami, achakubika mawulu chakali namatizidwe kuchuuno chabwami. Kuli limwi alimwi bbazu lyachuuno chabwami kwakali zyakugwabamikila maboko kazijilabalavu babili bayimvwi kulubazu kwachimwi achimwi. ¹⁹ Balavu kkumi ababili bakalimvwi amatantilo, umwi ambali lyamatantilo woonse kali musanu alimwi. Takukwe nikwakali chuuno chabwami mbuli nchicho mubwami bumbi. ²⁰ Zyonse nkomeki zyakunywida zyamwaami Solokoni zyakali zyangolida, azyonse nkomeki zyakunywida mun'anda yakulusaka lwa Lebbanoni zyakali zyangolida mubotu. Takwepe yakali yansiliva nkambo nsiliva teyali abulemu mumazuba akwe Solomoni. ²¹ Mwaami wakali amaato miingi kulwizi ayenda mulwiizi lupati antomwe amaato miingi a Hilamu. Kamwi mumyaaka itatu maato miingi alikuleta ngolida, nsiliva, ameja, abalo bachimpanze abasokwe. ²² Mawo mwaami Solomoni wakayinda baami boonse bamunyika mubuvubi abusongo. ²³ Baami boonse banyika bakayandula kubakwa Solomoni kuchitila kuti bamvwe busongo bwakwe, obo Leza mbwakabika mumoyo wakwe. ²⁴ Abo bakali kuswaya bakali kuleta zipo, mitiba yansiliva ayangolida, zisamo, zilwanyo, atununkilizyo, azyalo mbongolo abana bazyo, munyaka amunyaka. ²⁵ Solomoni wakali azyuulu ziine zyazyaata zyambongolo ankalaki, azyuulu zilikkumi azibili zyabasimbongolo, eezyo nzyakabika mumagunzi ankalaki anguwe mu Jelusalemu. ²⁶ Wakeendelezya baami boonse kuzwa kumulonga Ifuleti kusika kunyika yaba Filisitina, akumugano wa Ijiputi. ²⁷ Mwaami wakali ansiliva mu Jelusalemu nyiingi mbuli mabwe aalubuwa. Wakachita misamu yasiida ivule mbuli mikuyu yasikkamo eyo ilimunyika zyamukkuti. ²⁸ Bakeetela Solomoni imbongolo kuzwa ku Ijipiti akuzwa kunyika zyoonse. ²⁹ Kuli zimwi zyaambo zyendelana a Solomoni, chakutanguna akumaninizya, sena tazilembedwe mulwaano lwa Natani musinsimi, muchisinsimi chakwe Ahija mu Shiito, amuzilengano zya Ayido sikubona ( zyakali amakani aatala a Jelobbowamu mwana mulombe wa Nebbati )? ³⁰ Solomoni wakeendelezya mu Jelusalemu a Izilayili yoonse kwaminyaka makumi aane. ³¹ Wakoona abasikale bakwe alimwi bantu bakamuzika mumunzi wa Devidi wisi wakwe Lehobbowamu, mwana wakwe mulombe, wakaba mwaami mubusena bwakwe.