¹ Lehobbowamu wakayinka ku Sekkemu nkambo ba Izilayeli boonse bakali kusika ku Sekkemu kuyomuchita mwaami. ² EelyoJelobbawamu mwana mulombe wa Nebbati nakamvwa eechi ( nkambo wakali mu Ijiputi, nkwakali wachijila kuzwa ku Mwaami Solomoni ), wakabweda kuzwa ku Ijiputi. ³ Mpawo bakatuma akuyomwiita, alimwi Jelobbowamu aba Izilayeli boonse bakasika; bakaambula kuli Lehobbowamu akwaamba kuti, ⁴ ''Wuso wakatulemezya aajokwe lyesu. Nkiinkako lino, wuubya jokwe idemu eelyo ndyakabikka aali ndiswe, mpawo tuyokubelekela.'' ⁵ Lehobbowamu wakaamba kuti kulimbaabo, ''Mubweede lubo kuli ndime mazuba aatatu aamana.'' Mpawo bantu bakayiinka. ⁶ Mwaami Lehobbowamu wakabuzyania aabalumi bapati aabo bakayiimvwi kunembo lya Solomoni wisi kachipona; wakaamba kuti, ''Ngamulandilaya buti kuti ndilete nsandulo kubantu aaba ?'' ⁷ Bakaambula kuli nguwe akwaamba kuti, ''Naa uli mubotu kubantu aaba akubabotezya, akwamba majwi mabotu kulimbabo, eelyo nayoba bazike bako lyoonse.'' ⁸ Pesi Lehobbowamu wakanyansya lulayo lwa baalumi bapati oolo ndobakamupede, akubuzyanya abakubusi baluumi aabo bakakomena limwi aanguwe, bakayimvwi kunembo lyakwe. ⁹ Wakaamba kuti kulimbabo, ''Ndulayoonzi ndomundipa, kuti tusandule bantu aabo bakaambula kulindime akwaamba kuti, Wubya jokwe eelyo wuso ndyakabikka aalindiswe?'' ¹⁰ Bakubusi baalumi aabo bakakomena limwi a Lehobbowamu bakambuula kuli nguwe, bakati, ''Mbuboobu mboyelede kwambuula kubantu aabo bakakwambila kuti Wuso Solomoni wakabalemezya jokwe lyabo pesi kuti ulyuubye. Ncheechi nchoyelede kwaamba kuli mbabo, kantengeza kangu nkapatimkwinda chikungu chataata. ¹¹ Mpawo lino, nikuba taata wakamulemezya ajokwe demu, ndiyoyungizya kujokwe lyenu. Taata wakamuuma amoondo, pesi mebo ndiyoomuma atubanze.'' ¹² Mpawo Jelobbowamu abantu boonse bakasika kuli Lehobbowamu mubuzuba bwatatu, mbubonya mwaami mbwakambide kuti, ''Mubweede kuli ndime mubuzuba bwataatu.'' ¹³ Lehobbowamu wakambula chabukali kuli mbabo, kanyansya lulayo lwabalumi bapati. ¹⁴ Wakaambula kuli mbabo kabotelezya lulayo lwabakubusi baluumi, wakati, ''Taata wakamulemezya aajokwe, pesi mebo ndiyomuyungizya aalindilyo. Taata wakamuuma amoondo, pesi mebo ndiyomuuma atubanze.'' ¹⁵ Eelyo mwaami takwe nakaswilila kubantu pe, nkaambo zyakali zyazwa kuli Leza, kuti Jehova welede kugwisya jwi lyakwe eelyo Ahija mu Silo ndyakambuula kuli Jelobbowamu mwana mulombe wa Nebbati. ¹⁶ Ba Izilayeli boonse nibakabona kuti mwaami taakwe nakaswilila kuli mbabo, bantu bakamusandula akwamba kuti, ''Nchaabilonzi nchotujisi muli Devidi ? Tatukwe lukono mumwana mulombe wa Jese ! Umwi awumwi wanu weelede kubweeda kuteente lyakwe, Izilayeli. Lino bona kun'anda yako nomwini, Devidi.'' Mpawo ba Izilayeli boonse bakabweeda kumateente aabo, ¹⁷ Pesi mbuli bantu ba Izilayeli abo balikukkala mumyuunzi ya Juda, Lehobbowamu wakabeendelezya. ¹⁸ Elyo Mwaami Lehobbowamu wakatuma Adonilamu, ooyo wakali mupati wachibbalo, pesi bantu ba Izilayeli bakamutulula mabwe mane wakafwa aamabwe. Mwaami Lehobbowamu wakachijila munkalaki chakufwambana waya ku Jelusalemu. ¹⁹ Mpawo Izilayeli wakaba mubupapi aatala an'anda ya Devidi kusikila sunu.