¹ Kwakaba kuti kumamanino amyaaka ili makumi aabili, muchiindi echo Solomoni nakayaka n'anda ya Jehova alimwi ayakwe n'anda, ² kuti Solomoni wakayakulula madolopo Hilamu ngakamupa, alimwi wakakkazika bantu ba Izilayeli muli ngawo. ³ Solomoni wakalwisya Hamatizoba akumuzunda. ⁴ Wakayaka Tadimo munkanda, awoonse magunzi aziyobwedo, ayo ngakayaka mu Hamati. ⁵ Alubo wakayaka Bbeti Holoni yaatala a Bbeti Holoni yamukkuti, magunzi akwabilidwe amalambo, milyango, azibulo. ⁶ Wakayaka Bbalati amagunzi woonse aziyobwedo ayo ngakalawo, amagunzi woonse ankalaki zyakwe amagunzi abasimbongolo bakwe, alimwi kufumbwa nchayanda kuyaka chimukonda mu Jelusalemu, mu Lebbanoni, amuzisi zyoonse zili ansi abwendelezi bwakwe. ⁷ Kwabantu bonse abo bakachaala baba Hiti Amoli, ba Pelizi, ba Hivi, aba Jebbusi, batali ba Izilayeli, ⁸ inyungu zyabo zyakasyaala mukwinda kwabo minyaka, abo mbibate bakanyonyoona bantu ba Izilayeli - Solomoni wakabaangila kuba basimilimu, ezyo nzibabede kusika sunu. ⁹ Nekubaboobo, Solomoni taakangila basimilimu kubantu ba Izilayeli. Anukuti, bakaba basilumamba bakwe, bapati bampi, basimilimo yabwendelezi, bapati babasimpi yankalaki zyakwe abasimbongolo bakwe. ¹⁰ Aba alubo bakali babelesi bapati bakwendelezya basikubelesya abo bakali ba Mwaami Solomoni, 250, abo bakabelesya bantu bakali kuchita milimu. ¹¹ Solomoni wakaleta mwana wakwe musimbi wa Falo kuzwa aanze mugunzi lya Devidi kuya ku n'anda eyo njakamuyakila, nkambo wakati, ''Mukayintu wangu teelede kukkala mu n'anda ya Devidi mwaami wa Izilayeli, nkambo kufumbwa oko bbokesi lya Jehova nkulyakasika kulasalala.'' ¹² Mpawo Solomoni wakapa zipo zyakuumpa kuli Jehova achitentelo nchaakali wayaka kunembo lya n'anda yakwe. ¹³ Wakaaba zituuzyo mbuli mabambe amazuba woonse; wakabapa, kutobelezya malayilile ajanika mumilayizyo ya Mozesi, mumazuba a Sabata, mumyezi mipya, akumapobwe abambidwe tutatu amunyaka: Pobwe lyachinkwa chitakwe bumena, pobwe lyansondo ansondo, a pobwe lyamadumba. ¹⁴ Mukubamba makani akasinizigwa aa wisi Devidi, Solomoni wakasala akusayinisya bapayizi kumilimu yabo, aba Levi muzibela zyabo, kuchitila kutembawula Leza akubeleka kunembo lyaba Payizi, mbuli mabambe abuzuba abuzuba mbwakali kuyandika. Wakasala alubo basikubamba milyango kusiyanisya kumulyango woonse, nkambo Devidi, muntu wa Leza, wakazilayilila azyalo ezi. ¹⁵ Aba bantu tebakaleya kuzwa kumilayizyo ya Mwaami kuba payizi akuba Levi atala kufumbwa makani, naa atala amaanda aziyobwedo. ¹⁶ Mulimu woonse wakaambwa a Solomoni wakamana, kuzwa kubuzuba intalisyo ya n'anda ya Jehova niyakabikwa kusikila yamana. ¹⁷ N'anda ya Jehova yakamana. Mpawo Solomoni wakayaku Eziyoni Gebba alimwi aku Elati kunkonkosi, munyika ya Edomu. ¹⁸ Hilamu wakamutumina maato ayendelezegwa abasimilimu bakwe, baalumi balizi lwizi, antomwe ababelesi ba Solomoni bakaya ku Odfa akuyobweza kuzwa oko 450 yamatalenta angolide akwaleta ku Mwaami Solomoni.