¹ Eelyo milimo eyo Solomoni njakachitila ing'anda ya Jehova niyakamana, Solomoni wakanjizya zintu ezyo Davida, wisi wakwe, nzyakabikilide mulimo oyu, kubikilizya nsiliva, angolide, alimwi azyoonse zibelesyo wakazibika muchiyobwedo chang'anda ya Leza. ² Mpawo Solomoni waka bungania bapati ba Izilayeli, boonse basilutwe balunyngu, alimwi abazuluzi bampuli zyabantu ba Izilayeli, mu Jelusalemu, kuti beete bbokesi lyachizuminano mudolopo lya Devidi, kwamba kuti, Ziyoni. ³ Bonse balumi ba Izilayeli bakabungana antomwe kunembo lyamwami kupobwe, elyo lyakachitwa mumwezi wamusanu ayibili. ⁴ Boonse bapati ba Izilayeli, alimwi aba Levayiti bakanyampula bbokesi. ⁵ Bakabweza ibbokesi, atente lyakuswanana, azyonse zisalala zyabelesya ezyo zyakali mutente. Bapayizi abo bakali balunyungu lwa Levi bakayete zintu ezi. ⁶ Mwami Solomoni ambungano yoonse ya Izilayeli yakeeza antomwe kunembo lyabbokesi, bapayilizya mbelele ang'ombe ezyo zitabaliki. ⁷ Bapayizi bakanjizya ibbokesi lyachizuminano cha Jehova kubisena bwelyo, mukati kang'anda, kubusena busalalisya, munsi lyamababa aba kkelubbimu. ⁸ Nkambo kkelibbimu bakali tandabikide mababa abo atala lyabusena bwabbokesi, alimwi bakavumbilila ibbokesi azisamu nzilyakanyampuzigidwe. ⁹ Zisamu zyakali zilamfu loko elyo kumpela lyazyo kwakali kuboneka kuzwa kubusena busalala kunembo lya ng'anda yamukati, pesi tezyakali kuboneka pe kuzwa aanze. Mpuzili akuzuba elino. ¹⁰ Takwepe chakalimo mubbokesi do mabwe obile ayo Mozesi ngakali wabikka mukati ku Holebbu, elyo Jehova nakachita chizuminano abantu ba Izilayeli, elyo nebakabbuda mu Ijiputi. ¹¹ Awo nikwakasika kuti bapayizi babbude kuzwa kubusena busalala. Boonse bapayizi abo bakaliwo bakalisalazya lwabo kuli Jehova, akutalikatazya kumakani azyaabilo zyabo. ¹² Alubo ba Levayiti abo bakali basikwimbilila, bonse, akubikilizya a Asafu, Hamani, Jedutuni, abana babo, abakwabo, bakazwata masani atuba alimwi bakali basikusibana zisobano, tuntimbwa atunamaala alimwi bakalimvwi kubbazu lyakujwe lyachipayilo. Kabali 120 bapayizi kabali kusiba myeembo. ¹³ Alimwi nikwakasika kuti basikusiba mweembo abasikwiimba kabelede kutelezya majwi abo mbuli ijwi lyomwe kukutembawula akakulumba Jehova. Bakasumpula majwi aabo amyeembo atuntimbwa azimwi zibelesyo, alimwi bakatembawula Jehova. Bakayimba, ''Nkambo mubotu, luzyalo lwakwe talumani.'' Mpawo ing'anda, ing'anda ya Jehova, yakazuzigwa ajoba. ¹⁴ Bapayizi bakakachilwa kwimikila kuti babeleke nkambo kajoba, nkambo kabulemu bwa Jehova bwakazuzya ng'anda yakwe.