¹ Josiya wakali aminyaka ili musanu ayitatu yakuzyalwa nakatalika kwendelezya; wakendelezya kwaminyaka ili makumi otatwe awumwi mu Jelusalemu. ² Wakachita ziluleme kubusyu bwa Jehova, akweenda munzila zya Devidi wisi, alimwi takwepe nakaleya kuchilisyo nikuba kochimweensi. ³ Elyo mumunyaka wamusanu ayitatu yamu bwendelezi bwakwe, nakachili mwanike, wakatalika kuyanduula Leza wa Devidi, wisi. Mumunyaka wakkumi ayibili wakatalika kusalazya Juda a Jelusalemu mukumwayula zipayililo zyakuzilundu, amasamu a Asela, azikozyanyo zibezedwe alimwi azikozyanyo zifulidwe. ⁴ Bantu bakamwayula zipayililo zyaba Bbaala kubusyu bwakwe; wakatema zipayililo zyatununkilizyo zyakali alinzizyo. Wakatyola masamu a Asela azikozyanyo zifulidwe akuba bufwefwelenga mane bwaba lusuko. Wakalumwaya mwaya lusuko atubanda twababo ibakali kupayila kulinzizyo. ⁵ Wakatenta mafuwa abapayizi bazyo aazipayililo zyabo. Muli yeyi inzila wakasalazya Juda a Jelusalemu. ⁶ Wakachita zikozyenye mumyunzi ya Manase, Efulemu, aku Simiyoni, akunzila zyonse manekuyosika ku Nafutali, alimwi amumatongo akabazyungulukide. ⁷ Wakatyolweda ansi zipayililo, wakawuma zisamu zya Asela antomwe azikozyanisyo zyakubeza zyabalusuko zyazukila, alimwi wakagonka wanzanisya zyoonse zipayililo zyatununkilizyo munyika yoonse ya Izilayeli. Mpawo wakabweda ku Jelusalemu. ⁸ Lino munyaka wakkumi amusanu ayitatu yabwendelezi bwakwe, nakamana kusalazya nyika ang'anda ya Leza, wakatuma Sofani mwana wa Azaliya, Maseya, silutwe wamunzi, alimwi Jowa mwana mulombe wa Jowazi mulembi, kuti bayakulule ng'anda ya Jehova Leza wakwe. ⁹ Bakaya kuli Hilikkiya, mupayizi mupati, bakamupa mali yakeetwa mung'anda ya Leza, kuti ba Levi, basikulinda milyango, njebakabungika kuzwa kuli Manase a Efulemu, akulamwi masena aba Izilayeli ibakasyaala, kuzwa kuli boonse ba Juda aba Bbenjamini, akuzwa kulibabo balikukkala mu Jelusalemu. ¹⁰ Bakapa mali kubalumi balikulanga mulimo atala eng'anda ya Jehova. Aba balumi bakabbadala basikubeleka abo bakayakulula akubambulula ng'anda ya Jehova. ¹¹ Bakapa basikuupanga kaluli abasikuyaka kuti bawule mabwe abezedwe azisamu zyakuswanizya, akuti ba maate mayake ayo bamwi bami ba Juda ngebakasiya banyonyoona. ¹² Aba balumi bakachita mulimo chakusyomeka. Basilutwe babo ibalikubabelesya mba Johati a Obbediya, ba Levi, bana ba Melali; a Zakkaliya a Mesulamu, bazwa kubana ba Kkohati. Bamwi baba Levi, boonse bakachita obotu kuli zyakwiimba, bakeendelezya basimulimo. ¹³ Aba ba Levi bakali kubalanga abo balikubweeza mikuli yakayaka aboonse bakali kubeleka milimo yamisyobo misyobo. Kwali ba Levi alimwi ibakali balembi, basilutwe, abasikulinda milyango. ¹⁴ Nebakagwisya mali eyo yakeetwa mung'anda ya Jehova, Hilikkiya mupayizi wakajana bbuku lyamulawu wa Jehova ngwakapa kwindilila kuli Mozesi. ¹⁵ Hilikkiya wakambila Safani mulembi kuti, ''Ndajana bbuku lyamulawu mung'anda ya Jehova.'' Hilikkiya wakatola bbuku lyamulawu kuli Safani. ¹⁶ Safani wakatola bbuku kumwami, alimwi wakamwambila wati, ''Balanda bako balokuchita obotu zyoonse nzebakapegwa kuti bazichite. ¹⁷ Bakagwisya yoonse imali yakajanwa mung'anda ya Jehova, alimwi bakiipeda mumaanza aba silutwe abasimilimo.'' ¹⁸ Safani mulembi wakalwiida mwami, ''Hilikkiya mupayizi wandipa bbuku.'' Elyo Safani wakabala mulindilyo babalila mwami. ¹⁹ Elyo mwami nakamvwa majwi amumulawu, wakadelula zyakusama zyakwe. ²⁰ Mwami wakalayilila Hilikkiya, Ahikkamu mwana wa Safani, Abbudoni mwana wa Mikka, Safani mulembi, a Asaya, mulanda wakwe, kuti, ²¹ ''Amwinke mukabuzye luyando lwa Jehova alindime, abaabo ibasyeede mu Izilayeli amu Juda, nkambo kamajwi aabbuku elyo lyakajanwa. Nkambo bwakomena, bukali bwa Jehova obo bwakatilwa alindiswe. Bwakomena, nkambo bamataatesu tebakaswilila pe kumajwi aleeli ibbuku kukubamba makani woonse alembedwe mulindilyo.'' ²² Nkeenkako Hilikkiya ababo mwami mbakalayilila bakiinka kuli Hulida musinsimi mwanakazi, muka Salumu mwana wa Tokkati mwana wa Hasila, sikubamba zisamo (walikukkala mu Jelusalemu mu Bboma lyabili), alimwi bakambuula anguwe mbuboobu. ²³ Wakabaambila kuti, ''Mbubobu Jehova, Leza wa Izilayeli, mbwaawamba: Amukawambile mwalumi wamutuma kulindime, ²⁴ 'mbubobu Jehova mbwawamba: Amubone, mebo ndayanda kweeta mapenzi anyika eyi abantu bayo, woonse matusi alembedwe mubbuku ndibakabala kubusyu bwa mwami wa Juda. ²⁵ Ezi ziyochitika nkambo bakandileka akutentela mizimu myeenzu tununikilizyo, alimwi bandikalazya azyonse nzebachita amanza aabo, eelyo bukali bwangu buyotilwa abusena oobu, alimwi tabukoyolesegwa pe.' ²⁶ Pesi kumwami wa Juda, oyo wamutuma kuyobuzya Jehova ezyo nzyayelede kuchita, nzeezi nzyotakamwambile, 'Jehova, Leza wa Izilayeli waamba oobu: Atala amajwi ayo ngwakamvwa, ²⁷ nkambo moyo wako wakali mutete, alimwi wakalibombya kubusyu bwa Leza niwakamvwa majwi aakwe atala aboobu busena abantu bakkede mumo, alimwi kuti wakalibombya kubusyu bwangu akudelula zyakusama zyako akulila kubusyu bwangu, ambebo ndakuswilila -- nkooku kwambuula kwa Jehova -- ²⁸ Bona, ndiyokusisya kukabanda kako mulumuno, alimwi menso ako takoyobona neliba lyomwe lyamapenzi ngesikayete aliyeyi nhyika abakkala mulinjiiyo.'''Balumi bakatola aya makani kumwami. ²⁹ Elyo mwami wakatuma batumwa akubunganya antomwe boonse bapati ba Juda a Jelusalemu. ³⁰ Mpawo mwami wakayinka kung'anda ya Jehova, aboonse bantu ba Juda abakakkede mu Jelusalemu, abapayizi, ba Levi abantu boonse, kuzwa kubapati kuyosika kubanini. Wakabala kumatwi aabo woonse majwi aabbuku lya chizuminano elyo lyakajanika mung'anda ya Jehova. ³¹ Mwami wakima abusena bwakwe akupanga chizuminano kubusyu bwa Jehova, chakweenda munzila zya Jehova, akubamba milazyo yakwe, milawu yakwe, ambeta zyakwe, chamoyo wakwe wonse achamuya wakwe woonse, kukuswilila majwi achizuminano ayo akalembedwe mulindilyo bbuku. ³² Wakazumizya boonse bakajanika mu Jelusalemu amuchisi cha Bbenjamini kukwiima mu chizuminano. Akukkala mu Jelusalemu bakachita chakulibombya muchizuminano cha Leza, oyo Leza waba sikale babo. ³³ Josiya wakabweza zintu zyoonse zisesemya kuzwa munyika yakapedwe bantu ba Izilayeli. Wakachita kuti boonse bakali mu Izilayeli bakkombe Jehova, Leza wabo. Kumazuba aakwe woonse, tebakapambuka pe kuzwa kukutobela Jehova, Leza wabasikale babo.