¹ Manase wakali aminyaka ilikkumi ayibili yakuzyalwa nakatalika kuba mwendelezi; wakeendelezya minyaka ili makkumi alimusanu amusanu mu Jelusalemu. ² Wakachita bubi mumenso a Jehova, mbuli zisesemyo zyabamaasi aabo Jehova mbakatanda kubusyu bwabana ba Izilayeli. ³ Nkenkaako wakayakulula zikombelo zyakuzilundu ezyo wisi wakwe Hezekkiya nzyakali wamwaya, alimwi wakayaka zipayililo zyaba bbaala, wakachitazisamu zya Asela, akukotamina nyenyezi zyakujulu akuzikomba. ⁴ Manase wakayaka zipayililo mung'anda ya Jehova, nekuba kuti Jehova wakalayilila kuti, ''Mu Jelusalemu moliyoba izina lyangu kwalyoonse.'' ⁵ Wakayaka zipayililo zyanyenyezi zyoonse zyakujulu mumibanzo yobile yamung'anda ya Jehova. ⁶ Mukkuti lya Bbeni Hinomu wakachita kuti bana bakwe biinde mumulilo. Wakalikusonda, akulowa akubala zyabulozi alimwi wakali kubuzyanya abaabo balikwambuula abafwide abaabo balikwaambula amyuuya. Manase wakachita bubi bwindilide kubusyu bwa Jehova, alimwi wakamunyemya. ⁷ Ichikozyanyo chibezedwe nchakapanga, wakachibikka mung' anda ya Leza. Njiiyeyi ing'anda Leza njakambila Devidi a Solomoni mwanakwe; wakatedi, ''Muuli njiyeeyi ng'anda alimwi mu Jelusalemu , eyo njindakasala kuzwa kumisyobo yoonse ya Izilayeli, kuti ndiyobika izina lyangu kwalyoonse. ⁸ Nsikoyobagwisya limbi bana ba Izilayeli kuzwa munyika njindaka babambila kuli bamawisi, na kuti bachita kabotu kukubamba zyoonse nzendakabalayilila, kutobelezya mulawu, milazyo ambeta nzendakapa kwindila kuli Mozesi.'' ⁹ Manase wakazulwida ba Juda abantu bamasi abo Jehova mbakajaya kubusyu bwaba Izilayeli. ¹⁰ Jehova wakambila Manase, akubantu bakwe, pesi takwepe nebakaswilila. ¹¹ Nkeenkako Jehova wakabetela bapati babasilumamba bamwami wa Asiliya, bakajata Manase akumwaanga, bakamwanga ensimbi, akumutola ku Bbabbiloni. ¹² Manase nakali mumapenzi, wakakombelezya kubusyu bwa Jehova, Leza wakwe, akulibombya kapati kubusyu bwa Leza wabamawisi. ¹³ Wakakomba kulinguwe; alimwi Leza wakakombelezegwa anguwe, akumvwa inkombyo yakwe alimwi wakamubwedezya ku Jelusalemu, mubwami bwakwe. Eelyo Manase wakaziba kuti Jehova ngu Leza. ¹⁴ Kusule lyaaya, Manase wakayaka bulambo kunze lyamuunzi wa Devidi, kubbazu lyakumbo lya Gibboni, mukkuti, kusikila kumulyango wa Nswi. Wakazyunguluka chilundu cha Ofelu ambubo akubalampya kapati bulambo. Wakabikka basilutwe bakozu bampi mumyuunzi yoonse yaba Juda ilamabaya. ¹⁵ Wakagwisya ba Leza beenzu, azikozyanyo zyamituni mung'anda ya Leza azipayililo zyoonse nzyakabikkide muchilundu chang'anda ya Jehova amu Jelusalemu, akuzisowa aanze lyamuunzi. ¹⁶ Wakayakulula chipayililo cha Jehova akupayila alinchicho zituuzyo chabunyina akundumbyo; wakalayilila ba Juda kuti bakombe Jehova, Leza wa Izilayeli. ¹⁷ Nekuba boobo, bantu bakachili kupayila kuzilundu, pesi kabapayila kuli Jehova luzutu, Leza wabo. ¹⁸ Amwi makani atala a Manase, inkombyo yakwe kuli Leza, amajwi abalunguluzi ibakamubambila muzina lya Jehova, Leza wa Izilayeli, ngaya, alilembedwe mubbukulyanchito zya baami ba Izilayeli. ¹⁹ Mumalembe aya muli lwaana luli atala ankombyo zyakwe ambuli Leza mbwakasundwa anjiiyo. Alimwi kulilembedwe zibi zyoonse ansotoko amasena nkwakali wayaka zipayililo zyamuzilundu akwimika zisamu zya Asela azikozyanyo zibezedwe, katana kulibombya -- zililembedwe mumakani abalunguluzi. ²⁰ Elyo Manase bakazomulazika abasikale bakwe, akumuvwikka mung'anda yakwe mwini. Amoni, mwanakwe, mwalumi, ngwakatola bwami bwakwe. ²¹ Amoni wakali aminyaka ili makkumi obile ayibili yakuzyalwa nakanjila mubwami; wakayendelezya kwaminyaka yobile mu Jelusalema. ²² Wakachita bubi kumenso a Jehova, mbuli Mananse, wisi, mbwakali kuchita. Amoni wakali kupayila kuzikozyanyo zyoonse zibezedwe eezyo Manase wisi nzyakali wachita, akuzikomba. ²³ Takwe nakalibombya pe kubusyu bwa Jehova, mbuli Manase wisi mbwakachitide. Anukuti, nguyoyo Amoni wakabisya chakwindilila. ²⁴ Balanda bakwe bakamuvwiiya akumujaya mung'anda yakwe. ²⁵ Pesi bantu bamuchisi bakabajaya abo boonse ibakamuvwiya mwami Amoni, akubika Josiya, mwanakwe, kuti abweze bwami.