¹ Musule azintu eezi anchito zyakusyomeka, Senakkelibbu, mwami wa Siliya, wakaza akunjila mu Juda. Wakaza kuzolwanisya idolopo lilalubaya, elyo ndyakalangilide kulitola lwakwe mwini. ² Muchindi Hezekkiya nakabona kuti Senakkalibbu weza akuti uyanda kulwisya Jelusalemu, ³ wakabuzya bazuluzi bakwe abalumi basinguzu kuti basinke tusensa twamanzi twakali aanze edolopo; bakamugwasya kuti achite mbubobo. ⁴ Aboobo bantu biingi bakabungana antomwe akwimikizya tusensa atulonga twakali kukkunka nkatwinda akkati kenyika. Bakati, ''Nkambonzi baami ba Asiliya nibataze akujana maanzi miingi?'' ⁵ Hezekkiya wakaba mukozu alimwi wakayaka bulambo bwakali bwadilika. Wakayaka maanda malamfu, abumwi bulambo bwaanze wakasimya Milo mudolopo lya Devidi, akuchita zilwanio zyingi antobo. ⁶ Wakabika basilutwe benkondo kubantu. Wakabangika kuli nguwe antomwe mubusena bujulikide kumulyango wadolopo akwambula chakusungilizya kuli mbabo. Wakati, ⁷ ''Amuyume akuba bakkozu. Mutayoowi nikuba kutyompwa nkambo kamwami wa Asiliya aampi yonse njalayo, nkambo mpali ulandiswe mupati kwinda mbalabo. ⁸ Njalayo nimpi yenyama, pesi ulaswebo ngu Jehova, Leza wesu, kukutugwasya, akukulwana nkondo yesu'' Mpawo bantu bakalyombozya amajwi a Hezekkiya, mwami wa Juda. ⁹ Musule azezi, Senakkelibbu, mwami wa Asiliya, wakatuma balanda bakwe ku Jelusalemu ( lino wakali kunembo lya Lakkisi, ampi yakwe yakali anguwe), kuli Hezekkiya, mwami wa Juda, aboonse ma Juda bakali mu Jelusalemu. Wakati, ¹⁰ ''Mbubobu Senakkelibbu, mwami wa Asiliya, mbwaamba: Musyomedeenzi kuti musinkilizigwe mu Jelusalemu? ¹¹ Hezekkiya takali kumwena na, kuti amupedekezye kukujigwa anzala anyota, elyo nakamwambila kuti, ''Jehova Leza wanu uyotuvuna kujanza lyamwami waku Asiliya'? ¹² Teensi oyu Hezekkiya nguwaka mwaya masena asumpukide azipayililo akulayilila Juda a Jelusalemu, 'achipayililo chomwe mpomwelede kukkombela, alinchicho mpomwelede kutentela zipayizyo'? ¹³ Tamuzina imebo abasikale bangu nzitwakachita kubantu boonse bakuli zimwi nyika? Teensi baleza babantu bazyungulukide nyika tebalikukkonzya kuvuna nyika zyabo kuzwa kumanguzu aangu? ¹⁴ Akkati kabaleza boonse bazisi eezyo basikale nzibakanyonyoona kumaninsya, kwalo kwakali Leza na wakavuna bantu bakwe kuzwa kujanza lyangu? Nkambonzi Leza wanu naanga ulakkonzya kumuvuna kuzwa kumanguzu aangu? ¹⁵ Lino mutaleki Hezekkiya amwenene nikuba kumuyunga yunga muli yeyi nzila. Kamutamusyomi, nkambo takwe leza wenyika naba bwami bwaka kkonzya kuvuna bantu bakwe kuzwa kujanza lyabasikale bangu. Nkujana nywebo leza wanu wamuvuna biyeni mukuboko kwangu?'' ¹⁶ Balanda ba Sanikkalebbu bakambula zyingi atala a Jehova Leza alimwi aatala a Hezekkiya mulanda wakwe. ¹⁷ Senakkelibbu wakalemba amagwalo kuti aniake Jehova, Leza wa Izilayeli, akwambula nkalangene anguwe. Wakati, ''Mbukunga abaleza bayimwi mikowa yenyika tabakonzezye kuvuna bantu babo kuzwa kujanza lyangu, aboobo baleza ba Hezekkiya tabakoyovuna bantu bakwe kuzwa kujanza lyangu.'' ¹⁸ Bakakwila mumulaka wachi Juda kubantu baku Jelusalemu abo bakali abulambo, kukubayoosya akubakkatazya, kuti batole dolopo. ¹⁹ Bakaamba kuli Leza waku Jelusalemu mbuli mbwakamba kulaze bazimwi nyika, bakali milimu yamaanza abantu. ²⁰ Hezekkiya, mwami, antomwe a Isaya mwana mulombe wa Amozi, musinsimi, wakakomba nkambo kamakkani aya alimwi wakakwilila ijulu. ²¹ Jehova wakatuma angelo, oyo wakajaya balumi basikulwana , bapati benkondo, abasilutwe bamwami mumusansa. Aboobo Senakkelibbu wakabweda kunyika yakwe nkawuside abuusu kumenso akwe. Eelyo nakaya mung' anda ya Leza wakwe, bamwi bana bakwe bakamujaya epanga. ²² Muleyi inzila, Jehova wakavuna Hezekkiya abakkala mu Jelusalemu kuzwa kujanza lya Senikkalebbu mwami wa Asiliya, akuzwa mukuboko kwabamwi boonse, akubapa kulyokezya kuzwa kumabazu woonse. ²³ Banji bakeeta zipo kuli Jehova mu Jelusalemu, azipo ziyandisi kuli Hezekkiya mwami wa Juda, elyo wakasumpulwa mumenso azisi zyoonse kuzwa kulecho chiindi akuya kunembo. ²⁴ Kuli ayo mazuba Hezekkiya wakachiswa chakufwa. Wakakkomba kuli Jehova, wakambula kuli nguwe akumupa chitondezyo kuti uyopona. ²⁵ Pesi Hezekkiya takabbadala kuli Jehova lugwasyo ndwakapedwe, nkambo moyo wakwe wakasumpulwa. Aboobo bukkali bwakamuselukila akuli Juda aku Jelusalemu. ²⁶ Nikubaboobo, Hezekkiya wakazolibombya kukulisumpula kwamoyo wakwe, lwakwe abakali mu Jelusalemu, aboobo kuti bukkali bwa Jehova tebwakasikila mumazuba a Hezekkiya. ²⁷ Hezekkiya wakali abuvubi bwiingi abulemu. Wakali chitila maanda akulondweda nsiliva, angolida, mabwe mayandisi, abutwizyo azya ntobo azya zyoonse zintu ziyandisi. ²⁸ Wakali amaanda alimwi akutyolela zilyo, wayini mupya, amafuta azyaata zyazivubwa zisiyene siyene. Wakali amatanga alimwi amuzyaata zyawo. ²⁹ Mukuyungizya, wakali amadolopo ambono zyambelele ang'ombe nyiingi, nkambo Leza wakali wamupa buvubi bwingi loko. ³⁰ Ngonguwe oyu Hezekkiya wakajala kasensa kaajulu kamaanzi ku Gihoni, alimwi wayinzizya nkaluleme kumbo lyamuunzi wa Davida. Hezekkiya wakazwidilila mumilimo yakwe yoonse. ³¹ Nekuba boobo mumakani abangambela abapati baku Bbabbiloni, ibakatuma kukubuzya mibuzyo yababo bakeezi, atala azitondezyo zigambya eezyo zyaka chitikene munyika, Leza wakamaninsya alikke lwakwe, kuti amusunke, akuti azibe zyoonse zyakali mumoyo wakwe. ³² Lino mumakani aamwi alangene a Hezekkiya, kubikilizya anchito zyakwe zyachizuminano zyabululami, ulabona kuti zyakalembedwe muchilengano chamusinsimi Isaya mwana wa Amozi, amubbuku lyabaami ba Juda aba Izilayeli. ³³ Hezekkiya wakoona antomwe abamawisi, alimwi bakamuvwikka muchilundu chatubanda twakali twalunyungu lwa Davida. Ba Juda boonse abakkala mu Jelusalemu bakamulemeka kukufwa kwakwe. Manase mwana wakwe mulombe nguwakaba mwami mubusena bwakwe.