¹ Hezekkiya wakatuma batumwa kuli boonse ba Izilayeli abaJuda, alubo wakalembela Efulemu a Manase magwalo, kuti basike kung' anda ya Jehova mu Jelusalemu, kuzobotelwa pobwe lyakwindilila kuli Jehova, Leza waba Izilayeli. ² Nkaambo mwami, abazuluzi bakwe, alimwi aboonse bembungano yamu Jelusalemu bakabuzisisya aantomwe, nkabalokuzeza kubotelwa iPobwe lyakwindilila mumwezi wabili. ³ Tebakali kubotelwa ipobwe chiindi choonse, nkambo tibakalikwe bapayizi balisalazizye lwabo kukusekelela pobwe alimwi bantu tebakalinakubungana aantomwe mu Jelusalemu. ⁴ Aaya makani akaboneka nkaaluleme kumenso amwami ambungano yoonse. ⁵ Aboobo bakazumina kumwaya ijwi mu Izilayeli yoonse, kuzwa kuBbiyasyebba kuyosika ku Dani, kuti bantu beelede kusika kuzosekelela ipobwe lyapasika kuli Jehova, Leza waba Izilayeli, mu Jelusalemu. Nkambo tibalinabuunsi balichita amyeelwe mipati yabantu mukutobelezya mumalembe. ⁶ Aboobo batumwa bakiinka amagwalo kuzwa kumwami abazuluzi bakwe kuli boonse ba Izilayeli a Juda, mbuli mukulayililwa kwamwami. Bakati, '' Inywe bantu ba Izilayeli, amubole kuli Jehova, Leza wa Abulahamu, Isaki, aIzilayeli, kuchitila kuti aboole kulibamwi bakachala ibakachija kuzwa kujaanza lyabaami ba Asiliya. ⁷ Mutabi mbuli basikale benu na bakulana benu, bakabisizya Jehova, Leza wabasikale wabo, kuchitila kuti bachite chigambyo, mbuli mbumukubwene. ⁸ Lino mutayumwi nsingo zyenu, mbuli mbubakabede basikale benu; anukuti, mulipedekezye lwenu kuli Jehova alimwi musike mubusena bwakwe busalala, obo mbwakasalazya kwalyoonse, alimwi mukombe Jehova Leza wenu, aboobo kuchitila kuti bukali bwakwe buyosya bwalinozwa kulindinywe. ⁹ Nkaambo na mwabola kuli Jehova, bakulana benu abana balinojana kufwidwa luzyalo lutanzi kulabo bakabapilusya mbuli baange, alimwi bayoboola muleyi nyika. Nkambo Jehova Leza wenu uli aluuse abuya, alimwi takoyogwisya busyu bwakwe kuzwa ndinywe, na mwaboola kulinguwe.'' ¹⁰ Aboobo batumwa bakazyendela zisi zyoonse mumasena aEfulemu aManase, munzila yoonse kosika kuZebuluni, pesi bantu bakabaseka akubafubazika. ¹¹ Nikuba boobo, bamwi baalumi baku Asa aManase aZebuluni bakalibombya alimwi basika mu Jelusalemu. ¹² Jaanza lya Leza alubo lyakasika aatala lyaa Juda kuzobapa moyo uumwi, kukuchita malayilile amwaami abazuluzi kuzwa mujwi lya Jehova. ¹³ Bantu biingi, mbungano mpati, bakabungana mu Jelusalemu kuzolya Pobwe lyakindilila lyachikwa chitakwe bumena mumwezi wabili. ¹⁴ Bakanyampuka alimwi babweza zipayililo zyakali mu Jelusalemu, alimwi azipayililo zyoonse zyatununkilizyo; bakaswela mumulonga wa Kidiloni. ¹⁵ Mpawo bakajaya tubelele twe pobwe lyakindilila mubuzuba bwa kumi aane bwamwezi wabili. Bapayizi aba Levi bakafwa nsoni, aboobo bakalisalazya alimwi bakeeta zipayizyo zitentedwe zyezipo mung'anda ya Jehova. ¹⁶ Baakima abusena bwabo mbuli mutubunga twabo, nkabalokutobelezya malayilile apedwe mumulawu wa Mozesi, mwalumi wa Leza. Bapayizi bakasansila bulowa oobo mbubakatambula kuzwa mumaboko aba Levi. ¹⁷ Nkaambo bakalibingi mumbungano bakatanalisalazya lwabo beni. Nkinkaako ba Levi bakajaya tubelele twe Pobwe lyakwindilila twawoonse walitanasalazigwa alimwi tibalino salazya zipayizyo zyabo kuli Jehova. ¹⁸ Nkaambo mubule bwabantu, bwiingi bwabo baazwa kuli Efulemu aManase, Izaka aZebuluni, tibalinalisalazya lwabo beni, nkabali bakalya chilyo chapobwe lyakwindilila, zitalinzizyo zyakalembebwe mumalayilile. Nkambo Hezekiya wakali wabakombela nkati, ''Leza mubotu nikuli walekelela muntu woonse ¹⁹ wabika moyo wakwe kukuyandula Leza, Jehova Leza wabasikale,wakwe, nikuba kuti talina lisalazya mbuli mumwelwe wakulisalazya kwabusena busalalisya. ²⁰ Aboobo Jehova wakaswilila Hezekiya akuponia muntu. ²¹ Ibantu ba Izilayeli bakaliwo mu Jelusamu bakabamba pobwe lyachinkwa chitakwe bumena kwamazuba alimusanu aabili akubotelwa kupati, ba Levi aba payizi bakalumbayizya Jehova buzuba abuzuba, balikwimba azilizyo zyompolola kuli Jehova. ²² Hezekiya wakasungilizya boonse ba levi bakamvwisisya mulimu wa Jehova. Aboobo bakalya balimanisizya pobwe kwamazuba alimusanu aabili, akupeda zipayizyo zyabulidilano, alimwi akulyamba zibi kuli Jehova, Leza wabasikale babo. ²³ Mpawo mbungano yoonse mbizulwa yakazuminana kuti babotelwe pobwe kwamazuba aambi alimusanu aabili, bakachita mbubo akubotelwa. ²⁴ Nkaambo Hezekiya mwaami wa Juda wakapa mbungano bajende beng'ombe bali chuulu chomwe ambele zili zyuulu zilimusanu azibili mbuli chipo; alimwi bazuluzi bakapa mbungano bajende beng'ombe bali chuulu chomwe azyuulu zilikumi zyembelele ampongo. Bapayizyi biingi bakalisalazya lwabo beni. ²⁵ Yoonse mbungano ya Juda, abapayizi aba Levi alimwi aboonse bantu bakaza antomwe kuzwa ku Izilayeli, abeenzu bakasikide kuzwa kunyika yaku Izilayeli ababo bakali kukala ku Juda- boonse bakabotelwa. ²⁶ Aboobo kwakaba kubotelwa kupati mu Jelusalemu, nkaambo kuzwa muchindi cha Solomoni mwana wa Devidi, mwaami wa Izilayeli, tikwakalinaba chintu chilimbuli nchichechi mu Jelusalemu. ²⁷ Mpawo bapayizi, ba Levi, bakanyampuka alimwi bakalongezya bantu. Ijwi lyabo lyakamvwika, ankombyo zyabo zyakayinka kujulu, busena busalala aawo Leza mpakala.