¹ Hezekkiya wakatagun kweendelezya eelyo nakali aminyaka ili makkumimobile amusanu kukomena; wakeendelezya minyaka ili makkumi obile amusanu ayine mu Jelusalema. Izina lya banyina wakali Abija; wakali mwana musimbi wa Zekkaliya. ² Wakachita zyakaluleme kumenso a Jehova, mbuli Deviti wisi wakwe mbakachita. ³ Mumunyaka mutaaanzi wakweendelezya kwakwe, mumweezi mutanzi, Hezekkiya wakajula makkoma aan'anda ya Jehova alimwi wakaabambulula. ⁴ Wakeeta bapayizi alimwi a ba Levi, alimwi wakababungania aantomwe mulubuwa kubbazu lya kujwe. ⁵ Wakati kulimbabo, ''Muswiliile kulindime inywe no ba Levi! Mukalisalazye, alimwi mukasalazye n'anda ya Jehova, Leza wabamataata benu, alimwi mukagwisye busofwazi kuzwa kubusena busalala. ⁶ Nkaambo baataata bsu bakasotoka milawu alimwi bakachita zyakalikutondwa kunembo lya Jehova Leza wesu; bakamusiya, bakagwisya masyu aabo kuzwa kubusena oko Jehova nkwakkala, alimwi babufutatila. ⁷ Alimwi bakajala milyango ya chinjililo alimwi bazima malampi; tebakatenta pe tununkilizyo na kupa zipo zyakutenta mubusena busalala kuli Leza wa Izilayeli. ⁸ Aboobo bukkali bwa Jehova bwakaselukila Juda a Jelusalema, alimwi wakabachita kuti babe zintu zyabuyoofu, zipa kuyowa alimwi zibula bulemu mbuli mbumubona amenso enu. ⁹ Aaka nkinkaako ba mataata besu nchibakajiigwa epanga, alimwi bana besu balombe, bana besu basimbi, alimwi a bakayintu besu nchibali mubwaange akaambo kacheechi. ¹⁰ Lino zili mumoyo wangu kuti ndichite chizuminano a Jehova, Leza wa Izilayeli, kuchitila kuti kunyema kwakwe kuyoosya kusosoloke kuzwa kulindiswe. ¹¹ Nobana bangu balombe, mutabi batolo lno, nkaambo Jehova wamusala kuti mwiimikile kunembo lyakwe, kuti mumukombe, alimwi kuti mube balanda bakwe alimwi mutente tununkilizyo.'' ¹² Mpawo ba Levi bakabuka: Mahati mwana mulombe wa Amasayi, a Joweli mwana mulombe wa Azaliya, kubantu ba ba Kkohati; alimwi kubantu ba Melali, Kkisi mwana mulombe wa Abudi, a Azaliya mwana mulombe wa Jehaleleli; alimwi ku ba Gesoni, Jowa mwana mulombe wa Zima, a Edeni mwana mulombe wa Jowa; ¹³ kulunyungu lwa Elizafani, Simuli a Jehuweli; alimwi akulunyungu lwa Asafu, Zekkaliya a Mataniya; ¹⁴ kulunungu lwa Hemeni, Jehuweli a Simeyi; alimwi akulunyungu lwa Jedutani, Semayiya a Uziyeli. ¹⁵ Bakabunganisya bakkulana babo, bakalisalazya beni, alimwi bakanjila mukati mbuli baakalayilila mwaami, mukutobelezya majwi a Jehova, kuti asalazye n'anda ya Jehova. ¹⁶ Bapayizi bakanjila muchimpanzi chamukati chen'anda ya Jehova kukuyoochisalazya; bakagwisya busofwazi boonse mbubakajana mutempele ya Jehova mulubuwa lwa n'anda. Ba Levi bakabubweza kuti bakabugwisye akubutola ku kalonga Kkidiloni. ¹⁷ Lino bakatanguna lusalazyo mubuzuba butaanzi bwa mweezi mutaanzi. Mubuzuba bwa musanu aatatu bwa mweezi bakasikila chinjililo cha Jehova. Mpawo kwamazuba aambi aali musanu aatatu bakasalazya n'anda ya Jehova. Mubuzuba bwa kkumi alyomwe zuba lya mweezi mutanzi bakamaninsya. ¹⁸ Mpawo bakiinka kuli Hezekkiya, mwaami, mukati ken'anda ya mwaami alimwi bakati, ''Twayisalazya yoonse n'anda ya Jehova, chipayililo chazipo zyakutenta azibelesyo zyacho zyoonse, alimwi a tafula lya chibunge cha buliwo, azibelesyo zyalyo zyoonse. ¹⁹ Akaako twabamba limwi twasalazya zyoonse zintu eezyo Mwaami Ahazi nzyakagwisizye eelyo nakachita chakutasyomeka muchiindi chabweendelezi bwakwe. Bona, zili kuembo lya chipayililo cha Jehova.'' ²⁰ Mpawo Hezekkiya wakabuka chifumo alimwi wabungania bazululi ba chisi; wakayinka kun'anda ya Jehova. ²¹ Bakeeta basune bali musanu ababili, bagutu bali musanu ababili, mbele zili musanu azibili, alimwi a zipule zili musanu azibili mbuli chipo cha chibi cha bwaami, cha lukwabililo a cha Juda. Wakalayilila bapayizi ba lunyungu lwa Aloni, kuti bazipayile aachipayilo cha Jehova. ²² Aboobo bakajaya basune, alimwi bapayizi bakatambula bulowa alimwi bakabusansiila aachipayililo. Mpawo bakajaya bagutualimwi bakasansiila bulowa bwabo aachipayililo; alimwi alubo bakajaya mbelele alimwi bakasansiila bulowa bwayo aachipayililo. ²³ Bakeeta mpongo n'enze zyachipo chachibi kunembo lya mwaami a chibunga; bakabika maanza aabo alimbabo. ²⁴ Bapayizi bakazijaya alimwi bakachita chipo chachibi abulowa bwazyo achipayililo kuchita lubweedezyo lwa Izilayeli woonse, nkaambo mwaami wakali walayilila kuti chipo chakutenta a chipo chachibi cheelede kuchitwa kuli Izilayeli woonse. ²⁵ Hezekkiya wakabika ba Levi mun'anda ya Jehova ili abuntimbwa, mitetele a myeembo, kuzibamba mbuli mumalayilile a Deviti, Gadi, linso lya mwaami, Natani, musinsimi, nkaambo malayilile akazwide kuli Jehova kwiinda mubasinsimi bakwe. ²⁶ Ba Levi bakiimikila azilizyo zya Deviti, alimwi bapayizi amyeembo. ²⁷ Hezekkiya wakabalayilila kuti bape chipo chakutenta aachipayililo. Eelyo chipo chakutenta nichakatanguna, lwiimbo lwa Jehova lwakatalika alulalo, aantomwe a myeembo aantomwe a zyakulizya zya Deviti, mwaami wa Izilayeli. ²⁸ Choonse chibunga chakakomba, bayimbi bakayimba, alimwi basikulizya myeembo bakalizya; zyoonse eezi zyakayinkilila kunembo kusikila chipo chakutenta chamana. ²⁹ Eelyo nibakamana zipo, mwaami aboonse bakaliwo anguwe bakakotoma alimwi bakakomba. ³⁰ Mukuyungizya, Hezekkiya, mwaami, abazululi bakalayilila ba Levi kuti biimbe ntembawuzyo chalukondo, alimwi bakakotama alimwi wakomba, ³¹ Mpawo Hezekkiya wakati, ''Lino mwalisalazya kuli Jehova. Muze okuno alimwi mweete zituuzyo a zipo zyakulumba, alimwi boonse bakali amoyo uyanda bakeeta zipo zyakutenta. ³² Mweelwe wazipo zyakutenta mbungano nziyakeeta wakali basune bali makkumi ali musanu aabili, bagutu bali mwaanda, alimwi ambelele n'enze zili myaanda yobile. Zyoonse eezi zyakali zyachipo chakutenta kuli Jehova. ³³ Zipo zyakasalazigwa zyakali nkabe zili myaanda ili musanu awumwi alimwi ambelele zili zyuulu zyotatwe. ³⁴ Pesi bapayizi bakali bache loko kuti bafunde zyoonse zio zyakutenta, aboobo bakulana babo ba Levi, bakabagwasya kusikila mulimu wamana, alimwi kusikila bapayizi balisalazya beni, nkaambo ba Levi bakali kulangisisya kapati kukulisalazya beni kwiinda bapayizi. ³⁵ Mukuyungizya, zipo zyakutenta zyakali zyiingi loko; zyakachitwa aamafuta aazipo zyabulyidilano, alimwi kwakali zipo zyakunywa kuli chimwi achimwi chipo chakutenta. Aboobo kubeleka kwan'anda ya Jehova kwakabambwa kabotu. ³⁶ Hezekkiya wakabotelwa, alimwi abantu boonse lubo, akaambo kazeezyo Leza nzyakabambila bantu, nkaambo mulimu wakachitwa chakufwambana.