¹ Ahazi wakali aminyaka ili makumi abili nakatalika kwendelezya, alimwi wakendelezya kwaminyaka ilikumi amusanu awumwi mu Jelusalemu. Takachita ziluleme pe kunembo lyamenso aJehova, mbuli Devidi sikale wakwe mbakalikuchita. ² Nkabela, wakenda munzila zyabaami ba Izilayeli; alubo wakafula zikozyano zyaba Bbaala. ³ Mukuyungizya, wakatenta tununkilizyo Mumpata lya Beni Hinomu alimwi wakachita kuti bana biinde mumulilo; mukwinda mukutobelezya bukombi bwazikozyano zyabantu aabo Jehova mbakali watanda kuzwa munyika yabo kunembo lyabantu ba Izilayeli. ⁴ Wakapayilila akutenta tununkilizyo anyika zinanukide aatala lyezilundu amunsi lyamusamu woonse wesokwe teete. ⁵ Nkinkaako Jehova Leza wa Ahazi wakamupeda kujanza lyamwaami wa Alamu. Ba Alamu bamuzunda alimwi bakabweza baange biingi, kubeeta ku Damasikasi. Ahazi alubo wakapedekezegwa mujanza lyamwami wa Izilayeli ibakamuzunda alujayo lupati. ⁶ Nkaambo Peka mwana wa Lemaliya muzuba lyomwe wakajaya basilumamba bali 120 000 mu Juda alimwi boonse bakali baalumi basinguzu, nkaambo bakalibakaka Jehova Leza wabasikale babo. ⁷ Zikili, mwalumi singuzu uzwa ku Efulayimu, wajaya Maseyiya mwana wamwaami, Azilikamu, silutwe wangánda yamwaami, alimwi Elukana, wakali afwifwi amwaami. ⁸ Basilumamba baba Izilayeli bakabweza bazike kuzwa muluzubo lwabo bali 200 000 banakazi, balombe abasimbi. Alubo bakabweza lubono lwakwangila oolo ndubakabweeda aalo ku Samaliya. ⁹ Pesi musinsimi wa Jehova wakaliwo, izina lyakwe wakali Odedi. Wakinka koswanana abasilumamba bakalikuza mu Samaliya. Wakati kuli mbabo, '' Jehova, Leza wabasikale benu, wakanyema aJuda, wakabapedekezya mujanza lyako. Pesi wakabajaya chabukali bwakasika akujulu. ¹⁰ Lino uyanda kulele baalumi abanakazi ba Juda aJelusalemu mbuli bazike bako. Pesi tamukwe mulandu na wazibi zyanu aatala aJehova Leza wenu? ¹¹ Mpawo lino muswilile kulindime: Amubwedezye baange, aabo mbimwakabweza babakulana benu, nkaambo bukali bwa Jehova bulalindinywe.'' ¹² Mpawo bamwi bazuluzi babantu ba Efuleyimu- Azaliya mwana Jehonani, Belechiya mwana wa Mesilemoti, Jehizikiya mwana wa Salumu, Amasa mwana Hadilayi, wakanyampuka nkalwana ababo bakabola kuzwa kunkondo. ¹³ Bakati kulimbabo, ''Tamwelede kweeta baange okuno, nkaambo muyanda kuchita chimwi chintu eecho chitatwetele chibi kuli Jehova, kuyungizya kuzibi zyesu amilandu, nkaambo mulandu wesu mupati, alimwi kulibukali buyumu aatala lya Izilayeli.'' ¹⁴ Aboobo baalumi basilumamba bakasiya baange alimwi ambono zyakwangila kunembo lyabazuluzi ambungano yoonse. ¹⁵ Baalumi aba bakakwamba azina bakabuka alimwi bakabweza baange, akubazwatika boonse bakalichinkuna akati kabo aalubono lwakwangila. Bakabazwatika alimwi bakabapa nsangu. Bakabapa chakulya kuti balye akunya. Bakabasilika zilonda zyabo akubweza abo boongedwe aamadonki. Bakababwedezya kumpuli zyabo ku Jeliko, ( bakamba kuti chisi cha Palumuzi). Mpawo bakabweda ku Samaliya. ¹⁶ Muchiindi eecho mwaami Ahazi wakatuma batumwa kubaami ba Asiliya kobakumbila kuti bamugwasye. ¹⁷ Alubo ba Idomu bakasika alimwi bakalwisya ba Juda, bakabweza baange. ¹⁸ Ba Filisitiya alubo bakanjila babweza zisi zilimunyika ilimunsi azya Negevu wa Juda. Bakabweza Betisemesi, Ayijaloni, Gedeloti, Soko amgunzi aayo, Timina amagunzi aayo, Gimizo lubo amgunzi aayo. Bakayinka kokala mumasena aayo. ¹⁹ Nkaambo Jehova wakaboozya Juba munsi nkaambo ka Ahazi, mwaami wa Izilayeli; nkaambo wakanyonganiya mu Juda alimwi wakali wabisizya Jehova chakwindilila loko. ²⁰ Tigilati- Pilesa, mwami wa Izilayeli, wakasika kulinguwe alimwi wakamupenganiya kutali kumusimya. ²¹ Nkaambo Ahazi wabba mungánda ya Jehova alimwi mumamanda abazuluzi, kuti ape baami ku Asiliya zintu zibotu. Pesi kuchita boobu takwe nchichakamugwasya. ²² Ngonguwe mwami Ahazi wakabisya loko zyiindilide kuli Jehova muchiindi chakwe chakufwaba. ²³ Nkaambo wakapayilila kuli ba leza ba Damasikasi, baleza bakalibamuzunda. Wakati, ''Nkaambo kabaleza babaami ba Alamu bakabagwasya, ndiyoopayilila kulimbaabo, kuchitila kuti balakozya kugwasizya ambebo.'' Pesi bakalikumusofwazya aba Izilayeli boonse. ²⁴ Ahazi wabunganisya antomwe zibelesyo zyamungánda ya Leza alimwi wakazigonkola muzipanzi. Wakajala milyango yengánda ya Jehova alimwi wakalichitila lwakwe mwini zipayililo mumabazu woonse a Jelusalemu. ²⁵ Muchisi choonse cha Juda waachita masena asumpukide aakutentela zipayizyo kuli bamwi ba leza. Wakabisizya Jehova, Leza wabasikale bakwe, kuti anyeme. ²⁶ Lino zichito zyakwe zyoonse, anzila zyakwe zyoonse, kumatalikilo akumamanino, bona zililembedwe mu bbuku lyabami ba Juda aIzilayeli. ²⁷ Ahazi wakalazikwa abasikale bakwe, alimwi bakamuzika muchisi, mu Jelusalemu, pesi tibakamweta pe kutubanda twabaami ba Izilayeli. Hezekiysa, mwanakwe mulombe, wakaba mwaami abusena bwakwe.