¹ Muuya wa Leza wakasika aali Azaliya mwana mulombe wa Obbedi. ² Wakazwa kuyoswanana aa Asa akwaamba kuti kulinguwe, ''Ndiswilile, Asa, aba Juda boonse aba Bbenjamini: Jehova uli anywebo, na nywebo muli anguwe. Na mwamulangula, uyojanwa aandinywe; pesi na mwamutakata, uyomutakata. ³ Lino kwachiindi chilamfu, Izilayeli tewakali a Leza wanchoonzyo, katakwe mupayizi wakuyiisya, akubula mulawo. ⁴ Pesi nibakali mukufwaba bakachebukila kuli Jehova, Leza wa Izilayeli, akumuyanduula, wakajanwa ambabo. ⁵ Mulizeezyo zyiindi tekwakali luumuno kuli yooyo walikuzwa, na kuliyooyo walikunjila; anukuti, mafwabi mapati akali abakkali boonse bamunyika. ⁶ Bakapwayikana muzimpanzi, chisi achisi nyina, amunzi amunzinyina, nkambo Leza wakali kubafwabya aamapenzi woonse. ⁷ Pesi koyuma, akutazuminina maanza ako kuteta, nkambo mulimu wako uyolumbulwa.'' ⁸ Asa nakamvwa majwi aya, businsimi bwamusinsimi Obbedi, wakaba mukozu akugwisya zyakali kuchisya moyo kuzwa munyika yoonse ya Juda a Bbenjamini, akuzwa mumyuunzi eeyo njakali wabweza kuzwa kunyika yazilundu zya Efulemu, mpawo wakayakulula chipayililo cha Jehova, eecho chakali kunembo lyakkota lya mun'anda ya Jehova. ⁹ Wakabungika ba Juda boonse aba Bbenjamini, abaabo bakakkede ambabo - bantu bakali kuzwa kuli Efuleyimu a Manase, akuli Simiyoni. Nkambo bakasika kulinguwe mumweelwe mupati kabazwa ku Izilayeli, nibakabona kuti Jehova Leza wakwe wakali anguwe. ¹⁰ Mpawo bakabungana antomwe ku Jelusalemu mumwezi watatu, mumwaaka wakkumi amusanu wabwendelezi bwa Asa. ¹¹ Bakapayizya kuli Jehova mubuzuba oobo zimwi zyazisaalo eezyo nzibakatelede: myaanda ili musanu ayibili yamitwe yang'ombe ambelele zili zyuulu zili musanu azibili ampongo. ¹² Bakanjila muchizuminano kukuyanduula Jehova, Leza wabasikale babo, amoyo wabo woonse amuuya wabo woonse. ¹³ Bakazuminana kuti kufumbwa wakakaka kuyanduula Jehova, Leza wa Izilayeli, welede kujayigwa, nikuba muntu munini naba mupati, nikuba mwalumi naba mwanakazi. ¹⁴ Bakakkonka kuli Jehova ajwi pati, akoompolola, atuntimbwa amyeembo. ¹⁵ Ba Juda boonse bakabotelwa kuchikonke, nkambo bakakonkede aamoyo wabo woonse, alimwi bakayanduula Leza achiyandisyo chabo choonse, mpawo wakajanwa aambabo. Jehova wakabapa luumuno kumabazu akaba zyungulukide. ¹⁶ Alubo wakagwisya Maakka, banyinakulu, kuzwa kukuba mwendelezi wachanakazi, nkambo bakali bachita chikozyanio chichisya moyo kuzwa kutanda lya Asela Asa wakagoonkola chikozyanio chichisya moyo, wachikwiiya kuba lusuko akuchuumpa kukalonga ka Kkidiloni. ¹⁷ Pesi masena aatala taakwe nakagwisigwa pe ku Izilayeli. Nikuba boobo, moyo wa Asa wakalilipedelede chakumaninina mazuba aakwe woonse. ¹⁸ Wakaleta mun'anda ya Leza nsiliva angolida azintu eezyo nzyakasalazya azyasalazigwa aawisi nkambo kamulimu. ¹⁹ Tekwakachili nkondo limbi pe mane mwaaka wachimakkumi aatatu amusanu wabwendelezi bwa Asa.