¹ Mumunyaka wakkumi amusanu ayitatu yamwaami Jelohobbowamu, Abbija wakatanguna kwendelezya Juda. ² Wakeendelezya kwamyaaka iitatu mu Jelusalemu, izina lyanyina wakali Mikkaya, mwana musimbi wa Izilayeli waku Gibbiya. Kwakali nkondo akati ka Abbija a Jelobbowamu. ³ Abbija wakiinka kunkondo abasilumamba basimide, basilumaba bakozu, balumi bali 400,000 bakasalidwe. Jelobbowamu wakabamba mindando yazilwanisyo akati kakwe yakali abalumi bali 800,000 bakasalidwe, basimide, basilumamba bakozu. ⁴ Abbija wakimikila achilundu cha Zemalayimu, chili munyika yachilundu cha Efulemu, alimwi wakaamba kuti, ''Muswilile kulindime, Jelobbowamu a moonse noma Izilayeli ! ⁵ Tamuzina kuti Jehova Leza wa Izilayeli wakapa bwami bwa Izilayeli kuli Devidi alunyungu lwakwe kwalyoonse achizuminano chitamani ? ⁶ Pesi Jelobbowamu mwana mulombe wa Nebbati, mulanda wa Solomoni mwanakwe mulombe wa Devidi, wakabuka akupapila simalelo aakwe. ⁷ Balumi babuyo, bantu balangilwa aansi, baka mubunganina. Bakasika akupapila Lehobbowamu mwana mulombe wa Solomoni, chiindi Lehobbowamu nakachili mwanikenike alimwi takalikweluzibo pe akutakonzya kubayimikilila. ⁸ Eelyo lino nywebo mubamba kukaka bwami bwa Jehova bwakabikwa mumaanza alunyungu lwa Devidi, nkambo muli basilumamba biingi, alimwi mulatunamani twangolide ooto Jelobbowa ntwakamuchitila kuti tube baleza benu. ⁹ Pesi temwakanda bapayizi ba Jehova, lunyungu lwa Aaloni, aba Levi, akuchita bapayizi benu munzila ikozyenie abantu bamunyika zimbi mbubachita? Kufumbwa usika akubeleka mbuli mupayizi, kupayilila musune munini abagutu bambelele balimusanu ababili ngawaba mupayizi wabaabo batali baleza. ¹⁰ Pesi mbuli kulindiswe, Jehova ngu Leza wesu alimwi tatuna kumuleka, tulapayizya, lunyungu lwa Aaloni, babelekela Jehova, aba Levi, bali mumilimu yabo. ¹¹ Chifumo woonse agoko balawumpila Jehova zipayizyo zyakumpilizya atununkilizyo. Alimwi bakali kubamba chinkwa chabuliwo aatebuli lisalala, balikubamba lubo zyakubikila malampe zyangolida nkazili amalampe azyo, kuchitila kuti bawumpe goko agoko. Tulabamba milazyo ya Jehova, Leza wesu, pesi inywe mwamukaka buyo. ¹² Langa, Leza ulandiswe kumutwe wesu, abapayizi bakwe bali waano azyakulizya mweembo kuti alizye mweembo kuti bazomulwisye. Bana balombe ba Izilayeli, mutalwani a Jehova, Leza wabasikale babo, nkambo tamukoyozwidilila pe.'' ¹³ Pesi Jelobbowamu wakabambila basikuyuba bakali musule lyabo, basilumamba bakwe bakali kunembo lya Juda, abasikuyuba bakali musule lyabo. ¹⁴ Juda nakalanga musule, wakabona, kulwana kwakali koonse kunembo lyabo. Bakalilila Jehova, mpawo bapayizi bakali kulizya myeembo. ¹⁵ Eelyo balumi baku Juda bakakompolola, nibakoompolola, zyakaza mbuli kuti Leza wakawuma Jelobbowamu ama Izilayeli wonse kunembo lya Abbija a Juda. ¹⁶ Bantu ba Izilayeli bakachija kunembo lya Juda, alimwi Leza wakabapeda mumaanza a Juda. ¹⁷ Abbija abasilumamba bakwe bakabajaya aluumo lupati, 500,000 balumi bakasalidwe baku Izilayeli bakajayigwa. ¹⁸ Munzila eeyi, bantu baku Izilayili mbubakachitwa kuchindi eecho; bantu baku Juda bakazwidilila nkambo bakali kuponena kuli Jehova, Leza wabasikale babo. ¹⁹ Abbija wakayindilila kunembo kuli Jelobbowamu; wakabweza myuunzi kuli nguwe: Bbeteli amagunzi awo, Jesana amagunzi aawo, a Efuloni amagunzi aawo. ²⁰ Jelobbowamu takajana nguzu lubo mumazuba a Abbija; Jehova wakamuuma, mpwawo wakafwa. ²¹ Pesi Abbija wakaba anguzu, wakabweza banakazi bakali ikkumi abane alimwi wakaba wisi wabana balombe bali makkumi aabili abana basimbi balikkumi amusanu awumwi. ²² Yoonse milimu ya Abbija, inchito zyakwe, amajwi alilembedwe mulwaano lwamusinsimi Ayido.