¹ Nichakasika chiindi bwendelezi bwa Lehobbowamu bwakalemekwa alimwi wasikuba nguzu, zyakuti wakaleka mulawu wa Jehova - aba Izilayeli boonse mbakali abo. ² Chakachitika mumwaka wamusanu wamwaami Lehobbowamu, mwaami wa Ijiputi wakasika kuzolwisya atala a Jelusalemu, nkambo bantu tebakachi syomekede kuli Jehova. ³ Wakasika ankalaki zili chuulu amyaanda ibili azyuulu zili makumi musanu alimwi zyabasimabbiza. Basilumamba batakwe mweelwe bakasika anguwe kuzwa ku Ijiputi. Ba Libbiya, ba Sukkitisi, aba Kkushitisi. ⁴ Wakabweza myuunzi, ikwabilidwe eeyo yakali ya Juda alimwi wakasika ku Jelusalemu. ⁵ Lino musinsimi Semayi wakasika kuli Lehobbowamu akubasalali baba Juda bakabungene aamwi ku Jelusalemu akambo ka Sisakki. Semayi wakati kulimbabo, ''Ncheechi Jehova nchawamba: Mwandikkaka, mpawo ambebo ndamupeda mumaboko aa Sisakki.'' ⁶ Eelyo bana babaambi ba Izilayeli amwaami bakalibombya akwamba kuti, ''Jehova uliluleme.'' ⁷ Jehova nakabona kuti balibombya lwabo beni, ijwi lya Jehova lyakasika kuli Semayi, kaliti, ''Balibombya beni. Tandikobanyonyoona; ndiyobavuna mulizimwi, abukali bwangu tabukoyotila a Jelusalemu akambo kakuboko kwa Sisakki. ⁸ Nekubabobo, byakuba bazike bakwe, kuchitila kuti bakamvwisye kuti nkutyeni kubelekela ndime akubelekela bendelezi bamanyika aambi.'' ⁹ Mpawo Sisakki, mwaami wa Ijiputi wakasika wabukila Jelusalemu akubweza buvubi bwakali mun'anda ya Jehova, abuvubi bwakali mun'anda yamwaami. Wakabweza zyoonse; alubo wakabweza intobo zyangolida ezyo Solomoni nzyakachitide. ¹⁰ Mwaami Lehobbowamu wakachita intobo zyamukkuba mubusena bwazyo akuzipa mumaanza abasilutwe babalindizi, bakalikulinda mulyango kun'anda yamwaami. ¹¹ Chakachitika kuti kufumbwa mwaami nakali kunjila mun'anda ya Jehova, basikulinda bazinyampula, eelyo balikuzibwezedezya mun'anda yabalindizi. ¹² Muchindi Lehobbowamu nakalibombya mwini, lunyemo lwa Jehova lwakazwa kulinguwe, kuchitila kuti atamunyonyooni chakumaninina; kunze kwaboobo, kwakachiliko bamwi babotu bajanika muli Juda. . ¹³ Mpawo mwaami Lehobbowamu wakasimya bwami bwakwe mu Jelusalemu, alimwi wakendelezya, mpawo wakendelezya kwamyaka ilikkumi amusanu ayibili mu Jelusalemu, munzi oyo Jehova ngwakalisalilide kuzwa kumisyobo ya Izilayeli kuchitila kuti akabike izina lyakwe nkuko. Izina lyanyina wakali Naama mukayintu mu Amoni. ¹⁴ Wakachita bubi, nkambo takwe nakabika moyo wakwe kukuyandula Jehova. ¹⁵ Kulizimwi zilatala a Lehobbowamu, kukusanguna akumamaninino, sa tazilembedwe mubulembo bwa Semayi musinsimi abwa Ayido sikubona, oobo alubo buli abulembo bwamazyalani akwendelela kwankondo akkati ka Lehobbowamu a Jelobbowamu ? ¹⁶ Lehobbowamu wakoona abasikale bakwe akuzikwa mumuunzi wa Devidi; Abbija mwanakwe mulombe wakazoba ngomwaami aabusena bwakwe.