الإصحاح 8
1
وُكَانْ شَاوَلْ قَابَلْ كِي قَتْلُوهْ. وُصْرَى فِي دِيكْ لِيَامْ إِضْطِهَادْ كْبِيرْ عْلَى الْكَنِيسَة أَلْلِي فِي أُرْشَلِيمْ، وَتْفَرْكْتُوا الْإِخْوَة لْڤَاعْ لَمْدُونْ تَعْ الْيَهُوذِيَة وُ الْسَّامِرَة، غِيرْ الْرُّسُل.
2
وُدَاوْ إِسْتِفَانُوسْ نَاسْ إِيخَافُو رَبِي وُدَارُلَهْ جَنَازَةَ كْبِيرَة.
3
وُشَاوَلْ كَمَلْ يَضْطَهَدْ الْكَنِيسَة، وُكَانْ يَدْخُلْ لَدْيَارْ وُيَدِي رْجَالْ وَنْسَا لَلْحَبْسْ.
4
وُهَدُوكْ أَلْلِي تْفَرْكْتُوا رَاحُوا يْبَشْرُوا بَالْكَلِمَة.
5
وُدْخَلْ فِيلُبُّس لَمْدِينَة الْسَامِرَة وكَانْ يْبَشَرْ لْهُمْ بَالْمَسِيحْ.
6
وَالنَاسْ كَانُوا يَسَمْعُوا بْرُوحْ وَاحْدَة لَكْلَامَهْ مَلِي سَمْعُوا وُشَافُوا المُعْجِزَاتْ أَلِي صْرَاتْ،
7
خَاطَرْ بَزَافْ مَلِي كَانَتْ فِيهُمْ أَرْوَاحْ نَاجْسَة خَرْجَتْ مَنْهُمْ بَعْيَاطْ عَالِي. وُكْثِيرْ الْمَعْوقِينْ وُالْعُرْجْ بْرَاوْ.
8
وُكَانْ فَرْحْ كْبِير فِي دِيكْ لَمْدِينَة.
9
وُكَانْ مَنْ قْبَلْ رَاجَلْ أَسْمَهْ سِيمُون، يَخْدَمْ بَالْسْحُورْ وُيْدَهَشْ نَاسْ الْسَّامِرَة، ڤَايَلْ هَدَا شِي كْبِيرْ!
10
وُكَانُوا ڤَاعْ يْتَبْعُوهْ صْغِيرْ وُكْبِيرْڤَالُوا: "هَذِي هِيَ قُوَّة الله الْعَظِيمَة".
11
وُكَانُوا يْتَبْعُوهْ خَاطَرْ عَنْدَه مُدَّة طْوِيلَة وُهُوَ يَدْهَشْ فِيهُمْ بَالسِحْرْ تَاعَهْ.
12
بَصَحْ كِي أَمْنُوا فِيلُبُّسْ وُهُوَ يْبَشَرْ بَشِي تَاعْ مَلَكُوتْ الله وُبْأَسْمْ يَسُوعْ الْمَسِيحْ، رْجَالْ وَنْسَا غَطْسُوا.
13
وُسِيمُونْ تَانِي أَمَنْ. وُكِي أَغْطَسْ وَلَى يَمْشِي مْعَ فِيلُبُّسْ، وُمَلِي شَافْ عْجَايَبْ وُقُوَّاتْ كْبَارْ تَصْرَى نَدْهَشْ.
14
مَلِي سَمْعُوا الْرُسُل فِي أُرْشَلِيمْ بَلِي الْسَّامِرَة قَبْلَتْ كَلِمَة الله، رَسْلُولْهُمْ بُطْرُس وُيُوحَنَّا،
15
وُغِيرْ وَصْلُوا صَلاَوْ مَنْ أَجْلْهُمْ بَاشْ يَقَبْلُوا اَلرُوحْ الْقُدُسْ،
16
خَاطَرْ مَازَالْ مَاحَلْشْ عْلَى حَتَى وَاحَدْ مَنْهُمْ، بَصَحْ كَانُوا تْغَطْسُوا بْأَسْمْ الْرَّبْ يَسُوع.
17
فِي دَاكْ الْوَقْتْ حَطُوا عْلِيهُمْ الْيَدِينْ وُقَبْلُوا اَلرُوحْ الْقُدُسْ.
18
وُكِي شَافْ سِيمُون بَلِي بْحَطْ الْيَدِينْ الْرُّسُلْ يَتَعْطَى الْرُوحْ الْقُدُس جَابْ لِيهُمْ دْرَاهَمْ
19
وُڤَالْ: " مَدُلِي أَنَا تَانٍي هَادْ الْسُّلْطَانْ، بَاشْ أَلِي أَنْحَطْ عْلِيهْ يَدِي يَقْبَلْ الْرُوحْ الْقُدُس".
20
وُڤَالْ لَهْ بُطْرُس: "الْفَضَّة تَعَكْ تَهَلْكَكْ، خَاطَرْ أَحْسَبْتْ قَادَرْ تَشْرِي مَوْهِبَة الله بَدْرَاهَمْ!
21
مَاعَنْدَكْ لاَ نْصِيبْ وَلاَ قَسْمَة فْهَادْ الْشِي، خَاطَرْ ڤَلْبَكْ مَاهُوشْ نِيشَانْ مْعَ الله.
22
تُبْ مَنْ هَادْ اَلشِرْكْ، وَأَطْلَبْ مَنْ الله بَاشْ يَغْفَرْلَكْ هَادْ اَلْفِكْرْ أَلِي فِي ڤَلْبَكْ،
23
رَانِي نْشُوفْ فِيكْ تْتْخَبَطْ فَالمُّرْ وُمَرْبُوطْ فالظُّلْمْ".
24
جَوْبَاهْ سِيمُونْ وُڤَالْ: "أَدْعُولِي أَنْتُمَا رَّبِي بَاشْ مَا يْجِيشْ عْلِيَا الْشِي أَلِي ذْكَرْتُوهْ".
25
مْبَعْدْ مَا شَهْدُوا وُهَدْرُا بْكَلِمَة الْرَّبْ، رَجْعُوا لِأُرْشَلِيمْ وُبَشْرُوا فِي دْوَاوِير الْسَّامِرِيِينْ
26
مَنْ بَعْدْ مَلاَيْكة الرَّبْ كَلَّمْ فِيلِبُّسْ ڤَالْ: "أَوْڤَفْ أُو رُوحْ لْجِهَة الْجَنُوبْ، عْلَى طْرِيڤْ بَرِّيَّة أَلِي بِينْ أُرْشَلِيم أُوغَزَّة".
27
تَمْ تَمْ نَاضْ أُو رَاحْ. وُكاَنْ وَاحَدْ الْرَاجَلْ حَبَشِي، وْزِيرْالْمَالِيَة لِكَنْدَاكَة سُلْطَانَة الْحَبَشَة، وُهُوَ حَجْ لأُرْشَلِيمْ بَاشْ يَسْجَدْ فِيهَا.
28
وُمَلِي كَانْ رَاجَعْ عْلَى الْمَرْكَبَة تَعَه يَقْرَأ الْنَّبِي إِشْعِيَاءْ.
29
وَالرُّوحْ الْقُدُسْ ڤَالْ لْفِيلُبُّسْ: " رُوحْ رَافَقْ هَدْ الْمَرْكَبَة".
30
وُتْقَدَمْ عَنْدَهْ فِيلُبُّسْ، وُسَمْعَهْ يَقْرَأ النَّبِي إِشْعِيَاء، وُڤَالَهْ رَاكْ فَاهَمْ شَا تَقْرَأ؟".
31
وُڤَالَهْ كِيفَاشْ نَفْهَمْ إِلَى مَافَهَمْنِيشْ كَاشْ وَاحَدْ؟". وُعْرَضْ فِيلُبُّسْ يَطْلَعْ يْجَمَعْ مْعَاهْ.
32
وُكَانْ يَقْرَأ فالْكْتَابْ مَنْ هَادْ الْفَصْلْ: " كِي لَخْرُوفْ أَلِي رَايَحْ يَتَذْبْحْ، كِي خْرُوفْ سَاكَتْ قُدَامْ أَلِي دَوَاهْ مَافْتَحْشْ فَمَهْ.
33
وُهُوَ مَتْوَاضَعْ كْلاَوْلَهْ حَقَهْ، وُشْكُونْ مَنْ جِيلَهْ يْحْكِي عْلِيهْ؟ خَاطَر حْيَاتَهْ تَتْنَڤْلَعْ مَنَهْ".
34
وُجَاوَبْ الْخَصِي فِيلُبُّس وُڤَالْ:"نَطْلَبْ لِيكْ: عْلَى مَنْ رَاهْ يَهْدَرْ الْنَّبٍي؟ عْلَى رُوحَه وَلَى عْلَى وَاحَدْ أَخَرْ؟.
35
وهْدَرْ فِيلُبُّس وُبْدَى مَنْ هَادْ الَكْتَابْ يْبَشْرَهْ بْيَسُوع.
36
وُهُمَا يَمْشِيوْ فَالْطْرِيڤْ وَصْلُوا أَلْوَاحَدْ لَمْكَانْ فِيهْ اَلْمَا، ڤَالْ الْخَصِي: هَاوْ الْمَا شَا يَمْنَعْنِي نَتْغَطَسْ؟".
37
ڤَالْ فِيلُبُّسْ: "إِذَا رَاكْ مُؤْمِنْ مَنْ ڤَلْبَكْ تَقْدَر". جَوْبَاهْ وُڤَالْ: "رَانِي مُؤْمِنْ بَلِي يَسُوعْ الْمَسِيحْ هُوَ إبْنْ الله".
38
أَمْرَهْ بَشْ يْحَبَسْ الْمَرْكَبَة، هَوْدُوا فِي زُوجْ لَلْمَا، وُفِيلُبُّسْ غَطَسْ الخَصِي.
39
وُمَلِي خَرْجُوا مَالْمَا رُوحْ الْرَّبْ خْطَفْ فِيلُبُّسْ، وُالخَصِي مَاوَلاَشْ يْشُوفَهْ وُكَمَلْ طْرِيڤَاهْ بَالْفَرْحْ.
40
وُفِيلُبُّسْ أَلْڤَى رُوحَهْ فِي أَشْدُودْ. وُهُوَ مْسَفَرْبَشَرْ لَمْدُونْ حَتَّى وْصَلْ قَيْصَرِيَّة.