الإصحاح 9
1
كَانْ مَازَال يَضْطَهَدْ وُيَقْتَلْ تَلاَمِيذْ اَلرَّبْ، وُرَاحْ أَلْرَايَسْ الْكَهَنَة
2
وَطْلَبْ مَنَهْ بْرِيَة لْدِمَشْقْ، للْمَجَامَعْ تَعْ الْيَهُودْ بَاشْ يَحْكَمْ ڤَاعْ أَلِي تَبْعُوا هَادْ الْطْرِيڤْ رْجَالْ وَنْسَا وُيْجِيبْهُومْ مْقَيْدِينْ لأُرْشَلِيمْ.
3
وُكِي رَاحْ مَلِي ڤْرِيبْ يَوْصَلْ دِمَشْقْ عْلَى غَفْلَة بَرَقْ عْليهْ ضُو مَالسْمَا،
4
طَاحْ لاَرْضْ وُسْمَعْ صُوتْ ڤَالَهْ: " شَاوُل، شَاوُلْ! عْلاَشْ رَاكْ تَضْطَهَدْنِي؟".
5
ڤَالْ: " شْكُونْ أَنْتَ يَاسِيدي؟". وڤَالْ الْرَّب: "أَنَا يَسُوع أَلِي رَاكْ تَضْطَهَدْ فِيهْ.صْعِيبْ عْلِيكْ تَرْفَسْ مَنَاخِسَ".
6
وُڤَالْ وُهُوَ يَرْجَفْ وُمَتْحَيَرْ: "يَارَب، شَا حَبِيتْ نْدِيرْ؟". ڤَالَهْ الْرَّبْ:نُضْ وَأَدْخَلْ لَمْدِينَة وُيَتْڤَالْ لَكْ شَا لاَزَمْ أَدِيرْ".
7
وُ الرْجَالْ أَلِي كَانُوا مْسَافْرِينْ مْعَاهْ نَاضُوا سَاكْتِينْ، يَسَمْعُوا الصُوتْ وُمَاشَافُوا وَالُوا.
8
نَضْ شَاوُل مالْلَرْضْ، وعِينِيهْ مَفْتُوحِين وهُوَ مَيْشُوفشْ. حَكْمُوهْ مَنْ يَدِيهْ و دَخْلُوهْ لدِمَشْقْ.
9
وُڤْعَدْ ثَلْتْ إِيَامْ مَايْشُوفْشْ، مَايَاكُلْ مَايَشْرَبْ.
10
وُكَانْ فِي دِمَشْقْ تِلْمِيذْ أَسْمَهْ حَنَانِيَّا، وُڤَالَهْ اَلرَّبْ فِي رُؤْيَة: "يَا حَنَانِيَّا!". وُڤَالْ:"رَانٍي هْنَا يَارَب".
11
وُڤَالَهْ اَلرَّبْ:" رُوحْ لَزُّقَاقْ أَلِي يْسِمِوَهْ اْلمُسْتَقِيمْ، وحَوَسْ عْلَى دَارْ يَهُوذَا تَلْڤَى عَنْدَهْ رَجَلْ طَرْسُوسِي يْسَمِوَهْ شَاوُلْ. خَاطَرْ رَاهْ يْصَلِي
12
وُشَافْ فْي رُؤْيَا رَاجَلْ أَسْمَهْ حَنَانِيَّا دَاخَلْ وُحَطْ عْلِيهْ يَدَهْ بَاشْ يْوَلِي يْشُوفْ.
13
جَاوَبْ حَنَانِيَّا: "يَارَب، سْمَعْتْ بَلِي هَادْ اَلرَاجَلْ، شْحَالْ مَنْ شَّرْدَارْ فَالْقِدِّيسِينْ تَاعَكْ فْي أُرْشَلِيمْ.
14
وُرَاهْ عَنْدَهْ الْسُلْطَة مَنْ رَايَسْ الْكَهَنَة بَاشْ يْقَيَدْ ڤَاعْ أَلِي يَدْعُو بْأَسْمَكْ".
15
وُڤَالَهْ الْرَّب: "رُوحْ! خَاطَرْ أَنَا أَلِي خَيَرْتَهْ بَاشْ يَرْفَدْ وُيَدِي أسْمِي لَلبَلْدَانْ وُلَسْلاطَنْ وُبَنِي إِسْرَائِيلْ.
16
نْوَارِلَهْ قَدَاشْ لاَزَمْ يَتَوْجَعْ عْلَى أَسْمِي".
17
رَاحْ حَنَانِيَّا أدْخَلْ لَدَارْ وحَطْ عْلِيهْ يَدِيهْ وڤَالْ: " يَا خُويَا شَاوُلْ، الْرَّب يَسُوعْ أَرْسَلْنِي أَلِي بَانْ لَكْ فالْطٍرِيڤْ أَلِي جِيتْ مَنْهَا، بَاشْ تْشُوفْ و تَتْعَمَرْ بالْرُوحْ الْقُدُس".
18
تَمتَمْ طَاحْ مَنْ عَيْنِيهْ حَاجَة تَشْبَهْ قْشُورْ، وتَمْتَمْ وَلَى يْشُوفْ، و رَاحْ تْغَطَسْ .
19
وكْلَى وتْقَوَى. وكَانْ شَاوُلْ مْعَ الْتَلاَمِيذْ أَلِي فِي دِمَشْقْ يَامَاتْ.
20
وُلَلْوَقْتْ بْدَ يْبَشَرْ فالْمَجَامَعْ بَالْمَسِيح: "بلِي هُوَ وَلْدْ الله".
21
نْدَهْشُوا ڤَاعْ أَلِي كَانُوا يَسَمْعُوا وُڤَالُوا: "مَاشِي هَدَا هُوَ أَلِي أَهْلَكْ فِي أُورْشَلِيمْ أَلِي يَدْعُوا بْهَادْ الأَسَمْ؟ وُجَا لَهْنَا بَاشْ يْقَيْدْهُمْ وُيَدِيهُمْ لَرِيَاسْ الْكَهَنَة!".
22
وُشَاوُلْ كَانْ يَقْوَّة كْثَرْ، وُيْحَيَرْ الْيَهُودْ الْسَّاكْنِينْ فِي دِمَشْقْ وُيْبَرْهَنْ: "بَلِي يَسُوعْ هُوَ الْمَسِيحْ".
23
وُ كِي فَاتْ بَزَاف مَالْوَقْتْ تْشَّاوْرُوا الْيَهُودْ بَاشْ يَقَتْلُوهْ،
24
وُشَاوُلْ سْمَعْ بَالخُطَة تَعْهُمْ، كَانُوا يْعَسُوا لْبِبَانْ تَاعْ لَمْدِينَة لِيلْ وُنْهَارْ بَاشْ يَقَتْلُوهْ.
25
أدَاوَهْ الْتَلاَمِيذْ فالْلِيل وهَوْدُوهْ مالسُّورْ دَاخَلْ سَلَّة.
26
وُكِي لْحَّڤْ شَاوُلْلأُورْشَلِيمْ بْغَى يَتَقَرَبْ مالْتَّلاَمِيذْ، بَصَحْ كَانُوا يْخَافُوهْ مَاشِي مْصَدْقِينْ بَلِي تِلْمِيذْ.
27
وَدَاهْ بَرْنَابَا عَنْدْ اَلرُّسُلْ، وَأحْكَالْهُمْ كِيفَاشْ شَافْ اَلرَّبْ فَالطْرِيقْ وُكِي كَلْمَّهْ، وُكِي كَانْ أيْبَشَرْفِي دِمَشْقْ بْأَسَمْ يَسُوعْ.
28
وَڤْعَدْ مْعَاهُمْ يَدْخَلْ وُ يَخْرَجْ فِي أُورْشَلِيمْ وُيَهْدَرْ بْجُرْئَة بْأَسَمْ الْرَّب يَسُوع.
29
وُكَانْ يَوْعَظْ وُيَتْبَاحثْ مْعَ الْيُوننَانِيِّين، وُحَاوْلُوا يَقْتْلُوهْ.
30
كِي سَمْعُوا الْإِخْوَة هَوْدُوهْ الْقَيْصَرِيَّة وُرَسْلُوهْ لْطَرْسُوسْ.
31
وُ الْكَنَائِس فْڤَاعْ الْيَهُودِيَّة وَالْجَلِيلْ وَالسَّامِرَة كَانْ عَنْدْهَا اَلسَلاَمْ، وُكَانَتْ تَتَبْنَى وُتَمْشِي بْخُوفْ اَلرَّبْ، وُتَعْزِيَة اَلرُوحْ اَلْقُدُسْ وُكَانَتْ تَكْبَرْ.
32
وُكِي كَانْ بُطْرُسْ يْزُورْ لَمْدَايَنْ، زَارْ الْسُكَانْ تَعْ لُدَّة،
33
كَانْ تَمَى رَاجَلْ إِسَمُهْ إِينِيَاسْ مْعَوَقْ رَاقَدْ عْلَى سْرِيرَهْ مَنْ ثْمَنْ سْنِينْ،
34
وُڤَالَهْ بُطْرُسْ: "يَا إِينِيَاسْ، يَسُوعْ الْمَسِيحْ شْفَاكْ نُوضْ وُفَرَشْ لْرُوحَكْ!". تَم تَم وْڤَفْ.
35
وُشَافُوهْ ڤَاعْ سُكَانْ لُدَّة وْسَارُون، وُأَمْنُوا بَالرَّبْ.
36
وُكَانْ فِي مْدِينَة يَافَا تِلْمِذَة أَسَمْهَ طَابِيثَا أَلِي مَعْنَاهْ غْزَالَة. كَانَتْ أَدِيرْ غِيرْالْخِيرْوُتْعَمَلْ الْنَاسْ بْإِحْسَانْ.
37
وُفِي دِيكْ لِيَامْ مَرْضَتْ وُمَاتَّتْ، غَسْلُوهَا وُحَطُوهَا فِي بِيتْ عَالْيَة.
38
وَمْدِينَة لُدَّةَ ڤْرِيبَة مَنْ يَافَا، سَمْعُوا الْتَلاَمِيذْ بَلِي بُطْرُسْ كَانْ فِيهَا، رَاسْلُوا زُوجْ رْجَالْ لِيهْ بَاشْ أيْجِي عَنْدْهُمْ.
39
تَمْ تَمْ رَاحْ بُطْرُس مْعَاهُمْ. كِي وَصْلُوا طْلَعْ لَلبِيتْ الْعَالْيَة، وُ كَانَت مْعَاهْ ڤَاعْ الْهَجَالاَتْ تَبْكِي وُيْوَرِيوْ لَحْواَيَجْ أَلِي كَانَتْ تْخَيَطْ غْزَالَة كِي كَانَتْ مْعَاهُمْ.
40
خَارَجْهُمْ بُطْرُس ڤَاعْ بَرَى، وَسْجَدْ وُصَلَّى، مَنْ بَعْدْ دَارْ لَلْجَسَدْ وُڤَالْ: "يَا طَابِيثَا، نُوضِي!". فَتْحَتْ عِيْنِيهَا. وُمَلِي شَافَتْ بُطْرُس جَمْعَتْ،
41
أَعْطَلْهَا تَاكُّلْ وُنَوَضْهَا. مَنْ بَعْدْ عَيَطْ لَلْقِدِّيسِينْ وَالْهَجَالاَت وُرَدْهَالْهُمْ حِيَّة.
42
وُڤَاعْ يَافَا وْصَلْهَا لَخْبَرْ، وُبَزَافْ أَمْنُوا بَالْرَّبْ.
43
وُڤْعَدْ فِي يَافَا إِيَّامْ كْثِيرَة، عَنْدْ سِمْعَان رَاجَلْ دَبَّاغْ