الإصحاح 26
1
وأَغْرِيبَاسْ ڤَالْ لْبُولُسْ: " مَسْمُوحْ لَكْ تْدَافَعْ عْلَى رُوحَكْ". تَمْ تَمْ أَرْفَدْ بُولُسْ يَدَهْ و بْدَى يَهْدَرْ:
2
" رَانِي حَاسَبْ رُوحِي فَرْحَانْ يَا الْسُلْطَانْ أَغْرِيبَاسْ، كِي رَانِي نْدَافَعْ عْلَى رُوحِي ڤُدَامَكْ الْيُومْ ونْرَّدْ عْلَى الْشَكْوَى تَعْ لِيْهُودْ ضَدِي.
3
وأَنْتَ رَاكْ تَعْرَفْ ڤَاعْ عْوَايَدْهُمْ والْمَسَائِلْ أَلِي بِينْ الْيَهُودْ. عْلَى هَادْ الْشِي نَطْلَبْ مَنَكْ تَسْمَعْنِي و تَصْبَرْ عْلِيَا.
4
ڤَاعْ الْيَهُودْ يَعَرْفُوا سِيرْتِي مَنْ صَغْرِي، أَنَا أَلِي كُنْتْ عَايَشْ فِي وَسْطْ شَّعْبِي فِي أُورُشَلِيمْ،
5
و يَعَرْفُونِي مَلْ الْلَوَلْ، لُوكَانْ بْغَاوْ يَشَهْدُوا، بَلِي كُنْتْ فَرِيسِي، نْتَبَعْ الْمَذْهَبْ الأَكْثَرْتَزْيَارْ فِي عِبَادَتْنَا
6
والْيُومْ رَانٍي وَاڤَفْ نْتْحَاكَمْ عْلَى خَاطَرْ رَانِي مَأَمَنْ بَالْوَعْدْ أَلِي أَعْطَاهْ الله لَجْدَادنَا،
7
ومَازَالْ لَعْرَاشْ تَعْ شَّعْبْنَا الْثْنَاشْ يَسَنَاوْ هَادْ الْوَاعْدْ، عَابْدِينْ الله بْجَهْدْ لِيلْ ونْهَارْ. وعْلَى جَالْ هَادْ الْرَّجَاء رَانِي نَتْحَاكَمْ مَنْ الْيَهُودْ يَا الْسُلْطَانْ أَغْرِيبَاسْ.
8
عْلاَشْ مَا تْأَمْنُوشْ بَلِي الله يْنَوَّضْ الْمُوتَى؟
9
وكُنْتْ حَاسَبْ بَلِي لاَزَمْ أَنْدِيرْ جَهْدْ كْبِيرْبَاشْ نْقَاوَمْ أَسْمْ يَسُوعْ الْنَّاصِرِي.
10
وهَكْدَا دَرْتْ فِي أُورُشَلِيمْ، وأَدِيتْ تَرْخِيصْ مَنْ عَنْدْ رِيَاسْ الْكَهَنَة، أَرْمِيتْ شْحَالْ مَلْ الْقِدِّيسِينْ لَلْحَبْسْ، وكُنْتْ نْوَافَقْهُمْ كِي يَحْكْمُوا بَالْمُوتْ عْلِيهُمْ.
11
وفْڤَاعْ اَلْمَجَامَعْ كُنْتْ نْعَاقَبْهُمْ شْحَالْ مَنْ مَرَّة، ونْعَذْبْهُمْ حَتَّى يَنَكْرُوا إِيمَانْهُمْ. وكُنْتْ نْتَابَعْهُمْ حَتَّى فْلَمْدُونْ أَلِي خَارَجْ لَبْلاَدْ.
12
"كِي كُنْتْ مْرَوَحْ لْدِمَشْقْ، بْتَرْخِيصْ وتَفْوِيضْ مَنْ رِيَاسْ الْكَهَنَة،
13
شَفْتْ فِي نَصْ الْنْهَارْ فَالْطْرِيڤْ، يَا الْسُلْطَانْ، نُورْ مَالْسْمَا نُورَهْ كْثَرْ مْنُورْ الْشَمْسْ، بَرَقْ ڤُدَمِي وڤُدَامْ أَلِي كَانُوا مْعَيَا.
14
مَلِي طَحْنَا لَرْضْ، سْمَعْتْ صُوتْ يَكَلَمْنِي ويْڤُولْ بَالْلُّغَة الْعِبْرِيَّة: شَاوُلْ! عْلاَشْ رَاكْ تَضْطَهَدْنِي؟ صْعِيبْ عْلِيكْ تَرْفَسْ مَنَاخِسَ.
15
وڤُلْتْ أَنَا: شْكُونْ أَنْتَ يَا سِيدِي؟ ڤَالْ: أَنَا يَسُوعْ أَلِي رَاكْ تَضْطَهْدَهْ.
16
بَصَحْ نُوضْ عْلَى كَرْعِيكْ عْلَى خَاطَرْ بَنْتْ لَكْ، بَاشْ نْخَيْرَكْ خَادَمْ وشَاهَدْ بَهَادْ الْرُؤْيَة أَلِي شَفْتَهَا والرُؤَى أَلِي رَايَحْ نْوَارِلَكْ،
17
و نْسَلْكَكْ مَنْ شَّعْبَكْ والْشُّعُوبْ أَلِي نَرَسْلَكْ لِيهُمْ،
18
بَاشْ تَفْتَحْ عِينِيهُمْ ويَخَرْجُوا مَالْضَلْمَة لَنُورْ، ومَنْ يَدْ الْشٍيطَانْ لْيَدْ الله، حَتَّى يْنَالُوا بَالْإِيمَانْ غَفْرَانْ الْذْنُوبْ ونْصِيبْ مْعَ الْمَقْدْسِينْ.
19
" ومَنْ دَاكْ الْوَقْتْ يَا الْسَلْطَانْ أَغْرِيبَاسْ مَا زَدْتْشْ نْكُونْ ضَدْ الْرُّؤْيَة الْسَّمَاوِيَّة،
20
وبَشَرْتْ أَهْلْ دِمَشْقْ فَالْلَوَلْ، وفِي أُورُشَلِيمْ وڤَاعْ مْدُونْ الْيَهُودِيَّة، مَنْ بَعْدْ بَشَرْتْ الْأمَمْ، بَاشْ يْتُوبُوا ويَرَجْعُوا لله ويْدِيرُوا أَعْمَالْ تْلِيقْ بَالْتُوبَة.
21
عْلَى هَادْ الْشِي أَلِي حَكْمُونِي الْيَهُودْ فَالْهَيْكْلْ وبْغَاوْ يَڤَتْلُونِي.
22
بَصَحْ الله حْفَضْنِي حْتَّى لْهَادْ الْيُومْ، شَاهَدْ لَصْغِيرْ ولَكْبِيرْ. وأَنَا مَا ڤُلْتْ غِيرْ أَلِي تْنَبَاُوا الأَنْبِيَا و مُوسَى عْلِيهْ:
23
بَلِي الْمَسِيحْ رَاحْ يَتْأَلَمْ ويْكُونْ اَلْلَوَلْ أَلِي يْقُومْ مَنْ الْمُوتْ، ويْبَشَرْ بَالْنُورْ لْشَّعْبْنَا و الُّشُّعُوب الْلَخْرَى".
24
وهُوَمَزَالْ يْدَافَعْ عْلَى رُوحَهْ، حَبْسَهْ فَسْتُوسْ بْصُوتْ عَالِي: " رَاكْ هْبْلْتْ يَا بُولُسْ! الْكْتَبَاتْ لَكْثِيرَة أَلِي قْرِتْهَا هَبْلَتَكْ!".
25
وڤَالْ: "مَا هْبَلْتْشْ يَا لَعْزٍيزْ فَسْتُوسْ، رَانِي نَتْكَلَّمْ بَكْلاَمْ الْصِّدْقْ وكْلاَمْ يْفَطَّنْ.
26
والْسُلْطَانْ أَلِي رَانِي نْكَلْمَه ضُورْكْ عَالَمْ بهَادْ الْأمُورْ، عْلَى خَاطَرْ مَا رَانِيشْ نْصَدَقْ بَلِي يَخْفَى عْلِيهْ شِي مَنْ هَادْ الأُمُورْ، عْلَى خَاطَرْ هَدْ الْشِي مَا صْرَاشْ فَالْظَلْمَة.
27
رَاكْ مْؤَمَنْ بالْأنْبِيَا يَا الْسُلْطَانْ أَغْرِيبَاسْ؟ رَانِي عَارَفْ بَلِي تَأَمَّنْ".
28
وڤَالْ أَغْرِيبَاسْ لْبُولُسْ: " تْزِيدْ شْوِيَة تَقَنَعْنِي نْوَلِي مَسِحِي!".
29
وبُولُسْ ڤَالْ: " قْلِيلْ ولاَ كْثِيرْ، كُنْتْ نْصَلِّي لله مَنْ أَجْلَكْ ومَنْ أَجْلْ ڤَاعْ الْحَاضْرِينْ هْنَا، بَاشْ يْوَلُوا كِمَا أَنَا، بَصَحْ بْلاَ هَادْ الْسْلاَسَلْ".
30
وكِي ڤَالْ هَكْدَا نَاضْ الْسُلْطَانْ والْوَالِي وبَرْنِيكِي وأَلِي ڤَعْدِينْ مْعَهُمْ،
31
ورَوْحُوا وهُمَا يَتْكَلْمُوا بِينَتْهُمْ يْڤُولُوا: " هَادْ الإنْسَانْ مَا دَّارْشْ شِي يَسْتْهَلْ الْمُوتْ ولاَ الْحَبْسْ".
32
وڤَالْ أَغْرِيبَاسْ لْفَسْتُوسْ:" لُو كَانْ مَاطْلَبْشْ يْتْحَاكَمْ عَنْدْ قَيْصَرْ كَانْ قَادَرْ يَخْرَجْ هَادْ الإِنْسَانْ".