الإصحاح 25
1
وبَعْدْ ثَلْثْ إِيَّام مَلِي أَبْدَى فَسْتُوسْ الْخَدْمَة تَعَهْ طْلَعْ مَنْ قَيْصَرِيَّة لأُورُشَلِيمْ.
2
جَاهْ رَايَسْ الْكَهَنَة ونَّاسْ مَنْ الْيَهُودْ وقَدْمُوا الْشَكْوَة تَعْهُمْ ضَدْ بُولُسْ،
3
وطَلْبُوا مَنَهْ يْجِيبْ بُولُسْ لأُورُشَلِيمْ، وهُمَا دَارُوا حِيلَة بَاشْ يَڤَتْلُوهْ فَالْطْرِيڤْ.
4
جَوَبْهُمْ فَسْتُوسْ بَلِي بُولُسْ يَڤْعَدْ فِي قَيْصَرِيَّة، وهُوَ مَا يْطَوَلْشْ ويَرْجَعْ.
5
وڤَالْ: "يْهَوْدُوا مْعَيَا الْڤَادْرِينْ مَنْكُمْ، وإِذَا كَانْ فِي هَادْ الْرَّاجَلْ ذَنْبْ يَشْكُوا عْلِيهْ".
6
ومَنْ بَعْدْ مَا فَوَتْ عَنْدْهُمْ عَشْرْ إِيَّامْ هَوَّدْ لْقَيْصَرِيَّة. وفَالْغَدْ ڤْعَدْ عْلَى كُرْسِي الْوِلاَيَة وأَمَرْ يْجِيبُوا بُولُسْ.
7
وكِي حْضَرْ دَارُوا بِيهْ الْيَهُودْ أَلِي جَاوْ مَنْ أُورُشَلِيمْ، وقَدْمُوا شْكَاوِي ضَدْ بُولُسْ كْثِيرَة وثْقِيلَة بْلَى حَتَّى بُرْهَانْ.
8
وهُوَ كَانْ يْدَافَعْ عْلَى رُوحَهْ: "أَنَا مَا غْلَطْ فِي حَتَّى شِي، لاَ مَنْ جِهَة شَرِيعَة الْيَهُود ولاَ لَلْهَيْكَلْ ولاَ لْقَيْصَرْ".
9
بَصَحْ فَسْتُوسْ كَانْ بَاغِي يْدِيرْ مْزِيَّة ويَرْبَحْ لِيهُود ڤَالْ: " إِذَا رَاكْ بَاغِي تَطْلَعْ لأُورُشَلِيمْ تْتْحَاكَمْ تَمَّا و أَنَا نْكُونْ حَاضَرْ؟".
10
وبُولُسْ ڤَالْ: " رَانِي فِي مَحْكَمَة قَيْصَرْ وِين لاَزَمْ عْلِيَا نَتْحَاكَمْ. أَنَا مَا ظْلَمْتْشْ الْيَهُودْ فِي حَتَّى شِي كِيمَا رَاكْ عَارَفْ.
11
لُوْ كُنْتْ ضَالَمْ، ولاَ دَرْتْ شِي يَسْتْهَلْ الْمُوتْ، مَا نَهْرَبْشْ مَنْ عُقُوبَة الْمُوتْ. بَصَحْ إِذَا مَا كَانْ حَتَّى شِي مَلِي يَشْكُوا بِه عْلِيَّى هَادُوا، حَتَّى وَاحَدْ مَا يَڤْدَرْ يَسَلَّمْنِي لِهُمْ. نَطْلَبْ ضُورْكْ بَاشْ نَتْحَاكَمْ عَنْدْ قَيْصَرْ!".
12
تْشَاوَرْ فَسْتُوسْ مْعَ الْمُسْتَاشْرِينْ تَعَهْ، و جَاوْبَهْ: " عَنْدْ قَيْصَرْ بْغِيتْ تَتْحَاكَمْ. لْعَنْدْ قَيْصَرْ تْرُوحْ!".
13
بَعْدْ شِي يَّمَاتْ جَا أَغْرِيبَاسْ الْسَلْطَانْ وبَرْنِيكِي لْقَيْصَرِيَّة يْسَلْمُوا عْلَى فَسْتُوسْ.
14
وكِي فَوتُوا تَمَا شْحَالْ مَلْلِيَّامْ، فَسْتُوسْ عْلَمْ الْسُلْطَانْ بقَضِيَة بُولُس، ڤَالْ لَهْ: "كَايَنْ وَاحَدْ الْرَّاجَلْ خَلَّهْ فِيلِكْسْ فَالْحَبْسْ،
15
و طَلْبُوا مَنِي رِيَاسْ الْكَهَنَة وشْيُوخْ الْيَهُودْ كِي كُنْتْ فِي أُورُشَلِيمْ نَحْكَمْ عْلِيهْ.
16
جَاوَبْتْهُمْ بَلِي مَاشِي مَنْ عَادَة الْرُّومَانِيِّينْ يَسَلْمُوا وَاحَدْ لَلْمُوتْ قْبَلْ يْقَابَلْ فَالْمَحْكَمَة أَلِي يَشْكُوا عْلِيهْ، بَاشْ يَڤْدَرْ يْدَافَعْ عْلَى رُوحَهْ.
17
وكِي جَاوْ اَلَهْنَا غَاوَلْتْ ونَظَمْتْ جَلْسَة فَالْيُومْ الْتَّالِي، وأَمَرْتْ يْجِبُوا الْرَّاجَلْ.
18
كِي وَڤْفُوا أَلِي يَشْكُوا عْلِيهْ، مَا جَابُوا حَتَّى بَرْهَانْ يَسْتْهَلْ ضَدَهْ كِيمَا كُنْتْ نْظَنْ.
19
بَصَحْ كَانْ عَنْدْهُمْ إِتِهَمَاتْ عْلِيهْ مَنْ جِهَة دِيَانَتْهُمْ، وعْلَى وَاحَدْ أَسْمَهْ يَسُوعْ، مَاتْ وبُولُسْ ڤَالْ رَاهْ حِيْ.
20
تْحِيَرْتْ كِي نَحْكَمْ بِيْنَتْهُمْ وڤُلْتْ لَهْ: إِذَا رَاكْ بَاغِي تْرُوحْ لْأورُشَلِيمْ تَتْحَاكَمْ تَمَا؟
21
وكِي دَافَعْ بُولُسْ عْلَى رُوحَهْ طْلَبْ بَاشْ يْتْحَاكَمْ عَنْدْ أُوغُسْطُسْ، أَمَرْتْ نَعَسَهْ حَتَّى نَرَسْلَهْ لْعَنْدْ قَيْصَرْ".
22
أَغْرِيبَاسْ ڤَالْ لْفَسْتُوسْ: " حَتَّى أَنَا رَانِي بَاغِي نَسْمَعْ هَادْ الْرَّاجَلْ". ڤَالْ: "تَسَمْعَهْ فَالْغَدْ".
23
وفَالْغَدْ كِي جَا أَغْرِيبَاسْ وبَرْنِيكِي دَرُولْهُمْ إِحْتِفَالْ كْبِيرْ، دَخْلُوا الْمَحْكَمَة مْعَ الْرِيَاسْ ورْجَالْ لَمْدِينَة أَلِي عَنْدْهُمْ الْشَانْ، أَمَرْ فَسْتُوسْ يْجِبُوا بُولُسْ.
24
وڤَالْ فَسْتُوسْ: " يَا الْسُلْطَانْ أَغْرِيبَاسْ ويَا ڤَاعْ رْجَالْ الْحَاضْرِينْ مْعَنَا، رَاكُمْ تْشُوفُوا هَادْ اَلرَّاجَلْ أَلِي شْكَى عْلِيهْ الْشَعْبْ الْيْهُودِي فِي أُورُشَلِيمْ وهْنَا، يْزَڤُوا بَاشْ يَتَڤْتَلْ.
25
وأَنَا مَلِي مَا لْڤِيتْشْ شِي دَارَهْ يَسْتْهَلْ الْمُوتْ، وهُوَ طْلَبْ يْتْحَاكَمْ عَنْدْ أُوغُسْطُسْ، عَوَلْتْ نَرَسْلَهْ.
26
وكِي مَا لْڤِيتْشْ شِي مَتَأَكَدْ فِيهْ نَكَتْبَهْ لَسَلْطَانْ. عَلَى هَادْ الْشِي أَلِي جَابْتَهْ ڤُدَامْكُمْ، وخَاصَة أَنْتَ يَا سُلْطَانْ أَغْرِيبَاسْ، مَلِي تَمَيْزُوا فْهَادْ اَلْقَضِيَة نَلْڤَى وَاشْ نَكْتَبْ لَهْ.
27
عْلَى خَاطَرْ رَانِي نْشُوفْ مَا يْلِيقْشْ نَرْسَلْ مَحْبُوسْ لَسَلْطَانْ بْلَى نْقَدَمْ تَهْمَة عْلِيهْ".