الإصحاح 24
1
وبَعْدْ خَمْسْ إِيَّامْ هَوَّدْ حَنَانِيَّا رَايَسْ الْكَهَنَة مْعَ الْشْيُوخْ ومُحَامِي أَسْمَهْ تَرْتُلُّس. وشْكَاوْ لَلْوَالِي ضَدْ بُولُسْ.
2
وكِي دْعَاوْ بُولُسْ بْدَى تَرْتُلُّس بَالْشَكْوَى عْلِيهْ ڤَالْ:
3
يَا سُمُو الْوَالِي، رَنَا فِي سْلاَمْ كْبِيرْ مَنْ الْشِي أَلِي رَاكْ أَدِيرَهْ، وهَادْ الأُمَة رَاهِي بْخِيرْ " بَالْتَدْبَارْ تَاعَكْ، أَقْبَلْ مَنَّا هَادْ الْشُكْرْ يَالْعْزِيزْ فِيلِكُس فِي كُلْ مْكَانْ وكُلْ زْمَانْ.
4
بَاشْ مَنْكَثَرْشْ عْلِيكْ، نَتْرَجَاكْ تَسْمَعْ إِخْتِصَارْ هَادْ الْشَكْوَى:
5
لْڤِينَا هَادْ الْرَّاجَلْ يْفَسَدْ ويْدِيرْ فِتْنَة بِينْ ڤَاعْ الْيَهُودْ فَالبْلاَدْ، ويَتْزَعَمْ مَذْهَبْ اَلنْصَارَى،
6
وكِي بْغَى يْنَجَسْ حَتَّى اَلْهَيْكَلْ، حْكَمْنَاهْ وبْغِينَا نَحَكْمٌوا عْلِيهْ بْشَرِيعَتْنَا.
7
بَصَحْ الْرَايَسْ لِيسِيَسْ أَدَاهْ مَنْ بِينْ يَدِينَا بالْقَوَة،
8
وأَمَرْ اَلِي يَشْكُوا عْلِيهْ يْجُوا لْعَنْدَكْ. وأَنْتَ تَڤَدْ إِلاَ سْأَلْتَهْ تًعْرَفْ هَادْ الأُمُورْ أَلِي رَانَا نَشْكُوا عْلِيهْ".
9
والْيَهُودْ أَلِي كَانُوا حَاضْرينْ وَفْقُوا كْلاَمْ الْمُحَامِي ڤَالُوا: " هَكْدَا كَانْ الْحَالْ".
10
جَاوَبْ بُولُسْ، مَلِي طْلَبْ مَنَهْ الْوَالِي: رَانِي عَارَفْ بَلِي هَادِي سْنِينْ وأَنْتَ قَاضِي لْهَادْ الأُمَة، ورَانِي مَرْتَاحْ نْدَفَعْ عْلَى رُوحِي بكُلْ ثِقَة.
11
ورَاكْ ڤَادَرْ تَعْرَفْ بَلِي مَا فَتْشْ ثْنَاشْ نْيُومْ مَلِي طْلَعْتْ لأُورُشَلِيمْ.
12
ووَاحَدْ مَلْ الْيَهُودْ مَا شَافْنِي حَتَّى مَرَّة دَاخَلْ الْهَيْكَلْ ولاَ فلَمْدِينَة لْلَايَمْ الْنَّاسْ ونْهَيَجْهُومْ للْفَوْضَى.
13
ومَا يْڤَدُوشْ يْبَيْنُوا عْلَى الْشِي أَلِي رَاهُمْ يَشْكُوا بِهْ عْلِيَا.
14
بَصَحْ نَسْتَعْرَفْ لَكْ بهَدَا: رَانِي نَعْبَدْ إِلَهْ جْدَادِي عْلَى حْسَبْ الْمَذْهَبْ أَلِي رَاهُمْ يْوَصْفُوهْ بَلِي بِدْعَة، نْاَمَنْ بَكُلْ الْشِي الْمَكْتُوبْ فَالْشَرْيعَة والأَنْبِيَا.
15
و عَنْدِي رَجَاءْ فالله فِي الْشِي أَلِي رَاهُمْ يَسَنَاوَهْ: بَلِي قِيَامَة الْمُوتَى تْكُزنْ لَلْأبْرَارْ والأَشْرَارْ.
16
أَنَا تَانِي نْدَرَبْ رُوحِي بَاشْ يْكُونْ عَنْدِي دَايْمَنْ ضَمِيرْ صَالَحْ بْلاَ عِيْبْ مَنْ جِهَة الله والنَّاسْ.
17
ومَنْ بَعْدْ شْحَالْ مَنْ عَامْ جِيتْ نْقَدَمْ صَدَقَّاتْ وتَقْدِمَاتْ لْأمْتِي.
18
وكِي كُنتْ نَتَّطَهَرْ فَالْهَيْكَلْ شَافُونِي وَاحْدِينْ مَل الْيَهُودْ تَعْ أَسِيَّا، مَاكُنْتْ مْجَمَعْ مْعَ الْنَّاسْ ولاَ نْدِيرْ فَوضَى فِي وَسْطْهُمْ،
19
لُوْ كَانْ عَنْدْهُمْ دَلِيلْ ضَدِي، رَاهُمْ قَدْمُوهْ لَكْ فِي شَكْوَتْهُمْ كِيمَا يَنْدَرْ فَالأَصْلْ.
20
وضُورْكْ يْڤُولُوا وَاشْ مَنْ ذَنْبْ عَنْدْهُمْ عْلِيَا مَلِي جَابُونِي لَلْمَجْمَعْ يْحَاكْمُونِي،
21
مَنْ غِيرْ الْشِي أَلِي ڤُولْتَهْ ڤُدَامْهُمْ: رَاكُمْ تَحَاكْمُونِي الْيُومْ عْلَى جَالْ نْأَمَنْ بقِيَامَتة الْمُوتَى".
22
كِي سْمَعْ فِيلِكْسْ بْهَدَا أَعْطَاهُومْ وَقْتْ، هُوَ كَانْ يَعْرَفْ كْثَرْ غْلَى هَادْ اَلْطْرِيڤْ، ڤَالْ: " مَلِي يَلْحَڤْ لِيسِيَاسْ الْرَايَسْ نَعْطِكُمْ الْحُكْمْ".
23
وأَمَرْ رَايَسْ الْمْيَّة عَسْكْرِي يْعَّسْ بُولُس، و يْكُون حُّر شْوِيَة، ويَمَنْعُوشْ زْيَارَة حْبَابَهْ يْزُورُهْ و يَخَدْمُوه.
24
ومَنْ بَعْدْ يَمَاتْ جَا فِيلِكْسْ مْعَ دُرُوسِّلاَ مَرْتَهْ، وهِيَ يَهُودِيَّة. ودْعَى بُولُسْ وسَمْعُوا عْلَى الإِيمَانْ تَعَهْ بَالْمَسِيحْ.
25
وكِي كَانْ يَحْكِي عْلَى الْبِر والْتَّعَفُفْ والْدَّيْنُونَة أَلِي تْكُونْ فَاللَخْرَة ، خَافْ فِيلِكْسْ، وڤَالْ: " رُوحْ ضُورْكْ، وكِي يْكُونْ عَنْدِي الْوَقْتْ نْعَيَطْلَكْ".
26
وكَانْ يَسَنَى فِي بُولُسْ يَعْطِيهْ دْرَاهَمْ بَاشْ يَطَلْڤَهْ، عْلَى خَاطَرْ كَانْ شْحَالْ مَنْ مَرَّة يَدْعِيهْ يَهْدَرْ مْعَهْ.
27
وكِي فَاتُوا عَامِينْ، جَا بُورْكِيُوسْ فَسْتُوسْ وَالِي فِي مْكَانْ فِيلِكْسْ. و فِيلِكْسْ بْغَى يَرْبَحْ ڤْلُوبْ الْيَهُودْ خَلَى بُولُسْ فالْحَبْس