الإصحاح 23
1
وشَافْ بُولُسْ فَلِي كَانُوا مْجَمْعِينْ وڤَالْ: " يَا خُوتْ، رَانٍي بْضَمِيرْ صَالَحْ عَشْتْ لله حَتَّى لْهَادْ الْيُومْ".
2
وحَنَانِيَّا رَيَسْ الْكَهَنَة أَمَرْ، الْوَاڤْفِينْ حْذَاهْ يَضَرْبُوهْ عْلَى فَمَهْ.
3
و تَمَا ڤَالْ لَهْ بُولُسْ: " الله يَضَرْبَكْ يَا حِيطْ لَمْقَبْرَة لْمَسْبُوغْ بَالْجَبْسْ! رَاكْ ڤَعَدْ تَحْكَمْ عْلِيَا بَالْشَرِيعَة، ورَاكْ تَأَمَرْ نَتْنَضْرَبْ ومْخَالَفْ الْشَرِيعَة؟".
4
وڤَالُوا الْوَاڤْفِينْ: " رَاكْ تْسَّبْ رَايَسْ الْكَهَنَة؟
5
وبُولُسْ ڤَالْ: " مَا كُنْتْشْ عَارَفْ يَا خُوتِي بَلِي هَدَا رَايَسْ كَهَنَة، عْلَى خَاطَرْ مَكْتُوبْ: رَايَسْ شَّعْبَكْ مَا تْڤُولْشْ فِيهْ الْسُوءْ".
6
وكِي عْرَفْ بُولُسْ بَلِي وَاحْدِينْ مَنْهُمْ صَدُّقِيُّونْ ووَاحْدِينْ أَخْرِينْ فَرِّيسِيُّونْ، زَڤَى فالْمَجْمَعْ:"خُوتِي، أَنَا فَرٍّيسِي وَلْدْ فَرِّيسي. رَانِي نْتْحَاكَمْ الْيُومْ عْلَى خَاطَرْنَؤْمَنْ بْقِيَامَة الْمُوتَى".
7
وكِي ڤَالْ هَدْ لَكْلاَمْ صْرَى خِلاَفْ بِينْ آلْفَرِّيسِيِّينْ وآلْصَّدُّوقِيِّينْ، و نْڤَسْمَتْ لَجْمَاعَة،
8
عْلَى خَاطَرْ آلْصَّدُّوقِيِّينْ يْڤُولُوا: مَاكَنْشْ قِيَامَة ولاَ مَلاَيْكَة ولارُوحْ، وآلْفَرِّيسِيِّينْ يْأَمْنُوا بهَدْ الأُمُورْ.
9
وصْرَى زْڤَى كْبِيرْ، ونَاضُوا وَاحْدِينْ مَنْ عُلَمَا اَلْشَرِيعَة مَلْ الْفَرِّسِيِّينْ دَاخْلُوا فِي خِصَامْ وڤَالُوا: " مَا لْڤِينَا حَتَّى شِي مَاشِي مْلِيحْ فْهَادْ الإِنْسَانْ! وإِذَا كَانْ رُوحْ ولاَ مَلاَيْكَة أَلِي كَلْمَّهْ مَانْحَارْبُوشْ الله".
10
ومَلِي صْرَى خِلاَفْ كْبِيرْ خَافْ رَايَس الْعَسْكَرْ يَڤَسْمُوا بُولُسْ عْلَى زُوجْ، وآمَرْ الْعَسْكَرْ يْهَوْدُوهْ وڤَلْعُوهْ مَنْ وَسْطْهُمْ ويَدِوَهْ لَثَكَنَة.
11
و فَالْلِيلَة الْتَّالْيَة بَانْ لَهْ الْرَّبْ وڤَالْ:" ثِقْ يَا بُولُسْ! كِيمَا شْهَدْتْ لِي فِي أُورُشَلِيمْ، لاَزَمْ تَشْهَدْ لِي فِي رُومَا تَانِي".
12
وكِي طْلَعْ الْنْهَارْتَفْقُوا وَاحْدِينْ مَلْ الْيَهُودْ بَاشْ يَڤَتْلُوا بُولُسْ، و حَرْمُوا رُوحْهُمْ مَنْ الْمَكْلَة والْشْرَابْ حَتَّى يَقَتْلُوهْ.
13
وكَانُوا أَكْثَرْ مَنْ رَبْعِينْ وَاحَدْ.
14
ورَوحُوا عَنْدْ رِيَاسْ الْكَهَنَة والْشْيُوخْ وڤَالُوا: "رَانَا حْرَمْنَا رْوَاحْنَا مَا نَكْلُوا ومَا نَشَرْبُوا حَتَّى نَڤَتْلُوا بُولُسْ.
15
وضُورْكْ خَبْرُوا أَنْتُمَ الْرَايَسْ بَاشْ يْهَوْدَهْ لْعَنْدْكُمْ فَالْغدْ، كَلِي رَاكُمْ بَاغْيِينْ تَسَاْلُوهْ بَكْثَرْ دِقَة عْلَى حَالْتَهْ. و حْنَا، رَانَا وَاجْدِينْ نَڤَتْلُوهْ مَلِي يْڤَرَبْ مَلْ الْمَجْلَسْ".
16
بَصَحْ وَلْدْ خُّتْ بُولُسْ سْمَعْ بْهَادْ الْحِيلَة ورُوَحْ لَتَكَنَة وخَبَرْ بُولُسْ.
17
وعَيَطْ بُولُسْ لْوَاحَدْ مَنْ رِيَاسْ لَمْيَّة عَسْكْرِي و ڤَالْ: "أَدِي هَادْ الْشِيرْ عَنْدْ الْرَايَسْ، عْلَى خَاطَرْ عَنْدَهْ شِي يَخَبِرَهْ بِهْ".
18
أَدَاهْ لْعَنْدْ الْرَايَسْ وڤَالْ: " عَيَطْلِي الْمَحْبُوسْ بُولُسْ، وطْلَبْ مَنِي نْجِيبْ لَكْ هَادْ الْشِيرْ، رَاهْ عَنْدَهْ شِي يْڤُولَهْ لَكْ".
19
شَدَّه الْرَايَسْ مَنْ يَدَهْ ودَاهْ وَاحْدَهْ، وسَاَلَهْ: وَاشْ رَاكْ تْخَبَرْنِي بِهْ؟".
20
ڤَالْ لَهْ: " الْيَهُودْ تْفَهْمُوا بَاشْ يَطَلْبُوا مَنكْ فَالْغَدْ تْهَوَدْ لْهُمْ بُولُسْ لَمَجْمَعْ، كَلِي رَاهُمْ بَاغْيِينْ يَسَاْلُوهْ بَكْثَرْ دِقَة.
21
مَا تَصَدَقْهُومْشْ، عْلَى خَاطَرْ كْثَرْ مَنْ رَبْعِينْ وَاحَدْ مَنْهُمْ يْعَسُوهْ فَالطْرِيڤْ، حَرْمُوا رُوحْهُمْ مَنْ الْمَكْلَة والْشْرَابْ حَتَّى يَڤَتْلُوهْ. ورَاهُمْ يَسَنَاوْ مَنَكْ تَعْطِي الأَمْرْ".
22
وسَرَّحْ الْرَايَسْ دَاكْ الْشِيرْ مْوَصِهْ : " مَا تْڤُولْ لْحَتَّى وَاحَدْ بَلِي خَبَرْتْنِي ".
23
مَنْ بَعْدْ زْڤَى لْزُوجْ مَنْ رِيَاسْ الْمَيَة عَسْكْرِي وڤَالْ: "وَاجْدُّوا مِتِينْ عَسْكْرِي وسَبْعِتِينْ فَارِسْ ومِتِينْ رَامَحْ يْرَوحُوا لْقَيْصَرِيَّة، عْلَى اَلسَاعَة الْثَّالْثَّة مَنْ الْلِيلْ.
24
ويَدِيوْ الْدْوَابْ بَاشْ يَرْكْبْ بُولُسْ ويْوَصْلُوهْ بْخِيرْ لْ فِيلِكْسْ الْوَالِي".
25
وكْتَبْ بْرِيَة لَلْحَاكَمْ يْڤُولْ فِيهَا.
26
"مَنْ كُلُودِيُوسْ لِيسِيَاسْ، لَلْوَالِي الْعْزِيزْ فِيلِكْسْ: سَلاَمْ!
27
هَادْ الْرَّاجَلْ كِي حَكْمُوهْ الْيَهُودْ وكَانُو بْغَاو يَڤَتْلُوهْ، ومَلِي عْرَفْتْ بَلِي رُومَانِي الْجَنْسِيَة، رَوحْتْ بَلْ خَفْ مْعَ الْعَسْكَرْ وسَلَكْتَهْ.
28
وكُنْتْ بَاغِي نَعْرَفْ بَاشْ كَانُوا يَتَهْمُوهْ ويَشْكُوا عْلِيهْ، هَوَّدْتْ لَلْمَجْمَعْ تَعْهُمْ، لْڤِيتْهُمْ يَشْكُوا عْلِيهْ عْلَى أمُورْ اَلشَرِيعَة تَعْهُمْ.
29
مَا لْڤِيتْ حَتَّى شَكْوَى تَسْتَهَلْ الْمُوتْ لاَالْحَبْسْ.
30
وكِي سْمَعْتْ بَلِي الْيَهُودْ كَانُوا دَيْرِينْ حِيلَة بَاشْ يَڤَتْلُوهْ، تَمْ تَمْ أَرْسَلْتَهْ لِيكْ، وأَمَرْتْ اَلِي رَاهُمْ يَشْكُوا يْجُوا لْعَنْدَكْ يَشْكُوا. كُنْ مُعَافَّى".
31
الْعَسْكَرْ أَدَاوْ بُولُسْ فَالْلِيلْ كِيمَا أَمَرْهُمْ الْرَايَسْ، لْأنْتِيبَاتْرِيس.
32
وفَالْغَدْ خَلاَوْ الْفَرْسَانْ يْرَوحُوا مْعَاه وهُمَا رَاجْعُوا لَثَكَنَة.
33
وكِي وَاصْلُوا قَيْصَرِيَّة دَفْعُوا لَبْرِيَة لَلْوَالِي وسَلْمُولَهْ بُولُسْ.
34
كِي قْرَى الْوَلِي لَبْرِيَة، وسَقْسَاهْ مَنْ أَيَّة وِلاَيَة هُوَ، وصَابَهْ مَنْ كِيلِيكِيَّة،
35
ڤَالْ: " نَسْمَعْلَكْ مَلِي يَوَصْلُوا أَلِي يَشْكُوا عْلِيكْ". وأَمَرْ يْعَاسُوهْ فِي قْصَرْ هِيرُودُسْ.