الإصحاح 22
1
" يَا خُوتِي وجْدَادِي، آسَمْعُوا كِي نْدَفَعْ عْلَى رُوحِي".
2
ومَلِي سَمْعُوهْ يْكَلَمْهُمْ بالْلُّغَة الْعِبْرِيَة سَكْتُوا ڤَاعْ. وڤَالْ:
3
" أَنَا رَاجَلْ يَهُودِي تَوْلَدْتْ فِي طَرْسُوسْ كِيلِيكِيَّة، و تَرْبِيتْ فِي هَدْ لَمْدِينَة وتْعَلَمْتْ عَنْدْ كَرْعِي غَمَالاَئِيلْ الْتَرْبِيَة الْلاَزْمَة فالْشَرِيعَة تَعْ جْدَدْنَا. وكُنْتْ غَيُورْ لله كِيمَا رَاكُمْ الْيُومْ أَنْتُمَا.
4
أَضْطَهَدْتْ هَادْ اَلطْرِيڤْ حَتَّى اَلْمُوتْ، قَيَّدْتْ وسَلَّمْتْ رْجَالْ والْنْسَا لَلْحَبْسْ،
5
وحَتَّى اَلْكَهَنَة والْشْيَاخْ يَشَهْدُوا لِي، بَلِي مَدُولِي بْرِيَّة لْخُوتْهُمْ فِي دِمَشْقْ، بَاشْ يْعَوْنُونِي نْقَيَّدْ أَلِي كَانُوا تَمَا ونْجِيبْهُمْ لأُورُشَلِيمْ يَتْعَاقْبُوا.
6
وكِي ڤْرِيبْ نَوْصَلْ لْدِمَشْقْ فِي نَصْ الْنْهَارْ، بْرَڤْ قُدَامِي مَنْ الْسْمَا نُورْ عْظِيمْ.
7
وطَحْتْ لَلَرْضْ، وسْمَعْتْ صُوتْ ڤَالْ لِي: شَاوُلْ، شَاوُلْ! عْلاَشْ رَاكْ تَضْطَهَدْنِي؟
8
وجَاوَبْتْ: شْكُونْ أَنْتَ يَا سِدِي؟ ڤَالْ لِي: أَنَا يَسُوعْ اَلْنَّاصِرِي أَلِي رَاكْ تَضْطَهَدْ فِيهْ.
9
ولِي كَانُوا مْعَيَا شَافُوا الْنُورْ وخَافُوا، بَصَحْ مَا سَمْعُوشْ اَلْصُوتْ أَلِي كَلَّمْنِي.
10
ڤُلْتْ: وَاشْ أَنْدِيرْ يَا رَّبْ؟ وڤَالْ لِي الْرَّبْ: نُّضْ ورُوحْ لْدِمَشْقْ، وتَمَا نْڤُولَكْ شَا لاَزَمْ أَدِيرْ.
11
وتَعْمِيتْ عْلَى جَالْ دَاكْ الْنُّورْ، حَتَّى حَكْمُونِي مَنْ يَدِي أَلِي كَانُوا مْعَيَا ودَاوْنِي لْدِمَشْقْ.
12
"وكَانْ فِي دِمَشْقْ رَاجَلْ أَسْمَهْ حَنَنِيَّا، تَقِي عْلَى حْسَبْ اَلْشَرِيعَة، مَشْهُودْلَهْ مَنْ ڤَاعْ الْسُّكَانْ
13
جَا لْعَنْدِي، وْڤَفْ وڤَالْ لِي: يَا خُويَا شَاوُلْ، شُوفْ! وتَمْتَمْ وَلِيتْ نْشُوفْ وشَفْتْ فِيهْ.
14
وڤَالْ إِلَهْ جْدَادْنَا خَيْرَكْ بَاشْ تَعْرَفْ مَشِيئْتَهْ، وتْشُوفْ اَلْعَادَلْ وتَسْمَعْ صُوتْ مَنْ فَمَهْ.
15
عْلَى خَاطَرْ رَاحْ تْكُونْ لِيهْ شَاهَدْ لْڤَاعْ الْنَّاسْ بَالشِي أَلِي شَفْتْ وسْمَعْتْ.
16
وضُورْكْ مَا تْوَدَرْشْ الْوَقْتْ، نُوضْ وتْغَطَسْ وأَغْسَلْ ذْنُوبَكْ ودْعِي بآسْمْ الْرَّب.
17
مَنْ بَعْدْ مَا رْجَعْتْ لأُورُشَلِيمْ وأَنَا نْصَلِّي فَالْهَيْكَلْ، طَحْتْ فِي غَيْبَة،
18
وشَفْتَهْ ڤَالْ لِي: خَفْ! أَخْرَجْ ضُورْكْ مَنْ أُورُشَلِيمْ، عْلَى خَاطَرْ مَا يَقْبْلُوشْ شْهَادْتَكْ عْلِيَا.
19
ڤُولْتْ : يَا رَّبْ، هُمَا رَاهُمْ عَارْفِينْ بَلِي كُنْتْ نَحْبَسْ و نَضْرَبْ فَالْمْجَامَعْ أَلِي أَمْنُوا بِيكْ.
20
وكِي سَالْ دَمْ آسْتِفَانُوسْ الْشَهِيدْ تَعَكْ كُنْتْ أَنَا وَقَفْ رَاضِي مَلِي ڤَتْلُوهْ.
21
وڤَالْ لِي: رُوحْ، أَنَا نَرَسْلَكْ للأُمَمْ بْعِيدْ".
22
و سَمْعُوا لَهْ حَتَّى لْهَادْ الْكَلْمَة، مَنْ بَعْدْ زَڤُوا ڤَالُوا: "أَدِي أَلِي كِيمَا هَادَ مَالْلَرْضْ، عْلَى خَاطَرْ مَا لاَزَمْشْ يْعِيشْ!".
23
وكَانُوا يْزَڤُوا، ويَنَحِوا قَشْهُمْ ويَرْمُوا اَلْغَبْرَة لَسْمَا،
24
أَمَرْ اَلْرَايَسْ بَاشْ يَدُوهْ الْثَكَنَة، ويْسَقْسِيوَاهْ بَالْضَرْبْ، بَاشْ يَعَرْفُوا عْلاَشْ اَلْنَّاسْ كَانُوا يْزَڤُوا ضَدَهْ.
25
وكِي رَبْطُوهْ اَلْعَسْكَرْ بَاشْ يَجَلْدُوهْ، ڤَالْ بُولُسْ لْرَايَسْ لَمْيَةْ عَسْكْرِي اَلْوَاڤَفْ: " مَسْمُوحْ لْكُمْ تَجَلْدُوا إِنْسَانْ رُومَانِي مَاشِي مَحْكُومْ عْلِيهْ؟".
26
كِي سْمَعْ رَايَسْ لَمْيَة عَسْكْرِي رَاحْ عَنْدْ الْرَيَسْ تَعَهْ، وخَبْرَهْ ڤَالْ لَهْ: "شُوفْ شَا رَاكْ رَايَحْ أَدِيرْ! هَادْ الْرَّجَلْ رُومَانِي".
27
تَمْ تَمْ رَاحْ لِيهْ الْرَايَسْ وڤَالْ لَهْ: " ڤُلْ لِي: أَنْتَ رُومَانٍي؟. وڤَالْ لَهْ: "وَاهْ" .
28
جَاوْبَهْ اَلْرَايَسْ: " أَنَا خَلَصْتْ سُومَة كْبِيرَة بَاشْ نْوَلِي رُومَانِي". وڤَالْ بُولُسْ: " اَنَا تَوْلَدْتْ فِيهَا".
29
وتَمْ تَمْ بَعْدُوا عْلِيهْ اَلْعَسْكَرْ أَلِي كَانُوا رَايْحِينْ يَجَلْدُوهْ. و حْشَّمْ رَايَسْ اَلْعَسْكَرْمَلِي أَعْرَفْ بَلِي رُومَانِي، ومَلِي قَيْدَّهْ.
30
وفَالْيُومْ الْتَالِي بْغَى رَايَسْ اَلْعَسْكَرْ يْتْأَكَدْ: عْلاَشْ يَشْكُوا عْلِيهْ اَلْيَهُودْ؟ حَلَّهْ لَقْيُودْ، و أَمَرْ بَاشْ يَحْضَرْ رِيَاسْ الْكَهَنَة وڤَاعْ أَلِي فَالْمَجْمَعْ. وجَابْ بُولُسْ لْعَنْدْهُمْ.